Хууль хүчний байгууллага - www.Choibalsan.mn

ЦАГДААГИЙН АЛБА ХААГЧИД ТАНГАРАГ ӨРГӨЛӨӨ

marsbold — Wed, 29 Mar 2017 10:46:20 +0800

Цагдаагийн албаны тухай /шинэчилсэн найруулга/ хуулийн 9 дүгээр зүйлийн 9,1 дэх хэсэгт цагдаагийн тангараг шинэчлэгдэн батлагдсантай холбогдуулан алба хаагчдыг тангараг өргүүлэх, хуулийн эх бичвэрийг хүлээн авах ёслолын ажиллагаа 2017 оны 03 дугаар сарын 28-ны өдөр Мягмар гарагийн 11 цаг 40 минутанд Морин цагт Цагдаагийн газрын жагсаалын талбай дээр зохион явагдлаа.

Ёслолын ажиллагаанд Аймгийн Засаг даргын орлогч Ч.Ганбат, Хууль, эрх зүйн хэлтсийн дарга Б.Алтансүх, цагдаагийн ахмад ажилчид, иргэд урилгаар оролцсон бөгөөд Цагдаагийн албаны тухай хуулийн эх бичвэрийг цагдаагийн газрын дарга, цагдаагийн дэд хурандаа Л.Ариунбат хүлээн авч, ёслолын үйл ажиллагаа төлөвлөгөөний дагуу амжилттай явагдаж дууслаа.

Арга хэмжээг орон нутгийн "ТV6”, "Дорнод”, "Мижи” телевиз зэрэг хэвлэл мэдээллийн хэрэгслээр иргэд олон нийтэд сурталчлан ажилласан байна.

Гэмт хэргийн шинжтэй гомдол, мэдээлэл 36,9 хувиар буурчээ

marsbold — Mon, 13 Feb 2017 11:53:22 +0800

Өнгөрсөн 14 хоногийн байдлаар Цагдаагийн газар жижүүрийн шуурхай албанд нийт 281 дуудлага, мэдээлэл хүлээн авчээ. Үүнээс захиргааны зөрчлийн шинжтэй дуудлага 78%, гэмт хэргийн шинжтэй дуудлага 10%, бусад дуудлага 12%-ыг тус тус эзэлж байгаа талаар Цагдаагийн газрын хэв журмын тасгийн дарга, дэд хурандаа Ц.Одчулуун даваа гарагийн Удирдах ажилтны шуурхай хуралдааны үеэр мэдээллээ. Гэмт хэргийн шинжтэй дуудлага мэдээлэл дотор иргэний өмчийн хулгай дийлэнх хувийг эзэлж байгаа бол захиргааны зөрчлийн шинжтэй дуудлага мэдээлэлд жижгээр танхайрсан хэрэг давалгайлж байна. Өмнөх 14 хоногтой харьцуулахад гэмт хэргийн шинжтэй гомдол мэдээлэл 36,9 хувиар буурчээ. 6 дугаар багийн тухайд согтуугаар зөрчил гаргаж саатуулагдсан тохиолдол хамгийн их байна. Түүнчлэн гэмт хэргийн шинжтэй гомдол мэдээлэл баасан гарагт хамгийн их бүртгэгджээ.

Аймгийн ЗДТГ-ын Олон нийттэй харилцах алба

ЦАГДААГИЙН ГАЗАР ИРГЭДЭД 2016 ОНЫ ҮЙЛ АЖИЛЛАГААНЫ ТАЙЛАНГ ТАВИЛАА

marsbold — Fri, 13 Jan 2017 18:42:16 +0800

Цагдаагийн албаны тухай хуулийн 14 дүгээр зүйлийн 14.1 дэх хэсгийн 14.1.2, 14.2 дахь хэсэг, Хууль зүйн сайдын 2014 оны А/89 дүгээр тушаалаар баталсан "Иргэний зөвлөл, оршин суугчдад цагдаагийн байгууллагын тайлан тавих журам”-ын дагуу харьяалах Иргэний зөвлөл, оршин суугч иргэдэд үйл ажиллагааныхаа тайланг төвлөрсөн байдлаар танилцуулах, санал хүсэлтийг сонсож цаашид авч хэрэгжүүлэх ажлыг тодорхойлох зорилгоор 2017 оны 01 дүгээр сарын 12-ны өдөр тус Цагдаагийн газрын хурлын танхимд тайлан танилцуулах арга хэмжээг зохион байгууллаа.
Тайлангийн арга хэмжээнд аймгийн Хууль эрх зүйн хэлстийн дарга Б.Алтансүх, цагдаагийн байгууллагын үйл ажиллагаанд олон нийтийн хяналт тавих үүрэг бүхий Иргэний зөвлөлийн дарга Б.Өлзийбаян, Хэрлэн сумын Захиргаа удирдлагын хэлтсийн дарга, Хууль эрх зүйн хэлтсийн мэргэжилтэн, 10 багийн 70 гаруй иргэд оролцсон бөгөөд үйл ажиллагаагаа иргэдэд сурталчилан, урьдчилан сэргийлэх чиглэлээр санамж, сэрэмжлүүлэг, зурагт хуудсыг тарааж ажиллаа.
Цагдаагийн газрын тасаг албад 2016 онд хийж гүйцэтгэсэн ажлын талаар товч танилцуулга хийсэн бөгөөд Хууль эрх зүйн хэлтэс, Иргэний зөвлөл, Цагдаагийн газар иргэдтэй цаашид хэрхэн хамтран ажиллах талаар санал бодлоо солилцсон байна. Цагдаагийн үйл ажиллагаатай холбоотой санал асуулгыг иргэдээс амаар болон бичгээр хүлээн авч, Цагдаагийн газрын дарга, цагдаагийн дэд хурандаа Л.Ариунбат шийдвэрлэх, хамтран ажиллах талаар зохих хариултыг тус тус өгөв.
Арга хэмжээний төгсгөлд иргэдэд зориулж Цагдаагийн газрын түүхт 80 жилийн ойн арга хэмжээний талаар видео бичлэг үзүүлж, алба хаагчид урлагын хэсэгчилсэн тоглолтыг сонирхууллаа.

