Баян-Уул - www.Choibalsan.mn

ДОРНОД: Баян-Уул сумын 50 га талбайд ойжуулалт хийнэ

zulaa — Wed, 27 Apr 2022 10:20:10 +0800

Байгаль орчныг хамгаалах нөхөн сэргээх зардлаар түймэрт шатсан, хөнөөлт шавжид нэрвэгдсэн, мод бэлтгэсэн 50 га талбайд ойжуулалт хийхээр төлөвлөсөн.

Тус ажлыг Баян-Уул суманд шилмүүст модоор хийж гүйцэтгэх ба ойн санг 50 га талбайгаар нэмэгдүүлэх зорилготой юм.

Өнөөдрийн байдлаар ой, хээрийн түймрийн дуудлага бүртгэгдээгүй байна

khulan — Tue, 28 Jul 2020 10:31:42 +0800

Он гарсаар улсын хэмжээнд 07 дугаар сарын 28-ны өдрийн байдлаар Улаанбаатар хот, Архангай, Булган, Завхан, Дорнод, Сэлэнгэ, Сүхбаатар, Хэнтий, Хөвсгөл, Төв, Ховд, Баянхонгор, Өвөрхангай, Увс зэрэг 14 аймгийн 69 суманд нийт 119 удаагийн ой, хээрийн түймэр бүртгэгдсэн байна.

Дээрх түймэрт урьдчилсан байдлаар ойн 10158 /га/, хээрийн 215.715 /га/ нийт 225.874 /га/ талбай өртөж, 2 гэр, 4 айлын өвөлжөө, 1 автомашин шатаж нийт 1.6 тэр бум төгрөгийн хохирол учирчээ. Харин өнөөдөр буюу 07 дугаар сарын 28-ны өдрийн байдлаар ой, хээрийн түймэр бүртгэгдээгүй байна.

Аялал, амралт, зугаалыг улирал эхэлж, хөдөө орон нутгийг зорих иргэдийн хөдөлгөөн нэмэгдсэнтэй холбогдуулан ногоон бүсэд зорчихдоо автомашин техникийн бүрэн бүтэн байдалд хяналт тавих, ил задгай гал түлэхгүй байх, асаасан гал, түүдэг, тамхи, шүдэнзний галыг сайтар унтраах, гал асаагуурыг хээр, хөдөө ил задгай хаяхгүй байх, насанд хүрээгүй хүүхдийг ой, хээрт чүдэнз, асаагууртай явуулахгүй байж ой, хээрийн гал түймэр гарах эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

"Тулгат Баян-Уул" дэвжээний нээлтийн барилдаанд аймгийн нэмэх начин М.Бэлгүтэй түрүүлжээ

magnai — Sat, 28 Apr 2018 06:14:23 +0800

Жамъян аваргын нэрэмжит "Тулгат Баян-Уул" дэвжээний нээлтийн үйл ажиллагаанд зориулсан цолтой болон цолгүй бөхчүүдийн барилдаанд 64 бөх хүч чадал, уран мэхийг уралдуулан барилдаж, аймгийн нэмэх начин М.Бэлгүтэй түрүүлж, аймгийн арслан Г.Төрмөнх үзүүрлэн, аймгийн харцага н.Бямбазоригт, н.Мөнхзоригт нар шөвгөрлөө. Аймгийн цолонд ойрхон бөхийн шагналыг Баян-Уул сумын харъяат сумын заан Д.Батмөнх хүртлээ.

Барилдааны нээлтэнд УБ хотын "Тулгат Баян-Уул" дэвжээний тэргүүн Г.Гантөмөр, тэргүүлэгч, Б.Бат-Ууган, Г.Дашбалбар, Д.Дашмятав нар хүрэлцэн ирж оролцлоо.

Баян-Уул сумын ИТХ-ын Тэргүүлэгчдийн хурал 100%-ийн ирцтэй хуралдав

magnai — Thu, 16 Mar 2017 16:30:48 +0800

2017 оны 03-р сарын 13-ны өдөр сумын Иргэний танхимд Баян-Уул сумын ИТХ-ын Тэргүүлэгчдийн хурал 100%-ийн ирцтэй хуралдав. Хуралдаанаар хэлэлцэх асуудал:
1. Ойн нөхөрлөл, аж ахуй нэгжүүдийн 2016 оны ажлын тайлан мэдээлэлийг сонсож үнэлэлт дүгнэлт өгөх тухай, 2017 онд Ойгоос бэлтгэх модны хуваарь батлах тухай асуудлыг хэлэлцэж батлав. Хуралдаанаар 19 нөхөрлөл, 3 аж ахуй нэгжүүд хамтарч сумын төвийн айл өрхүүдийн хашааг янзалж, сумын төв орчмын төв зам дагуу мод тарьж цэцэрлэгжүүлэхээр боллоо.
ХУРЛЫН АЖЛЫН АЛБА

