Булган - www.Choibalsan.mn

Өнөөдрийн байдлаар ой, хээрийн түймрийн дуудлага бүртгэгдээгүй байна

khulan — Tue, 28 Jul 2020 10:31:42 +0800

Он гарсаар улсын хэмжээнд 07 дугаар сарын 28-ны өдрийн байдлаар Улаанбаатар хот, Архангай, Булган, Завхан, Дорнод, Сэлэнгэ, Сүхбаатар, Хэнтий, Хөвсгөл, Төв, Ховд, Баянхонгор, Өвөрхангай, Увс зэрэг 14 аймгийн 69 суманд нийт 119 удаагийн ой, хээрийн түймэр бүртгэгдсэн байна.

Дээрх түймэрт урьдчилсан байдлаар ойн 10158 /га/, хээрийн 215.715 /га/ нийт 225.874 /га/ талбай өртөж, 2 гэр, 4 айлын өвөлжөө, 1 автомашин шатаж нийт 1.6 тэр бум төгрөгийн хохирол учирчээ. Харин өнөөдөр буюу 07 дугаар сарын 28-ны өдрийн байдлаар ой, хээрийн түймэр бүртгэгдээгүй байна.

Аялал, амралт, зугаалыг улирал эхэлж, хөдөө орон нутгийг зорих иргэдийн хөдөлгөөн нэмэгдсэнтэй холбогдуулан ногоон бүсэд зорчихдоо автомашин техникийн бүрэн бүтэн байдалд хяналт тавих, ил задгай гал түлэхгүй байх, асаасан гал, түүдэг, тамхи, шүдэнзний галыг сайтар унтраах, гал асаагуурыг хээр, хөдөө ил задгай хаяхгүй байх, насанд хүрээгүй хүүхдийг ой, хээрт чүдэнз, асаагууртай явуулахгүй байж ой, хээрийн гал түймэр гарах эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Булган сум Их хуурчийн хөшөөг босгов

tonshuul — Mon, 04 Dec 2017 02:50:33 +0800

Аймгийн иргэдийн Төлөөлөгчдийн Хурлын 2017 оны 10 дугаар сарын 20-ны өдрийн хуралдааны шийдвэрээр Булган сумын соёлын төвийг Төрийн шагналт, Ардын жүжигчин, Зууны манлай Морин хуурч Г.Жамъянгийн нэрэмжит болгосон.

Тус сумынхан их хуурчийнхаа хөшөөг Соёлын төвийн урд талбайдаа сүндэрлүүлэн, Бүгд Найрамдах Улс тунхагласан өдөр буюу 11 дүгээр сарын 26-ны өдөр нээлтийг хийлээ.

Нээлтийн ажиллагаанд аймгийн Засаг дарга, Боловсрол, соёл урлагийн газрын дарга, сумын удирдлагууд болон Г.Жамъян хуурчийн үр хүүхдүүд Улаанбаатар хотоос ирж оролцлоо.

Их хуурчийн хөшөөний загварыг 1950-иад онд Олон улсын уралдаанд оролцож байх үеийн залуу насны зургаар бүтээж, уран барималч н.Энхтүвшин урлажээ.

Төрийн шагналт, Ардын жүжигчин, Монголын морин хуурын орчин цагийн сургалтыг үндэслэгч, хөгжмийн урлагийн нэрт төлөөлөгч, сурган хүмүүжүүлэгч, профессор, Төрийн их хуурч Гомбодоржийн Жамъян нь 1919 онд Дорнод аймгийн Булган сумын Туг уул хэмээх газар мэндэлсэн.

Багадаа ааваараа морин хуур заалгаж аймгийнхаа наадамд хуурдаж, бүр улс хувьсгалын 15 жилийн ойгоор зохиосон хуурчдын уралдаанд оролцож байсан энэ хүн урлагийн сургуульд 1936 онд суралцжээ.Тэнд Гавьяат хөгжимчин Д.Түдэв, С.Түвдэн нараар морин хуур заалгаж, сургуулиа төгсөөд Улсын төв театрт хөгжимчнөөр оржээ.

Монгол ардын аялгуу дуунаас эхлээд Р.Шуманы "Бодол”, "Бяцхан дурдатгал”, А.Г.Рубинштейны "Аялгуу”, П.И.Чайковскийн "Баркороло” зэрэг үндэсний болон сонгодог хөгжмийн бүтээлүүдийг морин хуураар тоглож, уг хөгжмийн зэмсгийн аялгуу гаргах царыг нийтэд харуулсан алдарт хөгжимчин ажээ.

Үндэсний болон дэлхийн сонгодог хөгжмийн бүтээлийг гарамгай хөгжимдөж нэгдсэн концертод амжилттай оролцсон учир Төрийн шагнал хүртээсэн. "Цогттайж” жүжгийн "Алтанбүс”, "Амарсанаа” жүжгийн Гэрэлгуа, Амарсанаа нарын дуу, Ч.Ойдовын "Минийбаясгалан” жүжиг, манай анхны бүжгэн жүжиг "Манай нэгдлийнхэн”-ий хөгжмийг зохиожээ. Дэлхийн Зон Олны 4 удаагийн их наадамд морин хууртайгаа оролцож монгол ардын уртын дуу болон, дэлхийн сонгодог аялгуунуудаас тоглон шагнал хүртсэн. Хөгжим Бүжгийн Дунд Сургуульд 58 жил багшилж олон шилдэг хуурчдыг төрүүлсэн байна.

Гэрийн хөгжим гэгдэж байсан морин хуурыг шинжлэх ухааны үндэслэлтэйгээр сургалтын хөтөлбөрт оруулж, мэргэжлийн хөгжмийн зэмсэг болгож, дэлхийд сурталчлахад их хувь нэмэр оруулсан түүхтэй.