Дорнод аймгийн Прокурорын газраас аймгийн Цагдаагийн газарт шаардлага хүргүүлжээ

marsbold — Tue, 13 Dec 2016 18:07:11 +0800

Дорнод аймгийн Прокурорын газраас аймгийн Цагдаагийн газрын Замын цагдаагийн тасгаас бусад захиргааны зөрчлийн хэрэг бүртгэх, эрх бүхий албан тушаалтнуудаас явуулж буй захиргааны зөрчлийн хэрэг бүртгэлтийн ажиллагаа хууль, тогтоомжид хэрхэн нийцэж байгааг I-III дугаар улирлын байдлаар шалгалаа.
Захиргааны зөрчлийн хэрэг бүртгэлтийн ажиллагаа явуулсан 35 эрх бүхий албан тушаалтны шалгасан 2732 материалыг татаж, захиргааны шийтгэвэр ногдуулсан шийдвэр, материал нэг бүрийг хянаж, судалгаа гаргаж, холбогдох албан тушаалтнуудаас тайлбар авч ажилласан байна.
Шалгалтанд хамрагдсан 2732 материалаас Захиргааны хариуцлагын тухай хуулийн 21 дүгээр зүйлд заасан "Танхайрах” зөрчил 2498 буюу нийт зөрчлийн 91 хувийг эзэлж байна. Харин "Цагдаагийн алба хаагчийн хууль ёсны шаардлагыг үл биелүүлэх, заналхийлэх, цагдаагийн байгууллагад худал мэдээлэл өгөх” зөрчил 97, "Бусдын эд хөрөнгө ашиглан шамшигдуулах” зөрчил 21, "Төрийн төлөөлөгчийн хууль ёсны шийдвэрийг биелүүлэхгүй байх, эсэргүүцэх” зөрчлөөр 51 иргэнд тус бүр захиргааны шийтгэл ногдуулсан байх ба Архидан согтуурахтай тэмцэх хуулиар 44, Тамхины хяналтын хуулиар 11, Мал хулгайлах гэмт хэргээс урьдчилан сэргийлэх тухай хуулиар 10 иргэнд тус тус захиргааны торгох шийтгэл ногдуулжээ.
Шалгалтын явцад илэрсэн зөрчлүүдийг дүгнэхэд эрх бүхий албан тушаалтнуудаас захиргааны зөрчлийн хэрэг бүртгэлтийн ажиллагаа явуулахдаа холбогдох хууль тогтоомжийн дагуу хэрэг бүртгэлтийн ажиллагаа явуулдаггүй, хуулийг буруу хэрэглэдэг, хуулинд заасан эрхийг тайлбарлан өгдөггүй, зөрчил гаргасан этгээдийн зөрчлийг захиргааны хариуцлагын тухай хуульд заасны дагуу тэмдэглэл үйлдэж баримтжуулдаг зэрэг зөрчлүүд гарсан.
Шалгалтын дүнг Аймгийн прокурорын дэргэдэх Зөвлөлийн хурлаар хэлэлцүүлсэн бөгөөд шалгалтаар илэрсэн алдаа, зөрчлийг арилгуулахаар Цагдаагийн газарт прокурорын шаардлага хүргүүлж, дахин энэ төрлийн алдаа зөрчил гаргуулахгүй байх талаар шалгалтын дүнг эрх бүхий албан тушаалтнуудад танилцуулж, сургалт зохион байгуулахаар шийдвэрлэлээ.

Дорнод аймгийн Прокурорын газраас Зэвсэгт хүчин, хил хамгаалах цэргийн ангиудад шалгалт хийжээ

marsbold — Tue, 13 Dec 2016 17:53:19 +0800

Дорнод аймгийн Прокурорын газраас Зэвсэгт хүчин, хил хамгаалах цэргийн анги байгууллагын Гэмт хэргээс урьдчилсан сэргийлэх чиглэлээр хийсэн ажил болон цэргийн ангийн сахилгын байрны үйл ажиллагаа, ахуй нөхцөл, стандартыг шалган зааварчилж, шалгалтаар илэрсэн зөрчил дутагдлыг арилгуулах, хууль тогтоомжийг нэг мөр хэрэгжүүлэх, хүний эрхийг тууштай хангуулах зорилгоор 2016 оны 12 дугаар сарын 05-ны өдрөөс 12 дугаар сарын 15-ны өдрийг хүртэл хугацаанд шалгалт хийлээ.
Шалгалтанд тус аймгийн Зэвсэгт хүчний 327 дугаар анги, Хилийн цэргийн 0132, 0198, 0306, 0275 дугаар ангиуд хамрагдсан бөгөөд прокуророос сахилгын байрны ахуй нөхцөл, үйл ажиллагаа болон Гэмт хэргээс урьдчилан сэргийлэх чиглэлээр хийж хэрэгжүүлсэн ажлыг газар дээр нь шалгахад тус ангиудад цэргийн алба хаагчдын баривчлах, хорих, ял эдлүүлэх зориулалт бүхий сахилгын болон саатуулах байр байхгүй, Гэмт хэргээс урьдчилан сэргийлэх чиглэлээр 2016 оны төлөвлөгөө гарган баталж, төлөвлөгөөний биелэлт 85-88 хувь буюу хангалттай дүгнэгдсэн байна.
Шалгалтын хүрээнд прокуророос эрх бүхий алба хаагч нарт 2016 оны эрүүгийн хэргийн нөхцөл байдлын талаар мэдээлэл өгч, Захиргааны зөрчлийн хэрэг бүртгэлтийн ажиллагаа явуулсан материалтай танилцаж, Гэмт хэргээс урьдчилан сэргийлэх чиглэлээр авч хэрэгжүүлж буй бодлого төлөвлөгөө, анхаарах асуудлын талаар заавар чиглэл өгч Гэмт хэргээс урьдчилан сэргийлэх тухай хууль, Улсын Ерөнхий Прокурорын 2015 оны 8 дугаар сарын 11-ний өдрийн А/89 дугаар тушаал "Ял эдлүүлэх ажиллагаанд тавих прокурорын хяналтын ажлын аргачилсан заавар”-ыг нэг мөр хэрэгжүүлэхэд анхаарч ажиллах талаар заавар чиглэл өгч, шалгалтаар илэрсэн, зөрчил дутагдалыг дахин гаргахгүй байхад анхаарах, үр дүнг эргэн тооцож ажиллахаар албан бичиг хүргүүллээ.

ЗАМЫН ЦАГДААГИЙН АЛБА ҮҮСЧ ХӨГЖСӨНИЙ 80 ЖИЛИЙН ОЙН БАЯРЫГ ТОХИОЛДУУЛАН АЛБА ХААГЧИД ШАГНУУЛЛАА.

marsbold — Fri, 09 Dec 2016 09:51:21 +0800

Замын цагдаагийн алба үүсч хөгжсөний 80 жилийн ойн баярыг тохиолдуулан эрхэлсэн ажилдаа үр бүтээл гарган ажилласан Замын цагдаагийн тасгийн дарга, цагдаагийн дэд хурандаа С.Батсүх Хууль зүйн яамны "Тэргүүний ажилтан” цол тэмдэгээр, зохицуулагч, цагдаагийн ахмад Т.Лхагвасүрэн ЦЕГ-ын "Жуух бичиг”, зохицуулагч, цагдаагийн ахмад Э.Энхтүвшин, цагдаа-зохицуулагч, цагдаагийн ахлагч Б.Ачхүү нар ЗЦАлбаны "Баярын бичиг”-ээр тус тус шагнууллаа.
Замын цагдаагийн тасгийн хамт олонд түүхт 80 жилийн ойн баярын мэндийг хүргэж, ажилд нь өндрөөс өндөр амжилтыг хүсэн ерөөе.

Монгол Цагдаагийн яруу алдар бадартугай.

“АХЛАГЧИЙН ӨДӨР” АРГА ХЭМЖЭЭ ЗОХИОН ЯВАГДЛАА.

marsbold — Fri, 09 Dec 2016 09:30:08 +0800

Монголын цагдаагийн байгууллагын "Ахлагч нарын баяр"-ын өдрийг тохиолдуулан 2016 оны 12 дугаар сарын 08-ны өдөр цагдаагийн газрын нийт ахлагч бүрэлдэхүүний дунд зөвлөгөөн зохион байгуулан, хамт олноо манлайлан ажилласан 11 алба хаагчдыг Цагдаагийн газрын "Баярын бичиг"-ээр шагнаж урамшууллаа.
Арга хэмжээний үеэр хэсэгчилсэн урлагийн тоглолт зохион явагдлаа.

Мөн энэ өдөр ахлагч бүрэлдэхүүнийг гэр бүлтэйгээ чөлөөт цагаа зөв боловсон өнгөрүүлэх зорилгоор томилгоот эргүүл, жижүүр, харуулын үүргээс бүрэн чөлөөлж, нэг өдрийн амралтыг олгосон байна.

АЙМГИЙН ЦАГДААГИЙН БАЙГУУЛЛАГААС “АРХИГҮЙ АМЬДРАЛ” ХӨТӨЛБӨРИЙН ХҮРЭЭНД МЭДЭЭЛЭЛ ХИЙЛЭЭ

marsbold — Tue, 06 Dec 2016 17:49:56 +0800

Аймгийн иргэдийн төлөөлөгчдийн Хурлын тэргүүлэгчдийн 2015 оны 4-р тогтоолоор "Архигүй амьдрал” хөтөлбөрийн хүрээнд хэлтсийн нийт албан хаагчдад эрхэлж байгаа ажил үүргийн онцлогтой холбогдон өртөж болзошгүй гэмт хэрэг, архины хор хөнөөл, хор уршгийн талаар анхааруулан согтууруулах ундаа хэтрүүлэн хэрэглэсний улмаас үүсэж байгаа өвчин эмгэгээс урьдчилан сэргийлэх талаар мэдээ мэдээлэл хийлээ.

Мөн архидан согтуурахтай тэмцэх хууль тогтоомж, хөтөлбөрийг хэрэгжүүлэх, сурталчлах ажлыг зохион байгуулах, архидалтаас үүдэн гарсан гэмт хэрэг, зөрчлөөс урьдчилан сэргийлэх талаар зөвөлгөө өглөө.

Авлигатай тэмцэх газрын албан хаагчид орон нутагт ажиллахаар замд гарлаа

marsbold — Wed, 09 Nov 2016 11:08:44 +0800

Авлигатай тэмцэх газрын албан хаагчид 7 чиглэлд хуваагдан 21 аймагт ажиллахаар өнөөдөр замд гарлаа.

Авлигатай тэмцэх газрын ажлын хэсгүүд 2016 оны 11 дүгээр сарын 9-26-ны өдрүүдэд орон нутагт ажиллахдаа дараах арга хэмжээг авч хэрэгжүүлэх юм байна. Өнгөрсөн долоо хоногт УИХ-аар батлагдсан Авлигатай тэмцэх үндэсний хөтөлбөрийг сурталчилж, төрийн албанд олон нийтийн тавих хяналтыг сайжруулах чиглэлээр сургалт хийх бөгөөд бизнес эрхлэгчдийн дунд "Авлигатай тэмцэхэд хувийн хэвшлийн үүрэг оролцоо” сэдэвт хэлэлцүүлэг зохион байгуулах ажээ. Түүнчлэн иргэд, аж ахуйн нэгж, байгууллагаас өргөдөл, гомдол хүлээн авч шийдвэрлэнэ.

Аймгийн ИТХ-ын дэргэдэх Гэмт хэргээс урьдчилан сэргийлэх ажлыг зохицуулах салбар зөвлөлийн дарга, гишүүдтэй уулзаж, иргэдээс төсөөллийн судалгаа авах нь Авлигатай тэмцэх газрын ажлын хэсгүүдийн томилолтын нэгэн зорилго юм байна.

Монгол цэргүүд хоёрдугаар байр эзэлжээ

marsbold — Fri, 28 Oct 2016 11:16:44 +0800

Исламын Бүгд Найрамдах Афганистан улсад явагдаж буй "Шийдвэртэй дэмжлэг” олон улсын ажиллагаанд АНУ-ын Зэвсэгт хүчинтэй хамтран үүрэг гүйцэтгэж байгаа Монгол Улсын Зэвсэгт хүчний IV ээлжийн цэргийн баг үүргээ нэр төртэй биелүүлсээр байна. Манай алба хаагчид үндсэн үүргээ биелүүлэхээс гадна эх орон, Зэвсэгт хүчнээ сурталчлах арга хэмжээ болон эр зориг, тэсвэр хатуужил шаардсан тэмцээн уралдаанд амжилттай оролцсоор байгаа ажээ.

