Дуучин П.Баярцэнгэлтэй ярилцлаа. 

-Зуныг хэрхэн өнгөрүүлж байна даа?
-Энэ зун миний хувьд завгүй өнгөрч байна. Хөдөө орон нутгийн тоглолт их байлаа. Одоо ч гэсэн тоглолтоор явах гэж байна. Нэг их амарсангүй.
-Аль нутгийнх вэ. Нутагтаа энэ жил очив уу?
-Би Дорнодын унаган хүн. Нутагтаа саяхан очиж, долоо хонохдоо аймгийнхаа наадамд оролцсон. "Яг түүн шиг” шоун дээр монголчууд тэр аяараа намайг дэмжсэн. Түүний дунд дорнодчууд маань илүүтэй их дэмжиж, санал өгсөн болов уу гээд нутгийнхандаа бэлэг барьсан. Нутгийнхан маань сайхан хүлээж авсан.
-Уран бүтээл, тоглолт гээд зав­гүй байна гэлээ. