Зүүн бүсийн энэ аймгаас тухайн орон нутагт амьдрах нь битгий хэл нэг ч үзэгдэж харагдаагүй олон хүн Бага хуралд сонгогдсон. Тэдний нэг нь "Монгол тулгатны 100 эрхэм”-ийн хөтлөгч П.Анужин юм. Гэтэл аймгийн намын хорооны залуус нь Дорнодын жирийн гишүүдийг  төлөөлж чадахгүй хүнийг Бага хуралд сонгосон хэмээн эсэргүүцэж эргүүлэн татахыг шаарджээ. "Дорнод аймгийн төлөө нэг ширхэг ч тоосго өрөөгүй хүн бидний өмнөөс намын удирдах байгууллагад суугаад явж, энэ нь орон нутгийн залуусыг дорд үзсэн хэрэг” хэмээн эсэргүүцжээ.

 

П.Анужин нь өнгөрсөн их хурлаас Бага хуралд сонгогдсон. Үүнийг нь Р.Буд болон аймгийн намын хорооны даргын ажлаа өгөөд байгаа М.Бадамсүрэн нартай холбон ярьдаг.  Мөн залуус намын даргын асуудлаа хүртэл гаргаж тавихаар болжээ. Намын дүрмийг ноцтой зөрчсөн түүнд хариуцлага тооцох тухай Удирдах зөвлөлийн тогтоол өнгөрсөн 2-р сард гарсан ч одоо болтол биелээгүй хэрэгжээгүй байгаа аж. Намын дарга М.Энхболд, нарийн бичгийн дарга Булгантуяа, Хяналтын хорооны дарга Цагаанхүү нар нь аймгийн намын хороо буруу шийдвэр гаргасныг хүлээдэг.

 

Гэсэн ч дэд дарга Ёл нь хариуцлага тооцох шийдвэрийг хэрэгжүүлэхгүй, асуудлыг хэлэлцэх тэргүүлэгчдийн хурлыг зарлахгүй цаг хожиж байгаа гэнэ. Тэр хурлаас намын даргаа өгсөн, өдгөө  Засаг даргын зөвлөх болоод байгаа М.Бадамсүрэнг намаас хөөх эсэх асуудлыг шийдэх учиртай байж. Харин даргын үүрэг гүйцэтгэгч, дэд дарга Ёл нь бүтэн зургаан сар асуудлыг дарсан тул намаа шинэчлэх гэсэн залуусын тэвчээр барагджээ. Тэд М.Бадамсүрэнтэй хариуцлага тооцох, П.Анужинг Бага хурлаас татах асуудлыг тавихаар бэлджээ.