Дорнод аймагт мал эмнэлгийн шинжлэх ухаан үүсэж хөгжсөний 90 жил, хувийн хэвшлийн мал эмнэлэг үүсэж хөгжсөний 20 жилийн ойг тохиолдуулан аймгийн Хүнс, хөдөө аж ахуйн газар, Улсын мал эмнэлэг үржлийн газар, Дорнод аймгийн Мал эмнэлгийн холбоо хамтран "Мал эмнэлгийн тулгамдсан асуудал, шийдвэрлэх арга зам” онол, үйлдвэрлэлийн бага хурлыг өнөөдөр зохион байгууллаа.
Нээлтэд аймгийн ИТХ-ын дарга Л.Хишигтогтох, Засаг дарга М.Бадамсүрэн нар оролцож ойн баярын мэнд дэвшүүлж, Онол, үйлдвэрлэлийн бага хуралд  амжилт хүсэв.
Хурлаар аймгийн Мал эмнэлгийн хөгжил, өнөөгийн байдал, тулгамдаж буй асуудал, Монголын мал эмнэлгийн салбарын өнөөгийн байдал, аймагт оношлогдож буй халдварт, гоц халдварт өвчний гаралт, тархалт, цаашид авах арга хэмжээ, гарсан халдварт өвчнүүд, тэдгээрийн онцлог, авсан арга хэмжээ, сургамж зэргийн талаар  хэлэлцлээ.

Мөн үеэр салбартаа амжилт бүтээл гарган ажилласан хүмүүсийг шагнаж урамшуулан, мал эмнэлэг үржлийн тасгууд,  хувийн малын эмнэлэг, эмч нар зэрэг 70 гаруй хүнд хөдөлмөр хамгааллын хувцас, нэг удаагийн халдвар хамгааллын хувцас, дээж хадгалах, зөөвөрлөх хөргөгч хөргүүр зэрэг 30 орчим сая төгрөгийн зүйлсийг гардуулав.

---