Тодруулбал, саяхан "Шинэ Кабул” баазад зохион байгуулагдсан цэргийн алба хаагчдын ур чадвар, тэсвэр тэвчээрийг шалгасан тэмцээнд амжилттай оролцжээ. 7 орны 7 баг тамирчид оролцсон энэ тэмцээнд дэд ахлагч Г.Жамсранжав, дэд ахлагч Б.Ням-Эрдэнэ, дэд ахлагч Ш.Шижир-Отгон нарын залуус оролцож дэд байранд шалгарсан байна. Тэмцээний нэгдсэн дүнгээр нэгдүгээр байранд Англи, Непал улсын хамтарсан цэргийн баг, гуравдугаар байрыг Дани улсын цэргийн баг эзэлсэн бөгөөд оролцогчид 32 кг ачаа үүрч 4 км туулахдаа хэд, хэдэн саадыг даван, даалгавар биелүүлсээр барианд орж ирсэн байна.

Эх сурвалж: "Соёмбо” сонин

200 саяын хэрэгт холбогдуулан НӨХГ-ын дарга нарыг ээлж дараалан хорьж эхэллээ

marsbold — Fri, 16 Sep 2016 08:40:52 +0800

АТГ-ынхан ажлаа хийж, албан тушаалтан болон авлига хээл хахуулд идэгдсэн албан дарга нарыг ар араас нь ээлж дараалан баривчилж эхэлжээ.

Хоёр хоногийн өмнө буюу уржигдар орой Нийслэлийн өмчийн харилцааны газрын дарга Б.Амаржаргалыг авлига хээл хахуулын хэргээр гэрээс нь баривчилж Цагдан хорих 461 дүгээр ангид хорьжээ.

Түүнийг бусдаас их хэмжээний хахууль авсан хэрэгт буруутган, сэжигтнээр татсан байна.

Үүнээс өмнө АТГ, ЦЕГ-аас томилогдсон Ажлын хэсэг өнгөрсөн долдугаар сард Баянзүрх дүүргийн Өмч, газрын харилцааны албаны дарга Н.Батсүхийг БНХАУ-ын иргэнээс 200 гаруй сая төгрөгийн хахууль авсан хэрэгт сэжиглэн, цагдан хорьсон байгаа. Түүний араас Баянгол, Сүхбаатар дүүргийн Өмч, газрын харилцааны албадын дарга нарыг саатуулсан. Гэхдээ одоогоор Сүхбаатар дүүргийн Өмч, газрын харилцааны албаны дарга Т.Мөнхбаатарыг батлан даалтад гаргасан байгаа ажээ.

Ийнхүү газрын наймаа болон авлигын хэргээр сүлжээ үүсгэж, аалзны тор нэхсэн алба хаагчдыг баривчилж эхлэв. Үүний араас ч цагдан хорьж шалгах хэд хэдэн эрхмүүд байгаа сурагтай гэнэ шүү. Одоогоор Баянгол, Баянзүрх дүүргийн Өмч газрын албадын дарга нар хоригдож байгаа бөгөөд тэднийг бусдаас мөнгө авч, хууль бусаар газар эзэмшүүлж, өмчлүүлсэн хэрэгт холбогдох хүний тоо цаашид нэмэгдэх магадлалтайг эх сурвалж хэлсэн бол Налайх дүүргийн Өмч, газрын харилцааны албаныхан ч хуулийн байгууллагын анхааралд байгаа тухай мэдээлэл байна.

Хэргийг сануулахад, Баянзүрх дүүргийн өмч, газрын харилцааны албаны дарга Н.Батсүхийг "Их цуурайтын ам"-нд газар эзэмших эрхийн гэрчилгээг БНХАУ-ын иргэн Л-д хууль бусаар олгож, түүнийхээ хариуд хууль бусаар 200 сая төгрөгийн хахууль авч буй үйлдэл дээр нь цагдаагийнхан илрүүлсэн.

Тэрбээр уг хэргийг үйлдэхдээ иргэн Б, Ч, П нартай үгсэн тохирч, иргэдийн цахим үнэмлэхийг ашигласан байдаг.

Түүний энэ 200 сая төгрөгийн авлигын хэрэгт дээрх дарга нар холбоотой байж магадгүй хэмээн албаныхан үзэж саатуулан шалгахаар болсон гэдгийг дуулгав.

Тодруулбал, Сүхбаатар дүүргийн Өмч, газрын харилцааны албаны дарга Т.Мөнхбаатарыг тус дүүргийн 20 дугаар хороо, Бэлх зуслангийн Хадатын аманд байрлалтай "Хадат Вилла” хотхоныг барьж буй компанид 40 айлын газрын бичиг баримтыг хуурамчаар үйлдэн өгч, оронд нь олон тэрбум төгрөг авсан авлигын хэрэгт сэжиглэн саатуулсан ч батлан даалтад гаргажээ.

Харин Баянгол дүүргийн Өмч, газрын харилцааны албаны дарга С.Бямбадоржийг иргэдэд олгогдох ёстой 0.07 га газрыг нь дээрэмдэн авч, газрын захирамжийг хуурамчаар үйлдэж бусдаас их хэмжээний мөнгө авсан хэрэгт буруутгасан байгаа ажээ.

О.Сайхан

zaluu.com

Монгол залуус НҮБ-ын цагдаагаар ажиллахаар явахад бэлэн боллоо

marsbold — Wed, 20 Jul 2016 13:57:15 +0800

95 жилийн түүхтэй Монголын цагдаагийн байгууллагаас НҮБ–ын мандат өвөртлөн анх удаа цагдаагийн үүрэг гүйцэтгэхээр хоёр офицер ирэх долоо хоногт эх орноосоо мордох гэж байна. Цагдаагийн байгууллагаас НҮБ–ын цагдаагийн ажилд оролцохоор бэлтгэлд гарсан хүмүүсээс 14 хүн тэнцэж, явахад бэлэн болсон аж.

Тэднээс ЭЦГ-ын V хэлтсийн ахлах мөрдөн байцаагч, ахлах дэслэгч Б.Эрдэнэдалай, Улаанбаатар хотын Цагдаагийн газрын Төлөвлөлт, зохион байгуулалтын хэлтсийн мэргэжилтэн, ахлах дэслэгч Б.Бат–Оргил нар НҮБ–ын цагдаагийн албанд цагдаагийн зөвлөх (police adviser) гэх албан тушаалыг энэ сарын 31–нээс эхлэн жилийн хугацаатай хашихаар болсон юм.

Ахлах дэслэгч Б.Эрдэнэдалайгаас энэ талаар тодрууллаа.