Баян-Уул сумын 134 өрх Олон улсын Хүмүүнлэгийн төсөлд хамрагдана

magnai — Tue, 14 Mar 2017 15:34:33 +0800

Олон улсын хүмүүнлэгийн Пипл Ин Нийд төрийн бус байгууллагын хэрэгжүүлж байгаа Монгол улсын Дорнод аймгийн зудад нэрвэгдсэн эмзэг малчин өрхүүдийн амьжиргааг хамгаалах, үндсэн хэрэгцээг дэмжих төсөл Дорнод аймгийн 11 сумын 550 эмзэг малчин өрхөд хэрэгжихээр болсноос манай сумын 134 өрх сонгогдож төсөлд хамрагдаж эхлээд байна. Төсөлд хамрагдаж байгаа өрхүүдийг төслийн зүгээс судалгаанд хамруулсан. Төслийн үр шимийг хүртэгчдийн сонгон шалгаруулалтыг дараах үзүүлэлтээр гаргасан.
1. Малчин өрх байх
2. Өрхийн нэг хүнд оногдож байгаа малын тоо нь 20 болон түүнээс доош
3. Дараах эмзэг байдлын шалгуур үзүүлэлтээс багадаа нэг байхаар сонгосон. Үүнд: өрх толгойлсон эр/эм, жирэмсэн, хөхүүл эмэгтэй, 0-5 настай хүүхэд, 50 дээш настай болон хөгжлийн бэрхшээлтэй хүн зэрэг орсон.
3-р сарын 10-ны өдөр Пипл Ин Нийд төслийн тусламжийн бараа суманд ирж 3-р сарын 12-13-ны өдрүүдэд сонгогдсон өрхүүдэд тусламжийн 1 ээлжинд Хорголжин тэжээл /малын тооноос хамаарч/, Эрдэс, витамины нэмэгдэл тэжээл /2 уут х 500гр/ хүргэлээ.
40 кг-ийн савалгаатай хорголжин тэжээл 769 шуудай, 20 кг-ийн савалгаатай хоргожин тэжээл 70 шуудай, эрдэс, витамины нэмэгдэл тэжээл 7 хайрцаг буюу 280 уутыгг тараагаад байна.
Тусламжийг мөнгөн дүнд шилжүүлбэл:
Хоргожин тэжээл нь 1 кг нь 490₮ х 32160 кг = 15758400₮
Хайрцагтай бэлдмэл 7 хайрцаг * 40 уут = 280 уут х 10000₮ - 2800000
Нийт – 18558400₮ болсон.

2-р ээлжинд Мөнгөн тусламж олгоно.
1 өрхөд 2 хүнтэй бол 50$, 1 өрхөд 4 хүнтэй бол 100$, 1 өрхөд 6-аас дээш хүнтэй бол 150$ мөнгөн тусламжийг 3-р сарын дунд буюу сүүлээр олгох юм байна.

Өвөлжилт хүндэрсэн хаврын хүнд хэцүү үед тусламжийн гараа харамгүй сунгаж цөөн малтай малчин өрхүүдийн амьжиргааг хамгаалж байгаа Пипл Ин Нийд төрийн бус байгууллагын хамт олонд нутгийн зон олны өмнөөс баярлаж талархснаа илэрхийлье.

Баян-Уул суманд ”Сар шинийн өнгө-2017” үзэсгэлэн худалдаа болно

magnai — Thu, 09 Feb 2017 10:51:10 +0800

Жил бүр уламжлал болгон зохион байгуулдаг "Алтан унжлагат" хэмээх гал тахиа жилийн Сар шинийн баярт зориулж иргэдэд экологийн цэвэр, нутгийн брэнд бүтээгдэхүүнээр хангах ”Сар шинийн өнгө-2017” үзэсгэлэн худалдаа 2017 оны 02 дугаар сарын 16,17-ны өдрүүдэд Соёлын төвд зохион байгуулна.
Үзэсгэлэн худалдаан оролцож бүтээгдэхүүнээ борлуулагчид дараах шаардлагыг хангасан байна.
-Малгай, хормогч, бээлийтэй байх
-Бүтээгдэхүүн нь сав баглаа боодол хаяг, шошготой байх
-Бүтээгдэхүүн худалдаалах үнэ тодорхой байх.

