Дорнод бүсийг амжилтаараа тэргүүлж яваа шилдэг 2 баг өнөөдөр туллаа. Тоглолт Канад улсын Онтарио мужийн Эйр Канад Центрт болсон ба таблайн эзэн Торонто Рэпторс нэмэлт цагт 112-104 харьцаатай нарлаг Майами Хит-ийг буулгаж авлаа.

Тоглолт эхнээсээ л гал гарсан онооны давамгайлал дээр доороо гаралцсан тоглолт болсон. Талбайн эздээс Дэмар ДэРозан 38 оноо 10 с.б.а 7 о.д гүйцэтгэж багаа тэргүүлсэн бол төвийн тоглогч Ионас Валанчюнас 20 оноо 10 с.б.а, шилдэг холбогчдын нэг Кайл Лаури 16 оноо 7 с.б.а гүйцэтгэжээ. Харин Майами Хит-ээс ирээд гайхалтай тоглолт үзүүлээд байгаа Жое Жонсон 28 оноогоор багаа тэргүүлсэн бол Луол Дэнг, Горан Драгич, Жастис Уинслов нар 10-аас дээш оноо авсан ч хангалтгүй байлаа. Самбарын мангас Хассан Уайтсайд сэлгээнээс гарч тоглосон ба 13 оноо 11 с.б.а хийж дабл дабл гүйцэтгэсэн. Багийн лидер Двэйн Уэйд баруун гуяны гэмтлийн улмаас тус тоглолтод оролцох боломжгүй болсон нь онооны зөрүү болсон гэж хэлж болно. Майами Хит нэмэлт цагт багаараа 7 оноо авсан бол талбайн эзэд 15 оноог авч тоглолтыг шийдсэн. Ингэснээр Торонто Рэпторс 44-20 гэсэн амжилттайгаар бүсийнхээ 2 байраа бататгаж байгаа бол Майами Хит 38-28 амжилттай 4 байрандаа хэвээрээ үлдлээ.

---