-НҮБ-ын мандаттайгаар цагдаагийн үүрэг гүйцэтгэхээр эх орноосоо мордох гэж байна. Чухам ямар ажил хийх юм бол?

-Дэлхийн халуун цэгт НҮБ-ын мандаттайгаар цэрэг буюу зэвсэгт хүчнийхэн, цагдаагийн албан хаагчид үүрэг гүйцэтгэж байдаг. Цэргийн албан хаагчид маань хамгаалалтын асуудлыг нь анхаарч ажилладаг бол НҮБ-ын цагдаагийн албан хаагчид нь зэвсэгт хүчнийхний хамгаалалтад байгаа дүрвэгсдийн хуаран, хамгаалалтын бүс дотор үйлдэгдэж буй гэмт хэрэгтэй тэмцэх ажил хариуцдаг юм байна.

Ингэхдээ орон нутгийн хууль сахиулах байгууллагын туслалцаа дэмжлэг үзүүлэх, цагдаагийн алба хаагчийн биеэ авч яваа байдал, ёс зүйгээр үлгэрлэх зэргээр ажилд нь дэмжлэг үзүүлэх зорилготой. Мөн гэмт хэрэг, олныг хамарсан үймээн самуунаас урьдчилан сэргийлэх зорилгоор мэдээ, мэдээлэл цуглуулах, хэргийн газрын үзлэг хийх, түүнийг хамгаалалтад авахад туслалцаа дэмжлэг үзүүлэх гэх зэрэг ажлыг цагдаа нь хариуцах юм.

-Хэчнээн орноос цагдаагийн алба хаагч ажиллаж байгаа талаар мэдээлэл авсан уу. Ийм үүрэг гүйцэтгэхэд ЦЕГ-ын удирдлага нэлээд хүчин чармайлт гаргасан байх?

-НҮБ-ын цагдаагаар 48 орон Өмнөд Судан улсад үүрэг гүйцэтгэж байгаа. Манай улс 49 дэх нь болж очиж буй юм. Монголын цагдаагийн байгууллагаас НҮБ-ын цагдаагаар ажилласнаар эх орныхоо тусгаар тогтнолыг хамгаалахад улс төр, дипломатын аргаар оролцох ач холбогдолтой. Мөн тэнд үүрэг гүйцэтгэж байгаа 48 орны цагдаагийн албан хаагчдаас суралцах, туршлага солилцох гээд олон талын ач холбогдолтой.

Монгол Улсын цагдаагийн байгууллага гадаад харилцаагаа өргөжүүлж, хөрш орнуудтайгаа гэмт хэрэгтэй тэмцэх, урьдчилан сэргийлэх чиглэлээр хамтын ажиллагаагаа нэмэгдүүлэхийн зэрэгцээ бусад улс орноор тогтохгүй НҮБ-ын мандат дор цагдаагийн албан хаагч үүрэг гүйцэтгэх бүхий л нөхцөл бололцоог сүүлийн жилүүдэд бүрдүүллээ.

Хууль зүйн яам, ЦЕГ-ын дарга, түүний зөвлөлийн гишүүд, Гадаад харилцааны хэлтсийн дарга, хурандаа Г.Бадарч даргатай хамт олны шаргуу хөдөлмөрийн дүнд Монголын цагдаагийн албан хаагчид НҮБ-ын мандат дор цагдаагийн үүрэг гүйцэтгэхээр болсон нь хууль сахиулах байгууллагын түүхэнд шинэ шан татаж байгаа явдал шүү дээ. Биднийг үүрэг гүйцэтгэхээр болсонд ЭЦГ, тус газрын V хэлтсийнхэн, Улаанбаатар хотын Цагдаагийн газрынхан ч мөн маш их тусалж дэмжсэнд талархаж буйгаа энэ дашрамд илэрхийлье.

-Газар орны нөхцөл байдлаа нэлээд судалж байгаа байлгүй. Ямар шалгуураар та нарыг сонгосон бэ?

-Энэ сарын 8-9-нд шилжих шөнө Засгийн газрын болон Засгийн газрын бус хүчнийхэн хэлэлцээр хийх үедээ тохиролцсон зүйлдээ аль аль тал нь сэтгэл хангалуун бус байснаас болж мөргөлдөөн үүсгэж, тухайн газар оронд үүрэг гүйцэтгэж буй БНХАУ-ын цэргийн багийн хоёр энхийг сахиулагч, орон нутгийн иргэдээс 300 гаруй хүн амиа алдсан, цагийн байдал тогтворгүй, хүндэрч байгаа гэсэн мэдээллийг бид аваад байна.

Бидний бэлтгэл сургуулилалт, сэтгэл зүйн бэлтгэл хангагдсан гэж үзэж байгаа. Цаг агаарын байдал халуун хуурай, ялаа, шумуулаар дамжих элдэв халдварт өвчин дэгдэмтгий учраас өөрсдийнхөө хувийн ариун цэвэр, ялаа шумуулаас хамгаалахад нэлээд анхаарах ёстой юм билээ.

-Тухайн бүс нутагтаа очоод тээврийн хэрэгсэл жолоодох шалгалт дахиад өгөх үү?

-Гадаад хэл, тэр дундаа англи хэлний өндөр түвшний мэдлэгтэй байх, өөрийн болон бусад хүний аюулгүй байдлыг хангахад чухал нөлөөтэй гэж үзээд автомашин жолоодох ур чадварыг хоёрдугаарт тавьдаг юм байна. Гуравдугаарт галт зэвсэг хэрэглэх ур чадварыг шалгадаг.

-Тэгэхээр та нар тухайн газар нутаг дээрээ зэвсэг, хүн нэг бүрийн тусгай хэрэгсэлтэй үүрэг гүйцэтгэх боломжтой юм уу?

-Цагдаагийн албан хаагчид зэвсэггүйгээр үүрэг гүйцэтгэх юм. НҮБ-ын мандатад нь цагдаагийн албан хаагчдыг галт зэвсэг хэрэглэхгүй байхаар тусгасан юм билээ. Үнэхээр шаардлагатай тохиолдолд зэвсэгт хүчний хамгаалалт дор галт зэвсэг хэрэглэхгүйгээр ажиллах журамтай.