Булган сум “Ахмадаа сонсох өдөрлөг”-ийг зохион байгуулллаа

marsbold — Mon, 27 Mar 2017 12:57:17 +0800

Сумын Засаг даргын Тамгын газрын жилийн төлөвлөгөөнд улирал бүрт нэг удаа "Ахмадаа сонсох өдөрлөг”-ийг зохион байгуулахаар тусгасантай холбогдуулан 2017.01.22-ны өдөр тус өдөрлөгийг зохион байгуулллаа. Өдөрлөгөөр сумын удирдлагууд болон холбогдох албан тушаалтнууд ахмад настнуудынхаа санал хүсэлтийг сонсож, хариу өгч ажиллалаа. Энэ оны хувьд сумын Иргэдийн төлөөлөгчдийн хурлаас Ахмадын өргөөний гадна тохижилтонд зориулж 5 сая төгрөгийг төсөвт тусгаад байгаа ба тус ажил тун удахгүй эхэлнэ. Мөн дотоод тохижилтонд иргэдийн оролцоог уриалж Өндөрхошуу багийн Засаг дарга Ж.Батцэнгэл хувийн зүгээс холбогдох эд материалын хандивыг өргөлөө

Булган сумын багийн засаг нарт батламж гардууллаа

marsbold — Thu, 16 Mar 2017 14:37:53 +0800

Багийн Засаг дарга ба түүний ажлын алба бол орон нутгийн өдөр тутмын үйл амьдрал тухайлбал хадлан, тэжээл бэлтгэх, отор нүүдэл, малын урьдчилан сэргийлэх угаалга, тарилга хийх, ноос ноолуур авах, хашаа саравч барих, худаг ус гаргах, тариа ногоо тарих, хураах, өвөлжилтийн бэлтгэл хангах, мал тэжээвэр амьтад, хүн ам, хашаа худгийн тооллого явуулах, нийгмийн хөгжилд иргэдээ татан оролцуулах, иргэдийн санал хүсэлтийг сонсож шийдвэрлэж, зохих шатанд уламжлах зэрэг цаг үеийн болоод өдөр тутмын олон ажлыг гүйцэтгэж иргэд олон нийттэйгээ хамгийн ойр ажилладаг нэгж билээ. Иймд сумын Засаг даргын зүгээс Багийн Засаг дарга түүний ажлын албыг чадавхжуулах, хариуцлагыг нэмэгдүүлэх зорилгоор Өндөрхошуу, Хулсаншанд, Баян-Уул, Чулуут багийн Засаг дарга нарт батламж гардууллаа

Булган сумын Улаанбаатар хот дахь Нутгийн зөвлөлийн золголт

marsbold — Thu, 16 Mar 2017 14:07:25 +0800

Жил бүр уламжлал болгон зохион байгуулагддаг Булган сумын Улаанбаатар хот дахь Нутгийн зөвлөлийн золголт энэ сарын 11 – ны өдөр Улаанбаатар хот Blue sky төвийн хурлын зааланд зохион байгуулагдлаа. Улаанбаатар хот дахь Нутгийн зөвлөлийн дарга Л.Жамбалсүрэн болон Булган сумын Иргэдийн төлөөлөгчдийн хурлын дарга Ж.Эрхэмбаатар, Засаг дарга Д.Базаргүр нараар ахлуулсан ажлын хэсэг болон улсын нийслэлд аж төрж буй Булган нутгаар овоглосон нугтгийн уугуул суугуул иргэд, ахмадууд, оюутан залуучуудын төлөөлөл оролцож Алтан унжлагат хэмээгдэх гал тахиа жилийнхээ золголтыг хийж, өнгөрөгч мичин жилийнхээ ажил үйлс айлчлан ирж буй тахиа жилийнхээ өнгө төрхийг . Арга хэмжээг тохиолдуулан Улаанбаатар хот дахь Дорнод аймгийн нутгийн зөвлөлийн дарга Д.Цогтбаатар, хэдхэн хоногийн өмнө Монгол улсын гавьяат нисгэгч хэмээх эрхэм цолоор энгэрээ мялаасан Нутгийн зөвлөлийн тэргүүлэгч гишүүн Дамбаравжаагийн Оюунболд нарт хүндэтгэл үзүүллээ

Нийгмийн бодлогын хэлтсийн дарга Баяржаргалаар ахлуулсан ажлын хэсэг Булган суманд ажиллаж байна

marsbold — Tue, 14 Feb 2017 14:51:03 +0800

Аймгийн Засаг даргын захирамжийн дагуу Нийгмийн бодлогын хэлтсийн дарга Баяржаргалаар ахлуулсан ажлын хэсэг өвөлжилт хүндэрч, зудын гамшгийн нөхцөлд өвөлжиж буй зорилтот бүлгийн иргэдэд төрөлжсөн мэргэжлийн эмч нарын тусламж үйлчилгээг үзүүлэх, зудын гамшгийн үеийн бэлэн байдал, болзошгүй эрсдлээс урьдчилан сэргийлэх, соён гэгээрүүлэх ажлыг зохион байгуулах зорилгоор ЭМГ, ХХҮХ, ЭМНДХ-ийн мэргэжилтнүүд болон төрөлжсөн мэргэжлийн эмч нарын баг Булган суманд ажиллалаа.
Ажиллах хугацаандаа тус тусын чиглэлээр үйл ажиллагаануудыг зохион байгуулж эрүүл мэнд, нийгмийн даатгалын тухай хууль, тогтоомжийн талаарх мэдээллийг хүргэн, эрүүл мэндийн тусламж үйлчилгээг үзүүлж ажиллаж байна. Аймгийн засаг даргын захирамжаар явагдаж байгаа тус ажил 3 хоног үргэлжлэх бөгөөд ирэх өдрүүдэд хөдөө багийн зорилтот өрхүүдээр зочлож шаардлагатай тусламж үйлчилгээг үзүүлнэ.

Булган сумын иргэн Баян-Уул суманд тусламж үзүүлжээ

marsbold — Wed, 08 Feb 2017 12:01:57 +0800

Булган сумын өндөр настан С.Энхтуяа, 2-р багийн иргэн Д.Цэндсүрэнгийн хамтаар 100-гаруй төлийн уут, элгэвч, нэмнээ, бээлий зэргийг оёж цас зудтай байгаа Баян-уул сум руу тусламж болгон илгээлээ.Тэрээр өмнө нь гал түймэрт орон гэрээ алдсан 2 өрхөд эд материал,сэтгэл санааны дэмжлэг үзүүлж байсан билээ.

