АН-ынхан өнгөрсөн долоо хоногт нэр хүндээ шо­роотой хутгав. Дахиад л ард түмний итгэлийг хөсөр гээв. Тод­руулбал, УИХ-ын гишүүн, Хууль зүйн байнгын хорооны дар­га Ш.Түвдэндоржийг ҮХАА-н сай­даар нэрлэж, гурван давхар дээл өмсгөх түүхэн шийдвэр гаргасан нь АН-ын нэр хүндийг тэр хэмжээгээрээ унагасан явдал боллоо. Тиймээс өнгөрсөн долоо хоногт УИХ дээр дуулиан тарьсан энэхүү томилгоог өнгөрсөн долоо хоногийн онцлох дуулианаар нэрлэж байна. Бүтэн нэг өдрийг зөвхөн энэ томилгооны асуудалд зориулж, МАН-ын ги­шүүд бүрэн бүрэлдэхүүнээрээ са­нал өгөхөөс татгалзаж, сайдын суу­далдаа суусан Ш.Түвдэндорж фракцийнхаа эсрэг хөдөлсөн зэ­рэг онцлох шалтгаан олонтой то­милгоо боллоо. УИХ-ын ги­шүүн Ш.Түв­дэндоржийн хувьд МоАХ фракцийнх. Гэхдээ энэ то­­милгоо хийгдсэнээр МоАХ фрак­цийнх уу, эсвэл Алтангадас бол­чихов уу гэдэг нь эргэлзээ да­гуулж байгаа юм. Фракцийн то­хи­рооны дагуу энэ томилгоог хий­сэн хэмээн мэлзэж байгаа ч МоАХ фракцийн тэргүүн Х.Бат­тулга өөрөө УИХ-ын гишүүн, сай­дын албан тушаал давхар ха­шихгүй гэх шийдвэр гаргаж сай­дын суудлаасаа сайн дураараа тат­галзсан, Ш.Түвдэндоржийг дэм­­жихгүй гэдгээ мэдэгдчихсэн бай­хад фракцийн тохироо гэх нэрээр оруулж ирсэн нь хард­лага дагуулж байгаа юм. Ш.Түв­дэн­дорж гишүүний хувьд ха­туухан хэ­лэхэд улс төрийн карьер нь и­нгээд дуусч байхыг ч үгүйсгэх ар­гагүй.

Улс төрд өч­нөөн олон жил болсон атлаа дав­хар дээл­нүүд нь дараагийн сон­гуульд яаж гай болох вэ гэд­гийг өөрөө хэлүүлэлтгүй мэ­дэж баймаарсан. Харамсалтай нь мар­гаашийн өөхнөөс өнөөдрийг ууш­ги дээр гэх сонголтыг тэр­бээр хийлээ. ҮХАА-н сайдаар түү­нийг дэмжих эсэх асуудалд МАН-ын гишүүд оролцоогүй. Өөрөөр хэлбэл, УИХ-ын гишүүн дав­хар албан тушаал хашихыг эсэр­гүүц­сэн тэдний үйлдэл зөв. Хэ­дийгээр хуулиар зөвшөөрсөн бай­лаа ч давхар дээлийг тайлна гэж эсэргүүцэн суудлаасаа буу­сан сайдын суудлыг хоёрын хоёр давхар дээлтэнд өгөх нь ёс­той байж боломгүй алдаа. МАН үүнийг мэдэж байгаа, энэ нь АН-ын эсрэг асар том сөрөг пиар болно гэдгийг олж харан са­нал өгөхөөс татгалзсан юм. Ш.Түв­дэн­­доржийг зүтгүүлэхгүй байх нь нэг талаас улс төрийн соёл. Дав­хар дээлийг эсэргүүцсэн сай­дын суудалд давхар дээлтнийг суул­гаж байгаа нь АН-ын хувьд хийж болох ноцтой алдаануудын хам­гийн том нь байлаа. АН-д ичих булчирхай байсангүй.

