Дорнод аймгийн Хэрлэн сумын аравдугаар багийн нутаг дэвсгэрт таван давхар орон сууцны барилгын гадна өнгө, будгийн ажил гүйцэтгэхэд ашиглаж байсан дүүжинт өргүүр унаж нэг хүн нас барж, хоёр хүн гэмтэн, эмнэлэгт хүргэгджээ. Иргэн Э-ийн захиалгаар "ТСГ” компанийн гүйцэтгэж байсан угсармал таван давхар орон сууцны барилга дээр уг осол гарчээ. Ослын газарт аймгийн Мэргэжлийн хяналтын газрын улсын байцаагчид болон Цагдаагийн байгууллага ажилласан бөгөөд ослын шалтгааныг тогтоох хяналт шалгалт үргэлжилж байна.
Талбайн үзлэгээр тухайн аж ахуйн нэгж нь хөдөлмөр хамгааллын инженергүй, ажилд гарахад өдөр тутмын аюулгүй ажиллагааны зааварчилгаа өгөгдөөгүй, дүүжинт өргүүр нь баримт бичиггүй, улсын бүртгэлд бүртгүүлээгүй, техникийн магадлагаа хийгдээгүй, операторчингүй гэх зэрэг ноцтой зөрчлүүд илэрчээ.
Аймгийн МХГ-аас энэ оны есдүгээр сарын 08-ны өдөр тус барилга дээр хяналт шалгалт хийж мэргэжил арга зүйгээр хангасан хэдий ч шалгалтанд хамрагдсанаас хойш хөдөлмөр хамгааллын инженергүй, аюулгүй ажиллагааны зааварчилгаа өгөгдөөгүй ажиллаж байжээ. Барилга угсралтын үйл ажиллагааг улсын байцаагчийн актаар түр зогсоолоо.

---