Зохион байгуулагчид: Баян-Уул сумын
багийн Засаг даргын ажлын алба
МЭҮТасаг

Явуулын баг Баян-Уул суманд ажиллаж эхэллээ

marsbold — Fri, 03 Feb 2017 12:29:30 +0800

Аймгийн Засаг даргын захирамжаар өвөлжилт хүндэрсэн болон хүндэрч болзошгүй сумдын малчид, иргэдэд эрүүл мэнд, нийгмийн даатгалын тухай хууль, тогтоомжийн талаарх цогц мэдээллийг хүргэн ажиллаж байна.
Цагаан-Овоо сумын малчин иргэдэд Эрүүл мэнд, нийгмийн даатгалын багц хуулиудад орсон нэмэлт, өөрчлөлтүүдийн талаар 35 өрхийн, 81 малчин иргэдэд мэдээлэл өгч, иргэд, даатгуулагчдийн санал, хүсэлтийг хүлээн авч, шийдвэрлэх боломжтой санал, хүсэлтийг газар дээр нь шийдвэрлэн ажиллаж байна.
2017 оны 02 дугаар сарын 02-ны өдрөөс Баян-Уул суманд ажиллаж эхэллээ.
Баян-Уул сумын төсөвт байгууллагын ажилтан албан хаагчдад Эрүүл мэнд, нийгмийн даатгалын багц хуулиудад орсон нэмэлт, өөрчлөлтүүд сэдэвт сургалт зохион байгуулан ажиллаа.Үргэлжлүүлэн Эрүүл мэндийн газар, БОЭТ, Хөдөлмөр, халамж үйлчилгээний газар, Эрүүл мэнд, нийгмйин даатгалын хэлтсийн хамтарсан явуулын баг тус сумын малчин, иргэддээ 2 хоногийн хугацаанд эрүүл мэндийн тусламж үйлчилгээг хүргэн ажиллах юм.

Баян-Уул сумын төсөвт байгууллагуудын дунд Караоке-2017 тэмцээн боллоо

magnai — Tue, 31 Jan 2017 18:22:49 +0800

Төсөвт байгууллагууд болон аж ахуйн нэгжүүдийн дунд сумын соёлын төвөөс санаачлан зохион явуулсан Караоке 2017 тэмцээнд 7 байгууллага өрсөлдөж Гал түймэр унтраах, аврах 53-р ангийн баг 1-р байр, Банк, цагдаа, ойн ангийн хамтын баг 2-р байр, ЗДТГ-ын баг 3-р байранд шалгарлаа. Тэмцээний шүүгчээр залуу дуучин Б.Ганзориг, Соёлын төвийн номын санч Т.Оюун-Эрдэнэ нар ажиллалаа. Баг хамт олноо идэвхтэй оролцуулсан байгууллагууддаа баярлалаа. Та бүхний ажил хөдөлмөрт өндөр амжилт хүсье.

Хүүхдүүд сумын Засаг даргын Тамгын газартай танилцлаа

magnai — Fri, 27 Jan 2017 14:38:24 +0800

Цэцэрлэгийн ахлах А бүлгийн багш Алтанчимэг, туслах багш Алтанзол багштай хүүхдүүд сумын Засаг даргын Тамгын газартай танилцах аялал хийлээ. Бяцхан хүүхдүүдээ хүндэтгэн Иргэний танхимд хүндэтгэл үзүүллээ. Бяцхан хүүхдүүддээ Засаг даргын орлогч Ш.Төмөр-Ивээлт витамин, ЗДТГ-т ажилладаг ахлахын А бүлгийн хүүхдүүд эцэг эхчүүд дурсгалын зургийг багш нарт нь гардууллаа. Иргэдийн Төлөөлөгчдийн хурлын даргын өрөөнд орж ИТХ-ын дарга Г.Ганчимэг даргатайгаа танилцаж бидэнд олон төрлийн тоглоом хэрэгтэй байна гэж хүслээ.

Баян-Уул сумын аврага шалгаруулах ширээний теннисийн тэмцээн боллоо

magnai — Mon, 16 Jan 2017 14:24:30 +0800

Баян-Уул сумын аварга шалгаруулах ширээний теннисийн тэмцээн 2017 оны 01-р сарын 14-ны өдөр сумын соёлын төвд амжилттай явагдаж өндөрлөлөө. Тэмцээнийг жил бүр уламжлал бүр Г.Дашжавхлан захиралтай "Улзын буян” ХХК 2 дахь удаагаа зохион байгуулж байна.
Дорнод аймгийн Баян-Уул сумын сургуулийн аварга шалгаруулах тэмцээний эрэгтэй төрөлд 6 тамирчин
1-р байранд 12а ангийн сурагч Баярцогтын Энх-Од
2-р байранд 12б ангийн сурагч Доржийн Төрболд
3-р байранд Амарсанаагийн Бадрал
Эмэгтэй төрөлд 6 тамирчин
1-р байранд Өлзийбаярын Хулан
2-р байранд
3-р байранд Оюундарь