Засаг дарга М.Бадамсүрэн Булган суманд ажиллаж байна

marsbold — Thu, 26 Jan 2017 10:08:39 +0800

Өвөлжилтийн нөхцөл байдалтай холбоотойгоор Засаг дарга М.Бадамсүрэнгээр ахлуулсан аймгийн Онцгой комиссын бүрэлдэхүүн Булган суманд ажиллаж байна. Өвөлжилтийн төлөв байдалтай газар дээр нь танилцаж, Онцгой комиссын өргөтгөсөн хурлыг зохион байгуулж, иргэдийн санал бодлыг сонсож, цаашид авч хэрэгжүүлэх ажлын талаар сумын удирдлагууд, онцгой комиссын бүрэлдэхүүнд үүрэг, чиглэлийг өгч ажиллалаа.
Уулзалтын үеэр Засгийн газраас хуваарилсан 1000 боодол өвс, 10 тн хивэг, Улаан загалмайн нийгэмлэгээс олгосон тусламжийг тус тус гардуулан өглөө. Үүний зэрэгцээ аймгийн Онцгой комисоос сумын Онцгой комиссын үйл ажиллагаанд зориулж 3000.0 төгрөгийн тусламжийг олгосон байна.

Сумын төв орчмын бэлчээрийн цасыг хагалах ажлыг зохион байгууллаа

marsbold — Wed, 25 Jan 2017 12:11:23 +0800

Энэ оны өвөлжилтийн байдлын хувьд сумын нутаг дэвсгэрт цасны зузаан дунджаар 19см хунгар газраа 20-25см-тэй буюу Засгийн газрын 2015 оны 286 дугаар тогтоолын дагуу цагаан зудархуу гэсэн үзүүлэлтэнд багтаж байна. Нэн ялангуяа сумын төв түүний эргэн тойронд цасны зузаан илүү их байгаагаас шалгаалан сумын төвөөс бэлчээрт гарах малын хөл халцарч цаашлаад мал бэлчээрт гарахад хүндрэл үүсэх төлөв ажиглагдсан тул сумын зүгээс өөрийн нөөц боломжинд тулгуурлан мал бэлчээрлэдэг гурван чиглэлийн дагуу нийтдээ 62 км газарт хунгарласан цасыг хагалж мал саадгүй бэлчээртээ хүрэх мөр гарган ажиллалаа. Дээрх ажлыг энэ сарын 20-23-ны өдрүүдэд Өндөрхошуу багийн Засаг дарга Ж.Батцэнгэл болон тус багийн иргэн Х.Хатанозориг нар хийж гүйцэтгэсэн ба орчмын айл өрхүүд тус ажилд сэтгэл хангалуун байна

Дулаан баригч яндангууд эзэддээ хүрч байна.

marsbold — Wed, 25 Jan 2017 12:05:54 +0800

Ойрын өдрүүдэд хүйтний эрч эрс чангарч байгаатай холбогдуулан сумын Засаг даргын Тамгын газраас Улаанбаатар хотын GOODSHARING ХХК -тай хамтран агаарын бохирдлоос урьдчилан сэргийлэх, галлагааны темпратурыг уртасгаж, айл өрхийн түлшний зарцуулалтыг хэмнэх зориулалттай дулаан баригч яндангийн захиалгаа авч өнөөдөр 70 өрхөд хүлээлгэн өглөө. Үүнээс гадна өвөлжилтийн байдалтай холбогдуулан Сумын аюулгүй нөөцийн өвс болон Дорнод гурил ХХК-тай гэрээ байгуулж эхний ээлжинд татагдсан 10тн хивгийг малчин өрхүүддээ хуваарилах ажил явагдаж байна.

