2017 оны 01-р сарын 12-ны өдөр "Манна хөгжил” ТББ-аас зудын хүнд нөхцөл байдалд буй мал бүхий иргэд, малчдад тусламж үзүүлээ. Тусламж олгох үйл ажиллагаанд аймгийн Засаг даргын орлогч Ч.Ганбат, "Манна хөгжил” ТББ-ын тэргүүн С.Чимгээ болон Баян-Уул сумын удирдлагууд оролцлоо. 2016 оны 10 дугаар сард  аймгийн Засаг даргын орлогч Ч.Ганбат "Манна хөгжил” ТББ-д хүсэлт тавьсны дагуу Баян-Уул сумын 180 өрхөд, Цагаан-Овоо, Баяндун, Сэргэлэн сумдын 90 өрх, нийт 270 өрхөд тусламжийн үйл ажиллагаа хүргэж буй юм.

2008 оноос хойш үйл ажиллагаа явуулж байгаа тус байгууллага нь малчдад зориулсан төсөл хөтөлбөрүүдийг хэрэгжүүлдэг бөгөөд, малжуулах, худаг гаргах, гамшгийн үеийн тусламж зэрэг төсөл хөтөлбөрүүдийг хэрэгжүүлэн ажилладаг. Мөнгөн дүнгээр нийт 70 гаруй сая төгрөгийн буцалтгүй тусламжийг олгож байгаа бөгөөд, нэг өрхөд хагас тонн нүүрс, шуудай түлээ, 25 кг гурил, 5 кг цагаан будаа болон өвлийн дулаан куртик хоёр ширхэг, дулаан гутал зэрэг тусламж үзүүллээ. Буцалтгүй тусламжийг айл өрхийн амьжиргааны түвшинг харгалзан олгож буй юм. Тус байгууллага нь өнгөрсөн онд Дорнод аймгийн Сэргэлэн, Хөлөнбуйр сумын түймрийн үеийн гамшигт нэрвэгдсэн 60 өрхөд тусламж үзүүлэн ажиллаж байсан юм.

Дорнод аймгийн хувьд өнгөрөгч аравдугаар сарын 03-наас эхлэн олон удаагийн давтамжтай  цас орсны улмаас цасны зузаан зарим сумдаар 25-30 см хүрчээ.  Тус аймагт гарсан Хаврын түймрээс болж өвсний гарц муу байсан, намар орой бороо их орж, цочир хүйтэрсний улмаас  хөрсөнд шингэж амжилгүй  их цасны дор мөстсөн нь малчдын өвөлжилтийн байдал хүндрэхэд хүргэжээ.

Дорнод аймгийн хэмжээнд 2016-2017 оны өвөлжилт, хаваржилтын бэлтгэл хангах ажил 96.6 хувийн биелэлттэй байгаа хэдий ч өвөлжилт хүндэрсэн энэ үед аймаг орон нутгийн зүгээс бололцоотой бүхий л арга хэмжээг авч ажиллаж байна. Орон нутгийн нөөц бололцооноос гадна тусламжийн  Олон улсын болон Төрийн бус байгууллагад хүсэлт тавьсан нь ийнхүү хэрэгжиж байгаа аж.

Төв аймгийн Баянчандмань сумын Баянчандмань уул, Дарцагийн аманд "Амин тоонто” төрийн бус байгууллагаас зургаа дахь жилдээ нарс мод тарьж байна. Өдөрлөгт төрийн бус байгууллагын 30 гаруй буриад залуучууд нийлж таван зуун ширхэг нарс модыг тарихаас гадна цэнгэг агаарт нэг өдрийг өнгөрөөсөн юм.

Сүүлийн таван жилийн хугацаанд арван мянган ширхэг хоёроос гурван настай нарс модны суулгацыг Баянчандмань ууланд "Амин тоонто” төрийн бус байгууллагаас тарьж байгаа ажээ. "Өнгөрсөн жил тарисан моднуудын үр дүнг тоолж үзэхэд 50 гаруй хувь ургасан” хэмээн "Амин тоонто” ТББ-ийн тэргүүн Б.Оюунбилэг хэлж байлаа. Иймээс дараа дараагийн мод тарихдаа үр дүнг голлон анхаарна хэмээн тэрээр хэлсэн юм.

Мөн энэ жил Баянчандмань ууланд мод тарих сүүлийн жил юм байна. Цаашид уг мод тарих өдөрлөгийг бусад аймаг орон нутагт үргэжлүүлэхээр төлөвлөж байгаа талаар зохион байгуулагчид онцоллоо.

Сонирхуулахад тэдгээр нарс модны суулгацыг Япон улсын хөрөнгө оруулалттай GNC төрийн бус байгууллагаас авч тарьж байгаа юм байна. Тэдгээр хоёроос гурван настай нэг нарс модыг 300-500 төгрөгөөр худалдаж авч тарьдаг аж. Тиймээс цаашид мод тарих ажил нь санхүүгийн ач холбогдолтой учраас сайн дурын үндсэн дээр бусад байгууллага хувь хүмүүстэй хамтарч ажиллахад бэлэн буйгаа зохион байгуулагчдын зүгээс илэрхийлж байлаа.

Дашрамд дурдахад, "Амин тоонто” буриад залуучуудын ТББ нь 2010 онд үүсгэн байгуулагдсан. Тус төрийн бус байгууллагад Хэнтий, Дорнод, Улаанбаатар, Төв аймаг, Сэлэнгэ, Булган, Хөвсгөл аймгуудын буриад залуучууд харъяалагддаг байна.

Т.Есүхэйтөмөр