Дорнод аймгийн Хавирга-Ар хашаатын хилээр иргэд өөрсдийн унаагаар чөлөөтэй нэвтрэх боллоо. Саяхан болтол факс явуулж хариу ирүүлж нэлээд чирэгдэлтэй байсан асуудал нэг тийш шийдэгдэв. Өнгөрөгч өдрүүдэд МУ-ын Засгийн газрын шийдвэрээр БНХАУ-тай холбоотой хилийн боомтын асуудлаар ажлын хэсэг томилогдон Дорнод аймагт харьяалагддаг Сүмбэр-Рашаантын,  Баянхошуу-Өвдөгийн, Хавирга-Ар хашаатын боомтод ажилласан байна. Дээрх ажлын хэсэгт Дорнод аймгийг төлөөлж оролцсон аймгийн ЗДТГ-ын дарга П.Бат-Өлзийгөөс энэ тухай тодруулахад:
Манай аймаг БНХАУ-тай 4 боомтоор хиллэдэг. 3 нь газрын, нэг нь агаарын боомт. Эдгээр боомтын үйл ажиллагааг түргэн шуурхай болгох, хүндрэл бэрхшээлийг арилгах зорилгоор хоёр талын холбогдох хүмүүс оролцсон гэрээ хэлцлийг хийлээ. Хэд хэдэн асуудал шийдэгдсэний дотор манай иргэд, ялангуяа Дорнодынхон ихээр зорчдог Хавирга-Ар хашаатын боомтоор хил нэвтэрлээ гэхэд цаашаа Хятадын нутаг дэвсгэрээр явах асуудал хязгаарлагдмал байсан.
Энэ асуудлыг Хятадын талтай ярьж тохиролцсоноор машины зөвшөөрөл факс гэлгүйгээр манай иргэд Хөлөнбуйр аймгийн Хайлаар хот, Хянган аймгийн Улаан хот, Шилийн гол аймгийн Шилийн хот хүртэл өөрсдийн унаагаар чөлөөтэй зорчих боломжтой боллоо.
Мөн Халх голын Баянхошуу-Өвдөгийн боомтыг түшиглэсэн "Чөлөөт бүс” байгуулах асуудлаар харилцан тохиролцож шийдэлд хүрсэн. Тухайлбал, хөдөө аж ахуйн чиглэлийн бүтээгдэхүүн гаргах, Дорнод аймагт хөдөө аж ахуйн бүтээгдэхүүн боловсруулах үйлдвэр байгуулах гэхчлэн асуудал энд яригдсан ч цаашлаад эдийн засгийн болон аялал жуулчлалын чиглэлээр өргөжүүлэх боломжтой гэдэг дээр санал нэгдсэн гэв.