-Зэвсэгт хүчнийхний бүрэлдэхүүнд цагдаагийн албан хаагчид багтаж, харуул хамгаалалтын үүрэг гүйцэтгэдэг байсан бол одоо өөрсдийн эзэмшсэн мэргэжлээ ашиглах болсон байна. Тэнд манай зэвсэгт хүчнийхэн байгаа шүү дээ. Тэднээс заавар зөвлөгөө авсан биз дээ?

-Манай зэвсэгт хүчнийхэн 2002 оноос НҮБ-ын ажиглагчаа илгээж байснаас хойш 13.000 цэргийн алба хаагчаа энхийг сахиулах ажиллагаанд оролцуулаад байна. ЗХЖШ-ын удирдлага, тэр дундаа Ажиллагааны удирдлагын газрын дарга, бригадын генерал Д.Ганзориг биднийг хүлээн авч уулзан цагдаагийн албан хаагчид НҮБ-д ажиллахаар болсонд маш их анхаарал тавьж, тусламж дэмжлэг үзүүлэн, газар орны нөхцөл байдлын талаарх мэдээллийг өгч, хэрхэн биеэ авч явах талаар заавар зөвлөгөө өгсөнд маш их баярлаж буйгаа энэ дашрамд илэрхийлье.

Монголын зэвсэгт хүчин Өмнөд Судан улсад үнэхээр нэр хүндтэй, хойд секторын командлагч нь монгол хүн байгаа. Тэдний сайн ажиллаж буйн үр дүнд Монголын цагдаагийн байгууллагаас НҮБ хүн авч ажиллуулахаар болсон болов уу.

эх сурвалж: "Өнөөдөр" сонин http://unuudur.mn/article/88115

Усчин аврагчдын дадлага сургуулалт явагдлаа

marsbold — Mon, 04 Jul 2016 18:00:14 +0800

Дорнод аймгийн Онцгой байдлын газрын Эрэн хайх, аврах анги амралт зугаалга, зуны улирал эхэлсэнтэй холбогдуулан усны ослын үед ажиллах уснаас аврах ажиллагааны техник багаж, хэрэгслийн бэлэн байдал, усчин аврагчидын усны мандал дээр аврах ажиллагаа гүйцэтгэх, гүний шумбалтаар эрэн хайх, аврах ажиллагааны гүйцэтгэх багаж хэрэгслийг ашиглах чадварыг дээшлүүлэх зорилгоор Баянтүмэн сумын нутаг "Шаазан нуур"-нд 11 албан хаагчийн бүрэлдэхүүнтэйгээр 2016 оны 06 дугаар сарын 29-ны өдрөөс 2016 оны 07 дугаар сарын 02-ны өдрийг хүртэл 3 хоногийн хугацаатай усчин аврагчын усны дадлага сургуулалтыг амжилттай зохион байгууллаа. Амралт зугаалагын улирал үргэлжилж байгаа тул ард иргэд гол, нуурын усанд ойрхон бага насны хүүхдийг хараа хяналтгүй орхихгүй байх, архи согтууруулах ундаа хэрэглэсэн үедээ гол, нуурын усанд орохгүй байхыг онцгойлон анхааруулж байна

Дорнод аймгийн Онцгой байдлын газар

Оюутан цэргийг Ховд, Дорнодод бэлтгэж байна

marsbold — Mon, 04 Jul 2016 10:23:45 +0800

Нийслэлийн Цэргийн штабын тоо бүртгэлийн офицер Б.Баянмөнхөөс "Оюутан цэрэг” хөтөлбөрийн талаар дараах зүйлийг тодруулав.

-"Оюутан цэрэг” хөтөлбөрт энэ жил хэчнээн оюутныг хамруулсан бэ. Тэд уг хөтөлбөрт хэр идэвхтэй оролцож байна вэ?

-"Оюутанцэрэг” хөтөлбөрийг гурав дахь жилдээ зохион байгуулж байна. Энэ жилийн хувьд Дорнод, Ховд аймагт байдаг цэргийн ангийг түшиглээд 200 гаруй оюутныг бэлдэж байна. Уг хөтөлбөрт аймаг, нийслэлийн хувийн болон хувьсгалын их, дээд сургуулийн I курсын оюутнуудыг хамруулдаг. Хөтөлбөрт 2014 онд 500 орчим оюутан хамруулсан. Өнгөрсөн онд 987 оюутан тангараг өргөж, энэ жил мөн төсөвт тохируулан 1000 орчим оюутныг бүртгэлээ.

-Энэ жил уг хөтөлбөрт хэчнээн төгрөг төсөвлөсөн юм бол?

-Энэ жилийн хувьд "Оюутан цэрэг” хөтөлбөрт хамрагдах хүсэлтэй оюутнууд олон байсан. Гэхдээ баталсан төсөвтөө тааруулж оюутан сонгон шалгаруулалтад цензур тавьсан. Зарим сургуулийн оюутнуудын голч дүнг хүртэл харж бүртгэсэн тохиолдол бий. Ерөнхийдөө нэг хугацаат цэргийн нормын төсөв гаргаж өгдөг. Энэ нь шинээр хэрэгжүүлж буй хөтөлбөр учраас материаллаг бааз дутмаг байдаг.

-Бүргүүлсэн оюутнууд бүгд цэргийн албаа бүрэн хааж чаддаг уу?

-Хавар бүртгүүлсэн оюутнууд ямар нэг шалтгаанаар бүртгэлээс хасагдах тохиолдол гардаг.Бидний зүгээс шаардлага хангасан оюутнуудыг бүртгэж БХЯ-ны харьяа ангид хүлээлгэн өгдөг. Хээрийн сургалтад яваад ирсний дараагаар дахиж бүртгэдэг. Хоёр бүртгэлийн хооронд оюутнууд танхимын хичээл, эрүүл мэндийн үзлэг, хээрийн бэлтгэл зэрэгт хамрагддаг. Энэ явцад танхимын хичээлийн шалгалтад унасан, эрүүл мэндийн үзлэгт тэнцээгүй, хээрийн бэлтгэлийн явцад шантарсан эсвэл хүндэтгэх шалтгааны улмаас оюутнууд хасагддаг. Оюутан цэргүүд дөрөвдүгээр сарын 1-нээс танхимын хичээлд сууж, зургаадугаар сарын дундуур хээрийн бэлтгэлд гарч, наймдугаар сард тангараг өргөдөг юм.