Насанд хүрэгчдийн ганцаарчилсан эрэгтэй төрөлд 32 тамирчин өрсөлдөж
1-р байр Гомбын Баярсайхан – Бэрх баг
2-р байранд Гэрэлцэцэгийн Ганболд - ЕБС
3-р байранд Гэрэлцэцэгийн Эрхэмбаатар – Ноён даамал ХЗХ
Ганцаарчилсан эмэгтэй төрөлд 16 тамирчин өрсөлдөж
1-р байранд Цэрэнгийн Даваацэрэн – Өвөр Эрээн баг
2-р байранд Дашбалбарын Батсувд – Улз баг
3-р байранд Дашбалбарын Батцэнгэл – Улз баг
Холимог хосын төрөлд 9 баг
1-р байранд Гэрэлцэцэгийн Ганболд, Цэрэнгийн Даваацэрэн - ЕБС
2-р байранд Дашнямын Базарсад, Буджавын Мөнхбаясгалан – Бэрх баг
3-р байранд Гэрэлцэцэгийн Эрхэмбаатар, Дашбалбарын Батцэнгэл "Ноён даамал” ХЗХ

Баян-Уул суманд АИХ-ын депутат О.Очиржавын нэрэмжит Гар бөмбөгийн тэмцээн зохион байгуулагдлаа

magnai — Mon, 09 Jan 2017 12:44:08 +0800

Монгол улсын Үндсэн хууль батлагдсаны 25 жилийн ойн хүрээнд АИХ-ын депутат О.Очиржавын нэрэмжит Гар бөмбөгийн тэмцээнийг 2017-01-08-нд хилийн 0275 дугаар ангийн спорт зааланд зохион байгууллаа. Тэмцээнийг сумын Засаг даргын орлогч Ш.Төмөр-Ивээлт нээж, АИХ-ын депутат О.Очиржав гар утсаар нийт тамирчид, үзэгч олондоо мэндчилгээ дэвшүүлж тэмцээнийг эхлүүллээ.
Тэмцээнд эрэгтэй 5 баг, эмэгтэй 9 баг өрсөлдөж
эрэгтэй тамирчдаас
Онцгой байдлын Гал түймэр унтраах, аврах 53 дугаар ангийн баг 1-р байр,
Оюутны баг тамирчид 2-р байр
Багш нарын баг тамирчид 3-р байр
эмэгтэй тамирчдаас
ЕБС-ийн сурагчдын баг тамирчид 1-р байр
Онцгой байдлын Гал түймэр унтраах, аврах 53 ангийн баг 2-р байр
ЕБС-ийн сурагчдын баг тамирчид 3-р байрыг тус тус эзэллээ.
Шилдэг холбогчоор Гал түймэр унтраах, аврах 53 дугаар ангийн тамирчин Т.Дүгэржав,ЕБС-ийн 8-р ангийн сурагч Э.Намуунаа, Шилдэг довтлогчоор Оюутны багийн тамирчин Б.Батцэнгэл, ЕБС-ийн 12-р ангийн сурагч Г.Баярцэцэг нар тус тус шалгарлаа.
Тэмцээнд оролцсон нийт баг тамирчиддаа спортын өндөр амжилт хүсэе.

Шарайд омгийн Батын Ренчины "Цустай мөр" ном хэвлэгдэн гарлаа

magnai — Thu, 22 Dec 2016 16:55:30 +0800

Дорнод аймгийн Баян-Уул сумын уугуул Шарайд омгийн Батын Ренчин ахайн бичсэн 30-40 өөд оны их хэлмэгдүүлэлтийн үеийг тодоор дүрслэн бичсэн "Цустай мөр" ном хэвлэгдэн гарлаа. Уг номыг худалдан авах хүсэлтэй хүмүүс 9409-3010, 9663-5601, 8868-5601 дугаарын утсаар холбоо барина уу.

Номын үнэ: 10,000₮ ажээ

"Зүрхэн арал"-ыг аялал жуулчлалын бүтээгдэхүүн болгох тухай хэлэлцэв

magnai — Thu, 15 Dec 2016 15:02:52 +0800

"Дорнод Аялал жуулчлалын НЭГДЭЛ"-ийн гишүүдийн ээлжит уулзалтаар "Өүлэн эх"-ийн төрж өсөж, өвөлжиж, хаваржиж байсан Монгол, Орос улсын хилийн бүс нутагт орших "Зүрхэн арал"-ыг аялал жуулчлалын бүтээгдэхүүн болгох тухай хэлэлцэж маршрутыг урьдчилсан байдлаар тогтоов.

http://discover-dornod.mn/

Шинэ цагийн сургуульгүй сум

marsbold — Mon, 05 Dec 2016 10:54:25 +0800

Эрүүл, аюулгүй орчинд сурч боловсрох нь хүүхдийн үндсэн эрх. Гэтэл Дорнод аймгийн Баян-Уул сумын ерөнхий боловсролын сургуулийн дунд, ахлах ангийн 400 гаруй хүүхдийн энэхүү эрх ноцтой зөрчигдсөөр багагүй хугацаа өнгөрлөө. Монгол орны зүүн хойд хэсэгт, хил дагуу орших тус сумын сургуулийн хичээлийн байрыг 2016 оны 4 сарын 18-нд акт тавьж хаасны улмаас одоо багш, сурагчид нь дотуур байрандаа аргацаан хичээллэж, туйлын хүнд нөхцөлд шар нар, бор өдрийг өнгөрүүлж байна.
Уг нь хичээлийн шинэ байр баригдаж байсан ч төсөв хөрөнгийн гачаалаас болж таг зогсчээ. Цаг үе нь улс төрийн шат шатны сонгууль болж, засаг төрийн шинэ зохион байгуулалт хийгдэж буйтай давхцсан тул энэ сургууль газрын холд төр засгийн анхаарлаас алслагдаж, улмаар үүссэн нөхцөл байдлыг анзаарах сөхөө хаана ч байхгүй болсон гэхэд хилсдэхгүй. Харамсалтай нь ийнхүү шинэ зуунд сургуульгүй сум бий болж, эрх нь зөрчигдсөн 400 гаруй хүүхэд энэ өвлийг зутруу гэхэд зөөлдөхөөр хүндхэн угтаж байна.
90 жилийн түүхтэй энэ сургуулийн хичээлийн байр 1969 онд ашиглалтанд орсноос хойш 47 жилийн дараа хаалгаа бариад байна. Сургуулийн барилгын тааз, давхар дундын хучилтын модон хийц өмхөрч муудсанаас шавар өнгөлгөө болон дам нуруу нь доош цүлхийж, цөмөрч нурсанаар сургалтын үйл ажиллагааг үргэлжлүүлэн явуулах нь сургуулийн багш, ажилчид, суралцагчдын аюулгүй байдалд ноцтой эрсдэл үүсгэсэн гэсэн дүгнэлт гарчээ. Энэ шалтгаанаар аймгийн Мэргэжлийн Хяналтын газраас хоёр дахь удаагийн шалгалтаар ийнхүү 4 сарын 18-нд "Хичээлийн барилгын үйл ажиллагааг бүр мөсөн зогсоох тухай” акт гарган лацджээ.
Байдал үнэхээр хүндэрч, хүний эрүүл мэнд хохирохоос өмнө арга хэмжээ авсан нь зүйн хэрэг. Сүүлийн жилүүдэд анги танхимын таазнаас шавар унахаас халхалж хөндөл мод хадан, хамгаалалт болгон даавуу татаж аргацааж байжээ. Ашиглалтанд орсноос хойш сургууль бүрэн хэмжээний засварт огт ороогүйг бодоход л барилга нь ямар болж элэгдэж хуучирсныг төсөөлөх боломжтой. Ёстой л хойд хормойгоороо урд хормойгоо нөхөх нь байтугай тартагтаа тулсан барилгыг тамтаг болтол нь эдэлж арайхийн өнөөг хүргэсэн байх юм. Эцэстээ тус барилгын спорт заалны доод хэсэг их хэмжээгээр нурсан учир ийн хаах арга хэмжээ авчээ.
Хичээлийн өөр байргүйн улмаас одоо дунд, ахлах ангийн сурагчид нь 1972 онд ашиглалтанд орсон нэг давхар дотуур байрандаа хичээллэж байна. Гэтэл мөн л дотуур байранд нь 2015 онд Мэргэжлийн хяналтын газраас "чанарын шаардлага хангахгүй байна” гэсэн дүгнэлт гаргасан байна. Аргагүйн эрхэнд, анги танхим хүрэлцэхгүйн гачигдлыг даваж гарахын тулд боломжтой бүх өрөөг ашиглан хоёр ээлжээр хичээллэсээр байна. Ингээд зовлон гачлан нимгэрэх биш харин ч нэмэгджээ. Үүний улмаас дотуур байранд хамрагдах хүүхдийн тоог багасгаж, хичээллэх танхим жижиг учир олон хүүхэдтэй анги