УИХ-ын 76 байтугай, ард түмэн бид хуу­лийг тэгтлээ дагаж мөрдөж яв­сан удаагүй. Зөрчих үедээ тэд ду­раараа зөрчиж чаддаг. Хуулийг гууль болгохдоо парламентын ги­шүүд гаршчихсан. Хүссэнээрээ л тайлбарлаж, хүссэнээрээ өөрчил­чих­дөг. Гэтэл УИХ-ын гишүүн дав­хар албан тушаал хашч болно гэж хуулиар заачихсан. Хуулиа да­гана хэмээн "өрөвдмөөр” төрх гар­ган АН дангаараа түүнийг зүт­гүүлсэн нь Ц.Нямдорж ги­шүүний хэлдгээр гэр бүлийн, найз нөхдийн найраа, бизнесийн асуу­дал явж байгаа юм. АН хэ­дий­гээр боловсон хүчний нөөц бо­лолцоогүй, энэ талаар учир ду­тагдалтай ч Ш.Түвдэндоржоос хавьгүй илүү залуучууд зөндөө байгаа. Номын дууг нь сонсоод ногоотой шөлийг нь идчихсэн өчнөөн сайхан залууст боломж олгож чадахгүй ийм томилгоо хийснээрээ АН ямар "жижигхэн” нам, фракциудын зөрчил нам дотроо ямар том асуудал болс­ныг ил тод харуулж байгаа юм. Тэгэхээр энэ бүх шүүмжлэл да­гуулсан үйл явдлаас хэл ам ба­гатай мултрах ганц гарц байгаа нь УИХ-ын гишүүнээсээ татгалзах яв­дал. Ш.Түвдэндорж гишүүний хувьд намын жагсаалтаар орж ир­сэн учраас  дахин сонгууль бол­но гэх мэт асуудал үүсгэхгүй.

Арынх нь хүн автоматаар орж ирэх учраас энэ салбарын ажлыг Х.Бат­тулга сайд шиг, магадгүй түү­нээс ч сайн явуулмаар байна. Тий­мээс би УИХ-ын гишүүнээсээ тат­галзаж байна гэсэн шийдвэр гар­гаж болмоор байгаа юм. Тэгж чад­вал ирэх сонгуулиар ирэх эл­дэв сөрөг пиараас мултарч дөн­гөх боломжтой. УИХ-ын ги­шүүн байгаад үзчихлээ. Хууль зүйн байнгын хороо даргалж пар­ламентад болохоос болохгүй нь хүртэл суучихлаа. Тэгэхээр ирэх сонгуулиар нам нь ялчихвал энэ том салбар дээр бат бөх хадагдах замаа эртнээс засч байхад ч болохгүй гэх газаргүй юм. Жагсаалтаар орж ирсэн ги­шүүн суудлаасаа татгалзлаа гээд парламентад төдийлөн хор хо­хи­рол учруулахгүй. Харин ч турш­лагатай эдийн засагч гэгдэх жаг­саалтын ард эрэмбэлэгдэж байгаа Ху­далдаа хөгжлийн банкны Гүй­цэтгэх захирал Б.Мэдрээд бо­ломж олгосноор сөрөг хүчний өм­нөөс жинтэйхэн хариу барьчих туршлагатай эдийн засагчаар бүл нэмэх билээ.

Ш.Түвдэндорж гишүүн ирэх жилүүдэд УИХ-ын үйл ажиллагаа, дээрээс нь нэмээд ҮХАА-н салбарыг самарлаа гэж хэлүүлэх бус дан ганцхан сайдын ажилдаа анхаарал хандуулж ажил­­лавал эргээд дэмжээгүй хаяж гарсан МАН-ын гишүүдээс ч ам асуух боломж бүрдэх бус уу. Давхар дээлээс татгалздаг хэ­­мээн Ш.Түвдэндорж гишүүд хэв­­лэлд өгсөн ярилцлагадаа дурьд­­сан байдаг. Тэгэхээр ги­шүү­нээ­сээ татгалзаж энэ байр суу­риа хамгаалах, эс бөгөөс ирэх сон­гуульд өндийх аргагүй болтлоо "бөм­бөгдүүлэх” сонголтын өмнө ир­чихээд байна. Ард түмэн тэнэг биш, Ардын нам ч энэ явдлыг мар­тахгүй гэдэг нь тодорхой. Хашир улс­төрчийн хувьд наад захын улс төрийн соёл гаргана гэж найдъя.