Тугийн сүмийн туурь /Булган сум/

magnai — Thu, 06 Oct 2016 14:49:40 +0800

Дорнод аймгийн Булган сумын Тугийн хийд Хуучнаар Сэцэн хан аймгийн Саруул гүний хошуу, одоогийн Дорнод аймгийн Булган сумын нутагт,тал хээрийн бүсэд,Туг уулын оройд, Хэрлэн голын урд биед, Дорнод аймгийн Хөлөнбуйр сумын төвөөс зүүн зүгт 40 км-т уг хийд оршиж байжээ. 1919 онд Богд Хаант Монгол улсын Дотоод Хэргийг Бүгд Захиран Шийтгэх Яамны захирамжаар Монгол улсын шаштир зохиох газарт цугласан "Өргөх Цес”-т Үйзэн бэйсийн хошууны Тугийн сүмийн тухай ийнхүү тэмдэглэгджээ:”Дашчойнхорлин хэмээх Тугийн сүм анх байгуулснаас хойш далан долоон жил болжээ. Тугийн сүмийг Туг толгой хэмээх газар анх захын да ван ,Тогтохтөр санаачлан байгуулжээ. Цогчин хурал эдүгээ 25 ламтай , үүний дотор тэргүүн лам нэг , унзад нэг, гэвхүй нэг буй” /Монголын хүрээ хийдийн түүх, Ч.Банзрагч, Б.Сайнхүү, Улаанбаатар 2004/ 1934-38 оны Хүрээ хийдийн судалгаанд Дашчойнхорлин хэмээх Тугийн хийдийг 77 жилийн өмнө То вангийн санаачлагаар байгуулагдсан, сүм, дуган 2, дацан 1, 25 ламтай, Цогчэн дугантай, хөрөнгө хогшлын хувьд нэг жастай, байшин 5, эсгий гэр 1-тэй байсан бөгөөд 1937 оны 8-р сарын 25-нд сайн дураар тарж хийд хаагдсан хэмээн тэмдэглэжээ. Аман эх сурвалжид:"Чингисийн шүтээний сүм буюу-Тугийн сүм:Ачитын хошууны ноён Цэрэндоржийн Минжүүдорж /1806-1866/,Саруулын хошууны ноён Жамсранжавын Дарамжав /1825-1869/ нарын үед Саруулын хошууны Баян-Эрхт хавийн ардууд мал хунаргүй шахам болж маш ядуурч амьдрахын аргагүй боллоо харж үзээч гэсэн хүсэлт өргөдөл Сэцэн хан аймгийн Хэрлэн барс хотын Чуулган газарт ирсээр байсан тул хоёр түшмэл явуулж газар дээр нь үзэхэд тэр хавийн айлуудын ихэнх нь уранхай цоорхой бүрээстэй, умгар хар гэрүүдтэй, гадна 5-10 хонь ямаатай, ганц хоёр үнээ, унааны ганц хоёр мориноос өөр юмгүй үнэхээр ядуурсныг чуулган даргад илтгэжээ. Чуулган дарга чин ван Тогтохтөр төрөлхийн ухаалаг зан, ард түмний зан заншил, шүтлэг бишрэлийг түшиглэн урьд нь олон газар сүм хийд байгуулж, Халхын голын эрэгт Жанрайсаг бурхан бүтээж, өөрийн хошуундаа / Илдэн Жон вангийн хошуу/ сургууль байгуулах, эдийн засгийн элдэв аргаар ард түмнийхээ амьдралыг дээшлүүлж байсан туршлагаа үндэслэн Баян-Эрхт хавийн ядуучуудын амьдралд туслах нэг арга сэджээ. Хамаг монголын үеэс уламжлалтай Хараа ихт хар туг нь дайн байлдаан болон гай гамшиг зэргийг зайлуулан дарах зорилгоор тахилга догшруулалт үйлддэг байсныг мэддэг ч байсан байж болох юм. үүнээс санаа авч ядуурлын гай гамшигаас ард түмнээ аврахын тулд Баян-Эрхтэд эзэн Чингисийн хар сүлдний элч сүлд буюу хувилбарыг залах , Чингисийн шүтээний сүм байгуулж, түүний жас хөрөнгийг түшиглүүлэн тэр хавийн ядуучуудыг ажил амьдралтай болгохоор Баян-Эрхт дээр эзэн Чингисийн хар сүлд бүхий сүм байгуулна гэж Минбэйсийн хошуу, Саруул гүний хошуу даяар зарлаж хандив өгөхийг хүсчээ. Ингээд эзэн Чингисийн сүнс сүлд болон монгол түмнийг даян дэлхийд цуурайтуулсан нэр төртэй хар сүлдийн элчийг өөрийн нутагтаа залах аз завшаан тохиолдсонд бэлэгшээсэн тус хошууны ядуу буурай ардаас эхлэн баячууд, ноёд түшмэд хүртэл бүхий л бололцоогоо дайчлан хандив өргөж богино хугацаанд асар олон мал хөрөнгө цугларчээ. Тугийн сүмийн жасад хандиваар цугласан олон суурь хонь, адуу, үхрийг маллах ахлах, туслах малчид, малын үс ноос авч сур дээс бэлтгэх, арьс элдэх, сүү цагаа боловсруулах, малчдын гэр тэрэг бэлтгэх дархчууд сүмд суух хориод ламд үйлчлэх гээд олон тооны ядуучууд ажил амьдралтай болж олон хүний ажлын байр бий болгосон ажээ. Тугийн сүмийг анх монгол хятад нийлсэн баахан хүмүүс Чингисийн тугийг тахих сүмийг хаа байгуулах вэ гээд газар үзэж явжээ. Тэгсэн нэг хурга хариулсан хүүхэд явж байсан. Нэрийг нь хэн гэдэг вэ гэж асуусан Баян эрхт гэдэг гэсэн. Энэ их сайхан нэртэй хүүхэд таарлаа гээд тэр толгой дээр чавга тавьчихаад явсан. Тэгээд баахан монгол хятад нийлсэн хүмүүс ирээд туйпуу цохиж эхэлсэн. Тэгээд туйпуу цохиж цохиж сүм хийдээ барьж эхэлсэн гэдэг домгийг нутгийнхан ярьдаг юм. Анх байгуулагдахад Саруулын хийдээс 8 лам, Зүүн хийдээс 8 лам нийт 16 ламтайгаар хурал хурж эхэлсэн бөгөөд сүүлдээ дотроосоо хүүхэд багачууд нь лам болоод ламын нийт тоо нь 50, 60 хүрч байсан байна. Тугийн орой дээр байсан шүтээний сүмд 15 барималтай ба Чингис хаан, 9 өрлөгтэйгээ байсан. 9 өрлөг нь сэлмээ сугалдаг. Нүд нь хөдөлдөг байжээ. Голд нь эзлэгдсэн улсуудын хүмүүс Чингис хаанд эд зүйлс өгч буй зураг байсан Сүмийн хэлбэр нь дөрвөлжин дээрээ нэг давхартай. Давхар сүмийн орой дээр нь Чингисийн туг байсан.Мөн үүнээс гадна толгойн энгэрт зүүн урд дор хоёр дуган байжээ. Хурал номын хувьд өөрийн тугийн тахилгатай мөн Цогчэн уншлагатай, зунд тахилга тайлга хийдэг байжээ. Хурал хураад овоогоо тахиад бөх барилдаж морь уралдан наадам хийдэг байжээ. Тугийн хийдийн жасын хувьд нэлээд баян жастай байсан гэдэг. Учир нь хандиваар их мал цугласан ажээ. Хийдийн мяндагтангуудын хувьд тэргүүн лам нь Ёндон лам унзад нь Чойндон унзад гэж байсан. Хамгийн сүүлчийн гэсгүй нь Чойёон гэдэг лам байжээ. 1937, 1938 онд лам нарыг бариад, баригдаагүй нэг нь тараад явчихсан бөгөөд 1939 онд хийдийг буулгасан. Тэр олон баримлууд нь хаалгаар багтаж гарахгүй, эвдэж гаргаад нүхэнд хийж булсан юм. Сүүлд доод сүмийг нь дэлгүүр, дээд шүтээний сүмийг нь түүхий эдийн склад болгосан байсан. 1940 хэдэн онд чулуу, тоосгоор нь малын хашаа барьж бүрэн буулгаж дуусгасан. Холбогдох эх сурвалж -Монголын хүрээ хийдийн түүх, Ч.Банзрагч, Б.Сайнхүү, Улаанбаатар 2004 -Дорнод аймгийн хураангуй түүх, А.Дамдинсүрэн, Чойбалсан 2001 -Дорнодын болор толь, 2006 -Гомбын Содовын ярилцлага (Дорнод аймгийн Булган сумын өндөр настан. 1921 онд төрсөн) -Манхилаг овогт Алтангэрэлийн Гүрбямбаагийн ярилцлага(Дорнод аймгийн Чойбалсан хотын өндөр настан. 1933 онд төрсөн) -Хайдавгэлэгийн Чулуунбаатарын ярилцлага( Дорнод аймгийн Булган сум. "Туг”ХХК-ны захирал. 1953 онд төрсөн)