багтахгүй, хавар намрын цагт таазнаас ус дусдаг, ангиас нэг хүүхэд гарах болоход бүх хүүхэд босох болдог, өрөөнүүдийн хана нимгэн учир хажуугийн ангид зааж буй хичээл, тэр ч бүү хэл утас дуугарах нь хүртэл сонсогддог, гал түлэхэд жижиг анги хэт халж цонх онгойлгосноор хүүхдүүд хатгаа авах, хичээлийн самбар хүүхдийн харах харааны түвшинд их ойрсон зэрэг олон бэрхшээл тулгарах болсон байна. Мөн дотуур байрны зориулалттай уг байранд спорт заал байхгүй учраас биеийн тамирын хичээл орох боломжгүй болжээ. Гадаа мөсөн гулгуурын талбай зохиож, биеийн тамирын хичээлийг гадаа орж магадгүй аж. Хоёр ээлжээр хичээллэдэг тул сүүлийн цагуудыг 30 минутаар ордог нь хичээлийн агуулгыг бүрэн ойлгуулахад хүндрэлтэй болсныг багш нар хэлж байв.
Зовлон үүгээр дуусахгүй нөхцөл байдал газар дээрээ улам л хүндэрсээр байгаа аж. Халаалтын зуух эвдэрсэнээс болж 10 дугаар сарын дунд хүртэл халаалтгүй хичээллэсэн гэнэ. Энэ үеэр хүүхдүүд гадуур хувцастайгаа суухгүй бол даарч, ханиад хүрэх, гадуур хувцастай суухаар хичээл хийхэд төвөгтэйг сурагчид тоочин ярьж байлаа.
Мэдээж энэ зовлонгоо сургуулийн хамт олон холбогдох газарт тоочсон ч мухардалд орсон хэвээр гэнэ. Одоо хичээллэж байгаа дотуур байр ашиглалтын шаардлага хангахгүй болсныг Аймгийн МХГ-ын барилгын техникийн улсын байцаагч М.Ганхүү дуулгасан ч хичээлийн байргүй учир санхүүжилт шийдэгдэж сургуулийн шинэ барилга ашиглалтанд орох хүртэл тэсэхээс өөр аргагүй гэдгийг сургуулийн багш, удирдлагууд хэлж байна. Аймаг, орон нутгийн зүгээс Сангийн яам, БСШУСЯам гээд холбогдох газруудад удаа дараа хүсэлт тавьсан ч биеллээ олохгүй байсаар Баян-Уул сум ийнхүү сургуульгүй болчихоод байна.
Уг нь БСШУСЯ болон гүйцэтгэгч "Сүхжин” ХХК-ны хамтын гэрээний дагуу улсын төсвөөр Дорнод аймгийн Баян-Уул суманд 640 хүүхдийн сургуулийн шинэ барилгыг дөрвөн жилийн өмнөөс барьж эхэлжээ. Барилгын ажлыг 2012 оны 7 дугаар сарын 25-наас 2014 оны 8 дугаар сарын 7-ны хооронд хоёр жилийн хугацаанд хийж, ашиглалтанд оруулахаар гэрээнд заасан ч одоо хэр дуусаагүй байна. Гэрээ анх улсын төсөвт 2 тэрбум 400 сая төгрөгөөр тусгагдсан ч хяналтын төсвөөр 3 тэрбум 958 сая 700 мянган төгрөг болж батлагдсан байдаг. Үүний дагуу 2012 онд 300 сая төгрөг, 2013 онд 985 сая төгрөг, 2014 онд 704 сая төгрөг, 2015 онд 260 сая төгрөг, үүний дараа 1 тэрбум 109 сая төгрөгийн санхүүжилтийг тус тус улсаас хийснээр барилгын ажлын 85 хувийг "Сүхжин” ХХК хийж гүйцэтгэсэн аж. Энэ оны зургаадугаар сард тус компаний захирал нэг тэрбум төгрөгийн санхүүжилт орж ирвэл энэ оны 12 сард барилгыг дуусгаж хүлээлгэн өгөх боломжтой гэж мэдэгдсэн ч шийдэгдсэн төсөв, хийсэн ажилгүй гацаанд оржээ.
