Монгол Улс төвлөрсөн төлөвлөгөөт эдийн засгаас зах зээлийн эдийн засагт шилжих шилжилтийн түүхэн үе шатанд Монгол Улсын Засгийн газрын 1991 оны нэгдүгээр сарын 18-ны өдрийн 22 тоот тогтоолоор улсын өмч хувьчлалын ажлыг эхлүүлэх, цаашид үнэт цаасны зах зээлийг хөгжүүлэх зорилгоор Монголын хөрөнгийн биржийг үүсгэн байгуулсан.

 

      1999 оноос шилдэг 75 хувьцаат компанийн хувьцаанаас бүрдсэн ТОП-75 индексийг тооцож эхэлсэн бөгөөд 2003 оноос сагсад орох компанийн тоог цөөрүүлж, ТОП-20 индекс тооцох болсон. Монголын хөрөнгийн биржийн өчигдрийн буюу гуравдугаар сарын 27-ны арилжаагаар 11 ХК-ийн 32174 ширхэг хувьцааг 20.1 сая төгрөгөөр арилжаалжээ. Топ-20 индекс энэ долоо хоногт бага багаар унасаар байгаа юм. Өчигдөрийн арилжааны дараа гэхэд өмнөх өдрийнхөөс 0.38 хувиар буурчээ.

 

    Тоо ширхэгээр "Гермес центр” ХК-ийн хувьцаа /15987 ш/, үнийн дүнгээр "Тавантолгой” ХК-ийн /14,526,770 төг/ идэвхтэй арилжигджээ. "Монгол Алт” ХК-ийн хувьцааны ханш 14.99 хувиар өссөн бол "АПУ” ХК-ийн хувьцааны ханш 0.85 хувиар буурсан байна. Хөрөнгийн зах зээлийн нийт үнэлгээ нэг их наяд 642 тэрбум 51 сая 478 мянга 710 төгрөг болсон байна.

 

---