Аймгийн төвийн худалдаа үйлчилгээний төвлөрсөн хэсэг, тээврийн хэрэгсэл, иргэдийн хөл хөдөлгөөн ихтэй "Шүр” захын орчмын замын хөдөлгөөний аюулгүй байдлыг хангах, ачааллыг бууруулах, иргэд тээврийн, хэрэгслийн чөлөөтэй зорчих нөхцөлийг бүрдүүлэх зорилгоор 03 дугаар сарын 01-ний өдрөөс эхлэн хот хоорондын, аймаг, сум хоорондын нийтийн зорчигч, ачаа тээврийн үйлчилгээ үзүүлдэг тээврийн хэрэгслийг замын хөдөлгөөнд саад болохгүйгээр зохион байгуулж, "Шүр” захын зүүн талд зориулалтын дагуу тохижуулсан хашаа, талбайд зогсоох ажлыг хэрэгжүүлэн ажиллахыг аймгийн Засаг даргын 2014 оны 02 дугаар сарын 26-ний өдрийн А/84 дүгээр захирамжаар аймгийн Тээвэр, авто замын газрын дарга Э.Батхүү, Хэрлэн сумын Засаг дарга бөгөөд Чойбалсан хотын захирагч Ж.Энхцэцэг нарт үүрэг болгожээ. Мөн тус захирамжаар замын хөдөлгөөний хууль, тогтоомж дүрэм журмын дагуу дээр дурдсан газарт тээврийн хэрэгслийг зогсоох "Шүр” захын ойролцоох замын хөдөлгөөний үйл ажиллагаанд зохицуулалт, зохион байгуулалт хийх, хяналт тавьж ажиллахыг аймгийн Цагдаагийн газрын Замын цагдаагийн тасгийн дарга, цагдаагийн дэд хурандаа Б.Батсүхэд даалгажээ.

 

Хот хоорондын, аймаг, сум хоорондын нийтийн зорчигч, ачаа тээврийн үйлчилгээ үзүүлдэг тээврийн хэрэгслийн нэгдсэн зогсоолыг дүрэм журам, стандартын дагуу тохижуулах орчин нөхцөлийг хангаж ажиллахыг "Дорнод худалдаа” ХХК-ийн захирал Д.Шинэбаярт даалгаж захирамжийг хэрэгжүүлэн ажиллахыг үүрэг болгожээ. 2014 оны 03 дугаар сарын 03-ны өдөр Аймгийн Засаг дарга С.Ганбат, холбогдох албаны удирдлагуудтай тус захирамжийн хэрэгжилттэй газар дээр нь очиж танилцлаа. Хөдөө орон нутагт тээвэр эрхлэгч нартай уулзаж тэдний санал сэтгэгдлийг сонссон юм. Аймаг орон нутгаас хийж хэрэгжүүлж байгаа ажил замын хөдөлгөөний аюулгүй байдлыг хангах, ачааллыг бууруулах, иргэд тээврийн, хэрэгслийн чөлөөтэй зорчих нөхцөлийг бүрдүүлэх зорилготой тус ажлыг дэмжиж байгаагаа жолооч нар илэрхийлж байлаа.  Ингэснээр хөдөө орон нутгийн тээврийн хэрэгслээр үйлчлүүлэгч нар "Шүр” захын зүүн хойд талд байрлах, зогсоол дээрээс үйлчлүүлэх боломжтой болж байгаа юм.