Эх сурвалж: Discover-Dornod.mn

Булган сумын сар шинийн золголт өнөөдөр болно

magnai — Thu, 18 Feb 2016 10:33:53 +0800

Дорнод аймгийн Булган сумын Улаанбаатар хот дахь Нутгийн зөвлөлийн бичин жилийн сар шинийн золголт 2016 оны 2-р сарын 19-ний баасан гарагт 17 цагаас Bluesky төвийн 3-р давхарт болох тул ахмадууд, нутгийн зон олон та бүхнийг хүрэлцэн ирэхийг урьж байна.

Дорнод аймгийн Булган сумын ЗДТГ
Улаанбаатар хот дахь Булган сумын Нутгийн зөвлөл

Холбоо барих утас: 99111639

dornod.net

сар шинийн баярт зориулсан арга хэмжээг Булганчууд тэмдэглэн өнгөрүүллээ.

marsbold — Thu, 04 Feb 2016 12:44:55 +0800

XVII-р жарны "Муу нүүрт” хэмээх гал бичин жилийн сар шинийн баярт зориулсан арга хэмжээг Булганчууд 2016 оны 02 сарын 03 ны өдөр өргөн дэлгэр сайхан тэмдэглэн өнгөрүүллээ.
Өнгөрсөн онд Булган сумаас
Аймгийн Засаг даргын жуухаар
Эрүүл мэндийн төвийн жолооч Х.Идэрбаатар
Соёлын төвийн бүжгийн багш Д.Ганчимэг
Хүүхдийн цэцэрлэгийн галч Э.Жавхлантөгс

Аймгийн сайн малчин
1. 2 дугаар багийн малчин Д.Оюунсүрэн
2. 4 дүгээр багийн малчин Ш.Ганхүү

Сумын сайн малчин
1. Сүхбаатар ЭНХЖАРГАЛ 2 дугаар багийн малчин
2. Ядамсүрэн ТӨМӨР 3 дугаар багийн малчин
3. Дувдай ГАНБАТ 4 дүгээр багийн малчин

Сумын алдарт уяач
Жүгдэрнамжил ГАНТУЛГА 2 дугаар багийн уяач
Батсүх ЭРДЭНЭБИЛЭГ 3 дугаар багийн уяач
Цэдэндамба БАТЖАРГАЛ 4 дүгээр багийн уяач
Мянгат малчин
1. Нацагдорж ОЮУНЗУЛ 3 дугаар багийн малчин
2. ×улуунбаатар ГАНЗОРИГ 4 дүгээр багийн малчин
3. Айлтгүй ДАРХИЖАВ 4 дугаар багийн малчин

Засаг даргын нэрэмжт шагнал
Батсүх ОТГОНБАТ 2-р дугаар багийн малчин
Цэрэнчимэд ГАНХҮҮ 3-р дугаар багийн малчин
Бүрэн НАРАНБААТАР 4-р дүгээр багийн малчин

XVII-р жарны "Муу нүүрт” хэмээх гал бичин жилийн сар шинийн баярт зориулсан цолгүй залуу бөхийн барилдаанд 32 бөх барилдаж
2-р багийн залуу бөх Д.Баваасан түрүүлж,
3-р багийн залуу бөх Анхсүх үзүүрлж
1-р багийн залуу бөх О.Энхтайван,
4-р багийн залуу бөх Ц.Баттөр нар шөвгөрлөө.
Тус барилдааныг сумын заан А.Ганзориг, Чулуут багийн мянгат малчин А.Дархижав нар ивээн тэтгэж Засаг даргын Тамгын газар, Тухтай заан бөхийн холбоо амжилттай зохион байгууллаа.

XVII-р жарны "Муу нүүрт” хэмээх гал бичин жилийн сар шинийн баярт зориулсан аймаг, сумын цолтой болон залуу бөхчүүд оролцсон бөхийн барилдаанд 40 бөх барилдаж
Дорнод аймгийн Булган сумын харьяат А/З Г.Шинэзориг түрүүлж
Дорнод аймгийн Булган сумын харьяат А/НН Г.Эрхэмбаяр үзүүрлэсэн
Дорнод аймгийн Цагаан-Овоо сумын харьяат А/А Г.ТүмэнжаргалДорнод аймгийн Гурванзагал сумын харьяат Б.Булгантамир Дорнод аймгийн Булган сумын харьяат С/З А.Ганзариг нар 3-4 байранд шалгарлаа.
Тус барилдааныг Чулуут багийн мянгат малчин Ч.Ганзориг ивээн тэтгэж Засаг даргын Тамгын газар, Тухтай заан бөхийн холбоо амжилттай зохион байгууллаа.

МОНГОЛ УЛСЫН "БУЛГАН" НЭРТЭЙ НЭГ АЙМАГ "БУЛГАН" НЭРТЭЙ ЗУРГААН СУМ БАЙНА

tonshuul — Thu, 04 Feb 2016 00:29:42 +0800

МОНГОЛ УЛСЫН "БУЛГАН" НЭРТЭЙ НЭГ АЙМАГ "БУЛГАН" НЭРТЭЙ ЗУРГААН СУМ БАЙНА. ТЭД ДОЛООН БУРХАН ШИГ БАЙРЛАДАГ БАЙЖ БОЛОХ ЮМ.

1. Булган аймаг
2. Архангай аймгийн Булган сум
3. Баян-Өлгий Булган сум
4. Булган аймгийн Булган сум
5. Дорнод аймгийн Булган сум
6. Өмнөговь аймгийн Булган сум
7. Ховд аймгийн Булган сум
Тэд хоорондоо шүтэлцээтэй юу? Булган нэртэй сумдууд хоорондоо холбоо тогтоож, хамтарч ажиллаж боломж бий. Нутгийн удирдлагууд санаачилга гарган, хамтран ажиллахыг хүсье.