Барилгын ажлын тайланд барилга бүтэц, архитектурын хэсэг 100 хувь, дотор цахилгаан, интернэт холбооны далд холболтууд бүрэн хийгдсэн тухай бичжээ. Барилгын торх боссоноос бусад цахилгаан, хаалга, дотор, гадар засал, сантехникийн ажлууд үлдээд байгааг сургуулийн захирал асан Д.Энхбарс хэлж байсан юм. 85 хувийн гүйцэтгэлтэй гэх сургуулийн шинэ барилгын вакум цонхнууд одоо хагарсан байдалтай байх ба үүнийг гүйцэтгэгч компани хариуцахгүй гэдгээ мэдэгджээ. Ашиглалтанд орох хугацаа сунжирсаны улмаас ийм эвдрэл гэмтэл, хорогдол цөөнгүй гарч байгаа аж. Харин эвдэрч хэмхэрсэн зүйлсийн төлбөрийг хаанаас гаргах нь бас л ойлгомжгүй байна.
Ингээд л шинэ цагт сургуульгүй сум болсон энэ зовлон хэдий хэр үргэлжлэх нь одоогоор тодорхойгүй. Дашрамд "шинэ цаг” гэж онцлохын учир нь эдүгээ хориннэгдүгээр зуунд ийм байдалд орно гэдэг бол улс орон хичнээн хямарч доройтсны нэг нотолгоо гэлтэй.
Шинэчлэлийн засгийн газар 2012-2016 оны үйл ажиллагааны мөрийн хөтөлбөртөө "Сумын төвийн шинэчлэл” хөтөлбөр хэрэгжүүлэхээр тусгасан. Эхний жилд Баянхонгор аймгийн Баянлиг, Бууцагаан, Дорноговь аймгийн Замын-Үүд суманд уг шинэчлэлийн төслийг хэрэгжүүлэх гэж оролдсоны дараа 2014 онд улсын хэмжээнд 16 сум "Сумын төвийн шинэчлэл” төсөл хөтөлбөрт хамрагдсаны нэг нь Баян-Уул сум бөгөөд албан байгуулага, айл өрхийг холбосон халуун хүйтэн ус, бохир, дулаанд холбогдсон суурин байгуулах, автомашин болон явган хүний зам, замын гэрэлтүүлэг зэрэг ажлуудыг цогцоор нь хийж гүйцэтгэхээр шийдвэрлэж, 5 тэрбум төгрөгийн төсөв баталсан юм. Үндсэндээ хуучин сумын төвийг "шинэ” болгож өөрчлөнө гэсэн зорилттой.
Харамсалтай нь төсөл хөтөлбөр хэрэгжсэн цагаас л хойш барилга нь баригдсан ч одоо төсвийн гачигдлаас болж гацаанд орсон сургуулийн байраа хүлээж хүүхдүүд нь дотуур байрандаа эрхээ эдлэх гэж зүдэрч сууна. "Шинэ цагийн” сум болох "шалгуур”-ыг давсан ч хичээллэх сургуульгүй мунгинаж байна.
"Нийгмийн хамгааллын улсын буюу хувийн байгууллага, шүүх, захиргааны болон хууль тогтоох байгууллагаас хүүхдийн талаар явуулах аливаа үйл ажиллагаанд юуны өмнө хүүхдийн дээд ашиг сонирхлыг хангахад анхаарлаа хандуулна” гэсэн заалт Хүүхдийн эрхийн конвенцийн 3 дугаар зүйлд бий бөгөөд Хүүхдийн эрхийг хамгаалах тухай хуулийн 4 дүгээр зүйлийн 2 дугаар хэсэгт ч "Төр, иргэн, аж ахуйн нэгж, байгууллага, үйл ажиллагаа явуулахдаа хүүхдийн эрх ашгийг нэн тэргүүнд хангахыг эрхэмлэх” гэсэн нь бий. Үндсэн хууль, олон улсын хууль, тогтоомжинд заасан зарим эрхүүд нь төрөөс заавал арга хэмжээ авч байж л хэрэгжих бололцоотой байдаг тул төрөөс хэрэгтэй, хэрэггүй зүйлд зориулан баталсан төсөв мөнгөө багахан хумиад хүүхдийн эрх ашгийг дээдэлж, сурч боловсрох боломжийг бүрдүүлж сургуулийн барилгыг нэн тэргүүнд ашиглалтанд оруулж өгвөл уг нь зүгээр сэн.
Шинэ цагийн сум сургуульгүй байна гэхээр нэг л харамсалтай санагдаж байна. "Бухын доодохыг харж үнэг турж үхнэ” гэгчээр Баян-Уул сумын сурагчид сургуулийн шинэ байраа ашиглалтанд орохыг дөрвөн жил хүлээж, хуучин байр нь нурахдаа тулсан тул дотуур байрандаа хичээллэн өмнөх зууны хөгжлөөсөө ухарсан байдалтай аргацааж суугааг төр засагтаа дуулгах гэлээ.
Ц.Анужин

Баян-Уул сумын цэцэрлэгийн эрхлэгч нарын сургалт болж байна

marsbold — Fri, 02 Dec 2016 11:03:07 +0800

Тус сумын Цэцэрлэгт "Сургуулийн өмнөх боловсролын удирдах ажилтны үүрэг оролцоо, чадавхийг дээшлүүлэх нь ” сэдэвт сургалт 2016 оны 12 дугаар сарын 01-нд нээлтээ хийлээ. Сургалтын үйл ажиллагааг нээж аймгийн Боловсрол, соёл урлагийн газрын Сургалтын өмнөх боловсрол хариуцсан мэргэжилтэн Д.Өнөрцэцэг, сумын ИТХ-н дарга Г.Ганчимэг, Засаг даргын орлогч Ш.Төмөр-Ивээлт нар үг хэлэв. Уг сургалт нь 2016 оны 12 дугаар сарын 01-02-ны өдрүүдэд болох бөгөөд Дорнод аймгийн бүх цэцэрлэгийн эрхлэгч нар оролцож байна

Баян-Уул сумын удирдлагууд албан байгууллагын үйл ажиллагаатай танилцлаа

marsbold — Fri, 02 Dec 2016 10:16:04 +0800

2016 оны 11 дүгээр сарын 28-нд сумын ИТХ-н дарга Г.Ганчимэг, Засаг дарга Х.Баттулга нар Сум дундын Хүн эмнэлэг, Цэцэрлэг, Ерөнхий боловсролын сургуулийн үйл ажиллагаатай тус тус танилцаж, цаашид хэрхэн хамтран ажиллах талаар санал бодлоо солилцлоо. Мөн Япон улсын хөрөнгө оруулалттай "Майдарын буудай” ХХК нь Цэцэрлэгийн хүүхдүүдэд хамгийн сайн чанарын шүдний ОО, сойзоор хандив өргөлөө

Аймаг, сумдын ИТХ-ын Төлөөлөгчдийн сургалт

marsbold — Fri, 25 Nov 2016 12:29:21 +0800

Аймаг, сумдын ИТХ-ын Төлөөлөгчдийг чадавхжуулах үндэсний сургалтын хоёр дахь ээлжийн Баяндун, Баян-Уул, Цагаан-Овоо, Сэргэлэн сумдын сургалт амжилттай болж өндөрлөлөө. Сургалтанд сумдын Төлөөлөгчид ихээхэн ач холбогдол өгч оролцлоо.

Баян-Уул сумын ИТХ-ын тэргүүлэгчдын анхдугаар хуралдаан боллоо

magnai — Tue, 08 Nov 2016 16:50:47 +0800

Сумын Иргэдийн Төлөөлөгчдийн Хурлын Тэргүүлэгчдийн анхдугаар хурал 2016 оны 11 дүгээр сарын 07-нд боллоо. Хуралд төсөвт албан байгууллагын дарга, эрхлэгч нар оролцож өвөлжилтийн бэлтгэл ажил болон цаг үеийн байдлын талаар мэдээлэл өгч, харилцан санал солилцов. Хуралдаанаар:
1. Төсөвт албан байгууллагын өвөлжилтийн бэлтгэл ажлын тайлантай танилцаж зөвлөмж өгөв.
2. Орчны бүсийн зөвлөлийг шинэчлэн байгууллаа.
3. Мотоциклийн хөдөлгөөнийг хязгаарлах тухай ... зэрэг асуудлуудыг хэлэлцэн шийдвэрлэлээ.

Цурманд оруулсан түймэр дахин дэгдсэнийг унтраажээ

marsbold — Wed, 10 Aug 2016 13:59:57 +0800

Дорнод аймгийн Баян-Уул сумын Эрээн багийн нутаг "Эрээн даваа” гэдэг газарт өнгөрсөн долоодугаар сарын 31-нд гараад байсныг унтраагаад байв. Тэгвэл түймрийн цурамнаас энэ сарын 01-нд дахин түймэр дэгджээ.

Тус аймгийн Онцгой байдлын газрын Баян-Уул сумын Гал унтраах, аврах 53 дугаар ангийн 27 албан хаагч, орон нутгийн 48 иргэн түймрийн голомтод ажиллаж өчигдөр дахин цурманд нь оруулсан байна.

Баян-Уулд түймэр гарсан байна

marsbold — Tue, 02 Aug 2016 10:35:01 +0800

Дорнод аймгийн Баян-Уул сумын Эрээн багийн нутаг "Эрээн даваа” гэдэг газар долоодугаар сарын 31-ний өдөр хүлэрийн түймрийн цурамнаас дахин түймэр гарсан байна.

Түймрийн мэдээллийг аймгийн Байгаль орчны газар өчигдөр 16:00 цагт хүлээн авч, Баян-Уул суман дахь Гал унтраах, аврах 53 дугаар ангийн 12 албан хаагч, орон нутгийн 10 иргэн, 2 автомашин нийт 22 хүн, 3 техник хэрэгсэлтэйгээр ажиллажээ. Түймрийг өчигдөр оройн 22:10 цагт цурамд оруулжээ.