Монгол Улсын төрөөс амжилт гаргасан иргэддээ олгодог одон, тэмдгийг Хятад улсын Эрээн хотын зах дээр зарж байна гэсэн мэдээллийн дагуу Шударга өрсөлдөөн хэрэглэгчийн төлөө газрынхан, Эрээн хотын Үйлдвэр худалдааны товчооны байцаагч нартай хамтран шалгалт хийжээ. Шалгалтаар боловсролын тэргүүний ажилтан, биеийн тамир, спортын тэргүүний ажилтан, тэргүүний барилгачин, Шүүхийн шийдвэр гүйцэтгэх газрын ажилтны үнэмлэх, тэмдгийг зарж байсан нь илэрсэн байна.

 

Тиймээс одон тэмдгүүдийг зарж буй лангуунуудыг хаасан байна. Энэ талаар ШӨХТГ-ын дарга Т.Аюурсайхан хэлэхдээ, "Засгийн газрын гишүүний шийдвэрээр олгодог шагнал, тэмдгүүдийг зарж байгаа үйлдлийг газар дээр нь таслан зогсоолоо. Энэ асуудлыг Үйлдвэр худалдааны товчоо нь шалгаж, нягталж үзээд манайд мэдэгдэнэ гэсэн. Тиймээс Эрээний талаас шалгасны дараа ямар хариу арга хэмжээ авахыг мэдээлэх болно. Мөн Шүүхийн шийдвэр гүйцэтгэх газрын ажилтны үнэмлэх, тэмдэг борлуулагдаж байгаа нь үнэхээр ноцтой асуудал. Уг байгууллагын одон тэмдгийг хэн нэгэн этгээд худалдаж аваад зүй бус зүйлд ашиглах асуудал гарч магадгүй. Иймд энэ асуудлыг бүрмөсөн таслан зогсоох ёстой гэсэн байр суурьтай байна" гэжээ.

 Б.ЦЭНД-АЮУШ /ҮНДЭСНИЙ ШУУДАН/

---