Ц.Заяа

- See more at: http://www.unen.mn/content/64531.shtml?alias=unen#sthash.a95wfFLa.dpuf

“Оюутан цэрэг” хөтөлбөр Дорнод аймагт хэрэгжиж эхэллээ

marsbold — Wed, 15 Jun 2016 19:47:59 +0800

Монгол Улсын Ерөнхийлөгчийн 92 дугаар зарлиг, Засгийн газрын 40 дүгээр тогтоол, Батлан хамгаалахын сайд, Боловсрол, соёл, шинжлэх ухааны сайдын 2014 оны хамтарсан тушаалаар оюутан залуус цэргийн алба хаах журмыг баталж, "Цэргийн ерөнхий бэлтгэл” болон "Цэргийн мэргэжлийн бэлтгэл” сургалт явуулж, 2014 онд 418 оюутан, 2015 онд 995 оюутан хамруулан бэлтгэж, цэргийн тангараг өргүүлэн, буудагч-тасгийн дарга бага мэргэжлээр бэлтгэсэн.
Энэ жил "Оюутан цэрэг хөтөлбөр Ховд, Дорнод аймагт хэрэгжихээр болсон юм. Батлан хамгаалахын сайдын тушаалаар 2016 онд 1000 оюутан "Оюутан цэрэг” хөтөлбөрт хамрагдуулахаар холбогдох байгууллагууд бэлтгэл ажлаа хангаж дуусан байна.
"Оюутан цэрэг” хөтөлбөрийн бүртгэл их, Дээд сургуулиудын бакалаврын өдрийн ангид суралцаж байгаа, нэгдүгээр дамжааны 18 нас хүрсэн оюутнуудаас сайн дурын үндсэн дээр алба хаах залуусыг их, дээд сургуулийн оюутны алба, сургуулийн тодорхойлолтоор харьяа дүүргүүдийн цэргийн штабаар дамжуулан 2016 оны 03 дугаар сарын 1-нээс эхлэн бүртгэх эхэлсэн юм.
Тус хөтөлбөрийн хүрээнд Дорнод аймагт их, дээд сургууль, коллежид суралцаж байгаа оюутнууд болон Улаанбаатар хотоос тодорхой тооны оюутан ирж ЗХ-н 0327-р ангид алба хааж, хөтөлбөрт хамрагдах юм байна. Хөтөлбөр хоёр сар үргэлжлэх бөгөөд тэд цэргийн ерөнхий бэлтгэл болон цэргийн мэргэжлийн бэлтгэл сургуулилтад хамрагдах юм. Өнөөдөр хөтөлбөрт хамрагдсан оюутан цэргүүд хээрийн гаралтын байршилдаа очиж цэргийн мэргэжлийн тусгай сургалтаа эхлүүллээ.

Б.Отгонбавуу MNB.mn

“Оюутан цэрэг” хөтөлбөрт 1000 оюутан хамрагдана

marsbold — Thu, 10 Mar 2016 13:04:33 +0800

"Оюутан цэрэг” хөтөлбөрийн нээлт нийслэлийн Иргэний танхимд боллоо. Нийслэлийн Засаг дарга бөгөөд Улаанбаатар хотын Захирагч Э.Бат-Үүл "Оюутан цэрэг хөтөлбөр хэрэгжүүлэх тухай” А/162 дугаар захирамж гаргасан. Захирамжийн дагуу нийслэлийн нутаг дэвсгэр дэх их, дээд сургуульд суралцаж буй 18-25 насны оюутан залуучуудыг сайн дурын үндсэн дээр элсүүлэх "Оюутан цэрэг” хөтөлбөрийг өнөөдрөөс эхлэн хэрэгжүүлж байгаа юм.

Тус хөтөлбөр нь нийслэлд болон Ховд, Дорнод, Говьсүмбэр аймагт нэгэн зэрэг эхлэх юм. "Оюутан–цэрэг” хөтөлбөр 2014, 2015 онд амжилттай хэрэгжиж нийт 1500 орчим оюутан тус хөтөлбөрийн сургалтын хөтөлбөрийг бүрэн хангаад байгаа юм. Батлан хамгаалахын сайдын тушаалаар энэ онд "Оюутан–цэрэг” хөтөлбөрийн сургалтад 1000 оюутныг хамруулахаар шийдвэрлээд байна.

2016 онд Оюутан цэрэг хөтөлбөр Дорнод, Ховд аймгуудад хэрэгжинэ

marsbold — Mon, 01 Feb 2016 15:10:43 +0800

Монголын оюутны холбооны санаачлагаар Монгол улсын Ерөнхийлөгчийн 2013 оны 92 дугаар зарлиг, Засгийн газрын 2014 оны 40 дүгээр тогтоол, Батлан хамгаалах сайд, Боловсрол, соёл, шинжлэх ухааны сайдын 2014 оны хамтарсан тушаалаар оюутан залуус цэргийн алба хаах журам батлаж, "Цэргийн ерөнхий бэлтгэл” болон "Цэргийн мэргэжлийн бэлтгэл” сургалт явуулж, 2014 онд 418 оюутан, 2015 онд 995 оюутан хамруулан бэлтгэж, цэргийн тангараг өргүүлэн, буудагч-тасгийн дарга бага мэргэжлээр бэлтгэсэн.

Монголын оюутны холбооны санаачлагаар энэ жил Ховд, Дорнод аймагт хэрэгжихээр болсон байна.

Батлан хамгаалахын сайдын тушаалаар 2016 онд 1000 оюутан "Оюутан цэрэг” хөтөлбөрт хамрагдуулахаар холбогдох байгууллагаууд бэлтгэл ажлаа хангаад байгаа бөгөөд Ховд аймагт 150 оюутан, Дорнод аймагт 100 оюутан, Улаанбаатар хотод 750 оюутан "Оюутан цэрэг” хөтөлбөрт хамрагдах юм.

"Оюутан цэрэг” хөтөлбөрийн бүртгэл Их, Дээд сургуулиудын бакалаврын өдрийн ангид суралцаж байгаа нэгдүгээр дамжааны 18 нас хүрсэн оюутнуудаас сайн дурын үндсэн дээр алба хаах залуусыг их, дээд сургуулийн сургалтын алба, сургуулийн тодорхойлолтоор харьяа дүүргүүдийн цэргийн штабаар дамжуулан 2016 оны 03 дугаар сарын 01-нээс эхлэн бүртгэх юм байна.

Тус хөтөлбөрийн "Цэргийн ерөнхий бэлтгэл” сургалт хичээлийн хуваарь, хөтөлбөр, төлөвлөлтийн дагуу 04 дүгээр сарын 01-нээс 06 дугаар сарын 01-ны хооронд зохион байгуулагддаг болно.

Бэлтгэл хошууч генерал Б.Баярмагнай: Гадаадад манай цэргүүдийг гайхан шагширдаг

marsbold — Tue, 19 Jan 2016 13:48:50 +0800

Монгол цэрэг бусад орны цэргээс юугаараа ялгаатай вэ?
Энэ асуултыг бид олон сонсож байсан. Магадгүй олон хүн олон янзаар хариулж байсан байх. Нийгмийн тогтолцоо, аюулгүй байдлын орчин, гадаад харилцаа гээд олон шалтгааны улмаас бид өөрсдийгөө өрөөл бусадтай харъцуулах боломж хязгаарлагдмал байсаар ирсэн. Анх биднийг Иракт өөрийн үндсэн зэвсэглэл, техниктэй хөл тавьж байхад гадаадын цэргүүд шоололдон инээлдэж, музейд тавих болсон Оросын хэдэн хуучин техниктэй, хөршөө давж алхаж үзээгүй хэн ч үл мэдэх хэл ам нь мэдэгдэхгүй хэдэн бор цэргүүдтэй монголчууд ирлээ гэж шуугиж байсан нь саяхан…
2015 оны 1 сард Афганистанд ХБНГУ-тай хамтарсан цэргийн багаас мэдээ ирлээ. Тус баазад зохион байгуулагдсан 5,5 км-ийн гүйлтийн тэмцээнд 6 орны 300 гаруй цэргийн алба хаагч оролцож тус бүр 5 хүнтэй багийн төрөлд 1, 3, 4, 5 дугаар байрыг манай монгол цэргийн багууд эзэлж, харин 2 дугаар байрыг дэлхийд алдартай Германы баг эзэлсэн байна. Хувийн дүнгээр ахлах ахлагч А.Нямгэрэл /330 анги/ 1 байр, ахлагч Б.Азжаргал /065 анги/ 3 байр эзэлжээ.
Өмнө нь Афганистаны өөр нэг бааз болох Эггерс бааз дээр болсон "Hoplite Trek” хэмээх тус бүр 2 хүний бүрэлдэхүүнтэй, 5 км гүйж 60 удаа дүүжинд, 230 удаа гар дээр суниагаад, 16 кг ачаатайгаар ахин 5 км гүйж 60 удаа савлуурт, 230 удаа гар дээр суниагаад дараагийн 5 км-т гүйж барианд ордог хурд, хүч, авхаалж самбаа, уян хатан, тэсвэр хатуужил сорьсон тэмцээнд 1,2,3,4,5,6,7,9 дүгээр байруудыг Монгол улсын багууд эзэлж, харин 8 дугаар байрыг дэлхийд тэргүүлэгч АНУ-ын Тэнгисийн явган цэргийн баг эзэлсэн юм.
Одоо тэгэхээр дээрх асуултад өгөх бас нэгэн хариулт тодорхой болж байгаа байх. Бид Энхийг дэмжих ажиллагаанд тамирчин цэрэг явуулдаггүй. Зөвхөн зэвсэгт хүчний офицер, ахлагч нарт тавигддаг биеийн тамирын шаардлага, шалгуур үзүүлэлтийг хангасан, эрүүл чийрэг алба хаагчийг явуулдаг юм. Монгол цэрэг гадаадын цэргээс цаг агаарын ямар ч нөхцөлд дасан зохицох чадвар, төмөр мэт хатуу сахилга бат, юмхнаар юм хийх монгол амьдрах арга ухаанаар илт ялгагдаж байсан бол өнөөдөр биеийн хүчээр ч илүү гэдгээ нотолж байна.
Бидэнд гадныхаас дутуу зүйл бий юу? Мэдээж бид дэлхийн өндөр хөгжилтэй орнуудын хэмжээнд хүртэл зэвсэглэл, техник, тоног төхөөрөмж, агсамж, хүн нэг бүрийн хэрэглэлээ сайжруулаагүй ч НҮБ-аас тавигддаг стандартад бүрэн нийцсэн 850 хүнтэй бие даасан мотобуудлагын батальон, цэргийн хээрийн II шатны эмнэлэг дэлгэн оролцуулж байна. Гадаад харилцаа, хамтын ажиллагаа урьд өмнө байгаагүйгээр өргөжин тэлж ирлээ. Алхам алхамаар урагшилсаар бид удахгүй дэлхийн жишигт нийцсэн зэвсэглэл, техниктэй болох бизээ.
Бидний өвөг дээдсийн маань халуун амь, бүлээн цусаар хамгаалагдаж ирсэн эх сайхан Монгол улсаа хамгаалалтгүй орхих эрх хэнд ч байхгүй. Монгол Улсад зэвсэгт хүчин хэрэггүй, бид цэргүүдийг дэмий хоосон тэжээж байна гэж ярьдаг, хэлдэг, сурталчилдаг хүмүүс яав ч Монгол цустай хүн биш! Бидэнд эх орноо хамгаалах эр цэрэг хэрэгтэй, эр цэрэгт маань төрийн хайр, халамж, зөв бодлого хэрэгтэй. Монгол Улс маань мөнхөд бат оршиж, монгол цэргийн сүр хүч үеийн үед мандан бадрах болтугай!

Б.Саран

Н.Лүндэндорж: Хуульч гэх хүн олон ч шүүгчид тэнцэх нь цөөн байна

magnai — Mon, 13 Apr 2015 09:12:10 +0800

Шүүхийн ерөнхий зөвлөлийн дарга, Хууль зүйн шинжлэх ухааны доктор, профессор Н.Лүндэндоржтой цаг үеийн асуудлаар ярилцлаа.

ДЭЛХИЙН ХАМГИЙН ХҮЧИРХЭГ АРМИУД

khaliun — Fri, 18 Jul 2014 09:42:19 +0800

Манай монголчууд геополитикдээ "дэндүү сайн”. Сүүлийн үед бүр ч "сайн” болж байгаа. Төмөр зам барьвал танк зөөгөөд оруулаад ирнэ гэдгийг нэг муухан мэдэхтэйгээ. Ямар ч гэсэн "дэлхийн хамгийн хүчирхэг армиуд” гэсэн тойм өгүүллийг орчуулан хүргэж байна. Оросын "Военное обозрение” сэтгүүлд Кирилл Рябов гэж нөхр