Дашнамжил Цогтбаатар

МОНГОЛ УЛСЫН ШАТРЫН ГОЛОМТ НУТАГ-

tonshuul — Thu, 04 Feb 2016 00:28:48 +0800

МОНГОЛ УЛСЫН ШАТРЫН ГОЛОМТ НУТАГ-- ДОРНОД АЙМГИЙН БУЛГАН СУМ. МОНГОЛ УЛСЫН ТҮҮХЭНД АНХ УДАА ДОРНОД АЙМГИЙН БУЛГАН СУМАНД 2014 ОНД ШАТРЫН ХӨШӨӨ БҮТЭЭН БОССОН ТҮҮХТЭЙ.

1930-аад онд Монгол Улсад нийтийн болон монгол шатрын албан бус улсын тэмцээн болсон байна. Дорнод аймгийн Булган сумын харъяат Ёндон-Осор гуай хоёуланд нь түрүүлсэн байдаг. Ёндон-Осор гуай: "Нийтийн шатар гэдэг чинь "монгол шатар" юм байн шүү дээ " гэж хэлээд явсан гэдэг.
Монголын анхдугаар спартикиад, шатрын спортын улсын аваргаар Дорнод аймгийн Булган сумын харъяат Тээврийн яамны анхны сайд Дамдины Намсрай ууган аварга болж, спортын мастер болсон байна. Түүнээс хойш Дорнод аймгийн Булган сумын харъяат Жүгдэр, Пүрэвжав нар шатрын улсын аварга, спортын мастер болсон билээ. өөрөөр хэлбэл нэг сумаас дөрвөн бэрх шатрын спортын мастер төржээ. 2014 онд Дорнод аймагт 4 аварга, 4 бэрх шатрын тэмцээн амжилттай зохион байгуулсан юм. "БОГООН” НАМСРАЙ

Дорнод аймгийн Булган сумын 70 жилийн ой тэмдэглэх тухай дуулиан дэгдэж эхлэх үеэс л Чойбалсан, Улаанбаатар хотод буй нутгийн иргэдтэй уулзаж учрах талаар яригдаж эхэлсэн. Орон нутгаасаа дээгүүр тушаалын алба хашиж явсан хүмүүсийг нэлээд онцлож авч үздэг нь нэг ёсны моод болсон бололтой. Ингэж л анх Д.Намсрай гуайг мэдэж авсан. Миний олж мэдсэнээр Намсрай гуай их л сонин, содон, товчоор хэлэхэд их ховор хүн байжээ. Өнөө байвал 88 настай байх энэ хүний тухай түүний гэргий У.Диваа гуай болон хүүхдүүдтэй нь хөөрөлдөж, бага бус зүйл тодруулж авсанаа уншигч та бүхэнтэйгээ хуваалцъя.

ТӨРИЙН САЙД Д.НАМСРАЙ

Дамдины Намсрай 1907 онд Дорнод аймгийн Булган сумын нутагт төрж, эцэг эхийн асрамжид бойжжээ. Тус сумын ахмадууд үр хүүхдээ багаас нь бичиг номонд сургаж, дэг журамтай хүмүүжүүлдэг тогтсон заншилтай байсны дагуу Д.Дамдин гуай өөрийн хүүг нутгийн эрдэмтэй улсаар багшлуулж бичиг үсэгт сургажээ. Саруул гүний хошууны тамгын газарт тал, жинхэнэ бичээчээр суулган бичиг үсгийн чадварыг ахиулсан тул 18 настайд нь шалгаруулж, Хан Хэнтий уулын аймгийн эвлэлийн хороонд бичээчээр томилон ажиллуулжээ. 20 настайд нь 1927 оны намраас Баянтүмэн хан уулын хошууны эвлэлийн товчлох хорооны нарийн бичгийн даргаар дэвшүүлж ажиллуулав. Нэг жилийн дараа Хан Хэнтий уулын аймгийн эвлэлийн хорооны тэргүүлэгч бөгөөд шалган байцаагчаар томилжээ. 1929 оны зургадугаар сарын 1-нээс Баянтүмэн хан уулын хошуу (одоогийн Дорнод аймаг)-ны даргаар ажиллуулж, 1930 оны дунд үеэс Оцолсансар уулын хошуунд эвлэлийн ажлын тусгай төлөөлөгчийн үүрэг гүйцэтгүүлжээ. 1931 оноос Улаанбаатар хотод очиж, Хоршоодын төв холбооны бичиг хэргийн эрхлэгч, Үйлдвэр комбинатын барилгын ажилчин хийж байгаад төрсөн нутаг Дорнод аймгийн Булган сумын даргаар 1932 оны зургадугаар сарын 15-наас эхлэн хоёр жил 3 сар ажиллажээ. 1934 оны намраас Дорнод аймгийн намын хорооны суртлын хэлтсийн эрхлэгчээр ажиллаж байгаад 1937 онд Москва хотын Дорно дахины судлалын институтэд суралцахаар оджээ. Сургуулиа төгсч ирмэгц 1940 оны намраас шинэ Монгол Улсын Тээврийн яамны анхны сайдаар томилж, уг албыг 8 жил гаруй хашжээ. Энэ үе нь Монгол оронд орчин үеийн тээврийн салбарыг бэхжүүлэх, хуучны өртөө улааг бүрмөсөн халах, зам тээврийн сүлжээ зангилаа бий болгох, улс орны өнцөг булан бүрт авто хөсгийн үйлчилгээ хүргэх, галт тэрэг, нисэх онгоцны буудал өртөө байгуулах, өргөтгөн бэхжүүлэх, цэргийн зориулалтыг иргэний хэрэгцээнд шилжүүлэх гээд нөр их өргөн цар хүрээтэй ажлын үе байлаа. Тэрбээр энэ бүхнийг хийж явснаас гадна олон нийтийн ажил, уралдаан тэмцээнд оролцож, юм юмыг амжуулж гүйцэтгэж байсан гайхам ажилсаг, нийтэч шинж чанартай хүн байв. Чухамхүү уг албыг хашиж байх үедээ "Богоон” хочийг олсон бололтой. Төмөр замын байгууллагыг бий болгох бэхжүүлэх хэрэгт түүний оролцоо ямархан үүрэг гүйцэтгэснийг үүнээс ойлгож болох мэт. Үүний дараагаар МҮЭГ-ийн төв зөвлөлд нийгмийн даатгалын хэлтсийн эрхлэгч, МБТС-ийн хороонд шатрын секцийн эрхлэгч, МҮЭ-ийн Төв Зөвлөлд архивын эрхлэгч зэрэг ажил хийж байгаад 1967 оны аравдугаар сард өвчний улмаас групп тогтоолгож, 1969 онд нас баржээ. Эхнэр У.Диваа нь нэрт зохиолч С.Удвал агсны төрсөн дүү бөгөөд ханиа өнгөрөх үед найман хүүхэдтэй үлджээ. Одоо тэд насанд хүрч, У.Диваа гуай ач, зээ нарынхаа хөлд дарагдан гэртээ сууж байна. "Манай өвгөн чинь хүнд уурлаж үзээгүй хүн шүү дээ. Өнгөрхийнхөө урьд жилээс нутгаа их ярьдаг болсон. Хамгийн бага охиноо өвөртлөөд Булган Норовлингоороо явж, Хэрлэн голынхоо усанд орно” гэж ярьдаг. Харин "Нутаг руу нь явуулаад нэг зун ярьснаар нь сайхан амраасан бол дахиад хэдэн жил амьд мэнд байх ч байсан юм билүү” гэхэд нь хэлэх үг олдоогүйдээ.

