Ерөнхий сайд Ч.Сайханбилэгийг огруулах асуудлыг УИХ-ын Төрийн байгуулалтын байнгын хорооны хуралдаанаар хэлэлцэх гэтэл нэг гишүүний ирц дутсан. Ирцийг яаралтай бүрдүүлж, Ерөнхий сайдын танхимыг унагах эсэхийг шийдэхээр УИХ-ын дарга З.Энхболд яаравчилж хэлэлцэх асуудлын дараалалд байхгүй асуудлыг буюу байнгын хорооны гишүүдийг сэлгэн томилох шийдвэрийг гаргасан юм. Өөрөөр хэлбэл УИХ-аас саналыг нь авалгүйгээр Н.Батцэрэг гишүүнийг Төрийн байгуулалтын байнгын хорооны гишүүнээс хасч, оронд нь Г.Батхүү гишүүнийг оруулж ирсэн нь УИХ-ын гишүүний бүрэн эрх, УИХ-ын дэгийн тухай хуулийг зөрчиж байна гэж гишүүд үзсэн. УИХ-дахь МАН-ын бүлгийн дэд дарга Н.Номтойбаяр "УИХ дахь "Шударга ёс” эвслийн дарга Н.Батцэрэг гадаадад томилолтоор явж байгаа. Энэхүү хүсэлтийг гишүүн бичгээр гаргаад бүлгийн шийдвэрээр УИХ-д тогтоолын төсөл өргөн барих ёстой. Гадаадад томилолттой байгаа хүн бичгээр саналаа гаргах боломжгүй шүү дээ. Энэ бол гишүүний бүрэн эрх, УИХ-ын Дэгийн тухай хуулийг ноцтой зөрчиж байна. Мөн УИХ-ын дэгийн тухай хууль, УИХ дахь бүлэг аливаа хэлэлцэж байгаа асуудлаар завсарлага авах бүрэн эрхтэй. Манай бүлгээс байнгын хорооны бүрэлдэхүүнд өөрчлөлт оруулах асуудалд завсарлага авах гэсэн боловч УИХ-ын дарга энэ саналыг хүлээж авсангүй. Энэ бол З.Энхболд дарга хуулийг ноцтой зөрчиж байгаа асуудал юм” гэж мэдэгдээд байсан юм.

Өөрөөр хэлбэл УИХ-ын гишүүн байнгын хорооны гишүүнээс чөлөөлөгдөх бол дээрх хуулиудын дагуу хүсэлтээ заавал бичгээр гарган өгөх ёстой байдаг. Гэтэл  Н.Батцэрэг гишүүнийг өргөдлөө өгөөгүй байхад, эсвлээс өгсөн хүсэлтийг хүлээн авч шийдвэрлэсэн нь УИХ-ын дарга З.Энхболдыг хууль зөрчсөн гэдгийг нотолж буй аж. Энэ талаар УИХ-ын гишүүн Н.Батцэрэг "Байнгын хорооны гишүүнээс татгалзаж, өөр байнгын хороонд томилох тухай надтай ярилцаагүй. Тэр үед агаарт нисч явсан учраас боломжгүй ч байсан юм. Гэхдээ надаас асуусан бол зөвшөөрөх л байсан” гэх байр суурийг илэрхийлсэн байна.

Энэхүү хариултаас харахад байнгын хорооны гишүүдийг сэлгэсэн УИХ-ын дарга З.Энхболдын шийдвэр, энэхүү хүсэлтийг гаргасан УИХ дахь "Шударга ёс” эвслийн бүлгийн дарга З.Баянсэлэнгэ нар хууль зөрчсөн нь тодорхой болж байна.

Д.ЖАРГАЛ

zaluu.com

---