ШАТРЫН СПОРТЫН МАСТЕР, ЧЕМПИОН НАМСРАЙ

Манай Булган сум өвөрмөц онцлогтой нутаг. Миний мэдэхээр Хөвсгөл аймгийн Цагаан-Үүр сум нь бөхчүүдээрээ алдартай бол бид шатраараа бахархадаг. Алдарт шатарчин, спортын мастер И.Ёндон-Осор, Д.Намсрай, Ц.Жүгдэр, Ш.Пүрэвжав, дэд мастер П.Дорждэрэм нар орно. Тэдний дотроос Монгол Улсын анхдугаар чемпион, спортын мастер Д.Намсрай гуайг илүү онцлон авч үзэх учиртай. Түүний бичиг баримтыг үзэж байхад доорхи үнэмлэх гарч ирэв.
"БНМАУ-ын шатрын чемпион. Үнэмлэхийн дугаар 1.
Нөхөр Дамдин Намсрай Улаанбаатар хотод 1948 оны 2 дугаар сарын 29-нд болсон улсын хэмжээний тэргүүн шатарчдыг шалгаруулах анхдугаар (чемпионат) их тэмцээнд оролцож шалгарсан тул БНМАУ-ын шатрын чемпион гэдэг алдар цол шагнаж үнэмлэх олголоо.
Ардын Сайд нарын Зөвлөлийн дэргэдэх Улсын Биеийн тамир ба спортын хэрэг эрхлэх хорооны дарга Нямцэрэн”
гэжээ.
Энэ үеэс улсын аврага болсон шатарчдад спортын мастер цол олгож эхэлсэн бөгөөд Д.Намсрай гуай анхдагч болжээ. Тэрбээр II чемпионатад II байр эзэлж костюм нэг хос, торгон сорочик цам нэг, 6931 дугаарын калибрь буугаар, VI чемпионатад III байр эзэлж, унадаг дугайгаар шагнагдаж байв. 1950-1953 онд Улаанбаатар хотын аварга шалгаруулах тэмцээнд тус бүр 17 тоглож, 14 хожлоор чемпион (аварга) цол хүртсэн бөгөөд 1940 оноос хойш улсын хэмжээний томоохон тэмцээнд тогтмол оролцож, 8 удаа түрүүлж байжээ. Улсын аварга шалгаруулах тэмцээнд найман удаа оролцож, 1-11 дүгээр байр, манай улсад болон ЗХУ-д болсон олон улсын шатрын тэмцээнд оролцож, 8-12 дугаар байр эзэлж байв. Шатарт туйлын хорхойтой төрийн нэрт зүтгэлтэн Ж.Самбуу агсан ЗХУ-д суугаа Онц бөгөөд Бүрэн эрхт элчин сайд байхдаа Монгол улсаас буцаж Москва орохоор явах үедээ Д.Намсрай гуайтай суудал таарч, замын турш тоглож, 43 удаа хожигдооод, "Москва чинь ийм ойрхон болчихоо юу?” гэж дуу алдсан гэдэг нь шог яриа биш, үнэн гэдэг. Ямар ч болсон Намсрай Монгол улсын шатрын түүхэнд өөрийн нэрээ мөнхлөн үлдээсэн авъяаслаг шатарчин байлаа.

ҮНДЭСНИЙ СУРЫН СПОРТЫН МАСТЕР, УЛСЫН
МЭРГЭН НАМСРАЙ

Дорнод аймгийн Булган сум шатарчдаас гадна үндэсний сурын мэргэн харваачдаар алдартай юм. Гэтэл өнөөдөр үнэр ч алга. Нутгийн харваачдын алдрыг улсын наадмын торгон дэвжээнд өргөж ирсэн нэгэн үеийн хоёр харваач "Банк”-ны хэмээн алдаршсан Т.Балдан, "Богоон” Д.Намсрай хоёр 1940-1960-аад оны дунд үе хүртэл эрхий мэргэнээ сорьж байлаа. Намсрай гуай улсын чанартай сурын тэмцээнд амжилттай оролцож байсан бөгөөд гэрт нь хадгалагдаж буй бүрэн бус баримтаас үзэхэд 1943 оны улсын баяр наадмын сурын тэмцээнд II байр эзэлж, 1965 он хүртэл байнга харваж байжээ. Монголын сурын холбооноос лавлавал нарийн тодруулах боломжтой юм даа гэж надад санагдаж байсан. Эдгээр баримтаас үзвэл Д.Намсрай 1943, 1949, 1951, 1957 оны улсын баяр наадмын сурын тэмцээнд тус бүр II байр эзэлж, 1951 онд улсын мэргэн цол, 1964 оны наймдугаар сард Өмнөговь аймагт болсон сурагчдын уулзалтад шагналт байр эзэлж, 1946 онд наадмын комисст идэвхтэй сайн ажилласан тул маршал Х.Чойбалсангаас бугуйн цагаар шагнагдаж байв. Орчлон хорвоод хүний сайн нь, сайхан нь түрүүлж буцдаг хяслантай юм хойно, даан ч сайхан харамсмаар хүн болох Д.Намсрай гуай бас л цагаас эрт одсон байх юм. Хэнд ч хэрэггүй, үгүйлэгддэггүй элдвийн хүмүүс урт насалж болоод байхад хэн хүнд хэрэгтэй, одоо ч үгүйлэгдсээр байгаа "Богоон” Намсрай гуай бидний дунд алга даа.

ДУРСАХ НЬ

Энэ хүн өнөр нэгэн бүлийн тэргүүн байлаа. Түүнийг үр хүүхэд хань ижил нь үгүйлнэ. Монгол улс үгүйлнэ. Төрсөн нутаг ус нь үгүйлнэ. Төрж өссөн нутаг нь, угаасан ус нь, харж өссөн цэлмэг хөх тэнгэр нь, шүтэж байсан уул, овоо нь байна. Бүтээж үлдээсэн үйл хэрэг нь байна. Тээвэр байгаа цагт түүний үйлс бүдгэрэх ёсгүй. Монгол Улсын Дэд бүтцийн яам ч мартах учиргүй. Д.Намсрай гуайн төрсөн дүү Д.Должин өнөө ч амьд мэнд 84 наслаад байна. Хорвоод амьд явах гэгч, жаргал зовлон гэдэг, хэн нэгийгээ онцлон энэрч, бас өрөвдөн хайрладаггүй гэдгийг энэ буурал мэдэж мэдэрч л яваа юм билээ. Миний нутгийн нэгэн тасархай шүү дээ. Бид л тус дэм болох учиртай юмсан даа. Би харамсан дурсаж сууна. Бид харамсан дурсах л учиртай. "Богоон” Д.Намсрай гэдэг энэ ажилсаг дөлгөөн хүн вагон вагоноор авчран асгавч багадах их үйлсийн эхлэлийг тавьж, өөрөө ч ийм хоч олж авсан хүн. Үйлс нь мөнх байх болтугай.

Дашнамжил Цогтбаатар

Булган сумын түймэрт 2 автомашин шатжээ

munkhbat — Fri, 02 Oct 2015 12:08:17 +0800

Энэ долоо хоногт Дорнод аймгийн Булган сумын нутгаар хоёр түймэр гарлаа. 9-р сарын 29-ний өдөр тус сумын 3 дугаар багийн нутаг "Хайчин” гэдэг газар хээрийн түймэр гарсан бөгөөд аймгийн Онцгой байдлын газар болон орон нутгийн 40 хүн оройн 19 цагийн үед бүрэн унтраажээ.

Мөн өдрийн 17 цагийн үед Булган сумын 3 дугаар багийн нутаг "Цагаан өндөр” гэдэг газар /сумаас баруун тийш 15 орчим км-т/, хээрийн түймэр гарч, иргэдийн автомашин шатсан байна. Тухайлбал Хэрлэн сумын иргэн Э-ийн жийп маркийн автомашин, мөн сумын иргэн Т-ийн аксент маркийн автомашинууд түймэрт өртжээ. Уг түймрийг Онцгой байдлын газрын 12 албан хаагч, 1 автомашин, орон нутгийн 90 иргэн, 20 автомашин, нийт 102 хүн, 21 техник хэрэгсэлтэйгээр ажиллаж, 2015.09.29-ний өдрийн 19:50 цагт түймрийг цурманд оруулан 20:10 цагт бүрэн унтрааж сумын Засаг даргад хүлээлгэн өгсөн байна.

Дорнод аймагт хонины цэцэг өвчин гарчээ

munkhbat — Thu, 07 May 2015 15:45:16 +0800

Дорнод аймгийн Баянтүмэн, Булган сумын долоон малчны суурьт гоц халдварт хонины цэцэг өвчин гарсан. Тиймээс өвчин тархаж болзошгүй бүс нутагт хорио цээрийн дэглэм тогтоож, урьдчилан сэргийлэх тарилга хийж байна. Өнөөдрийн байдлаар өвчин эдгэрэлтийн байдалтай болж, малын хорогдол зогсож, дэглэмийн шатлалыг бууруулж эхэлсэн байна.

Дорнодын уулчин М.Дархижав Эльбрус ууланд амжилттай гарчээ

magnai — Wed, 06 May 2015 12:27:02 +0800

Дорнод аймгийн Булган сумын харъяат, Спортын мастер, уулчин М.Дархижав Европ тивийн ноён оргилд гарах гэж байгаа тухай бид мэдээлж байсан билээ

Талхын Лувсан заан

magnai — Sun, 19 Apr 2015 11:20:09 +0800

Хуучин Цэцэн Хан аймгийн Санбэйсийн хошуу одоогийн Дорнод аймгийн Булган сумын харъяат Талхын Лувсан заан гэгч нэгэн сайхан бөх байжээ.

Б.Сандагдорж багш "хөдөлмөрийн гавъяа"-ны одонгоор энгэрээ мялааллаа

munkhbat — Thu, 02 Apr 2015 09:50:53 +0800

Б.Сандагдорж нь Дорнод аймгийн Булган сумын харьяат бөгөөд 1970-1974 оны хооронд УБДС-ийн физикийн багш мэргэжлээр төгсөөд өөрийн төрлөх аймгийнхаа нэгдүгээр арван жилийн сургуулийн Физикийн багшаар 40 жил ажиллалаад гавьяаныхаа амралтад гарсан. Улсын тэргүүлэх багш цол тэмдэгээр энгэрээ мялааж байсан билээ. Тэгвэл түүний хөдөлмөрийг төр засаг өндрөөр үнэлж "ХӨДӨЛМӨРИЙН ГАВЬЯА"-ны одонгооор шагнасан байна.

Эх сурвалж WWW.CHOIBALSAN.MN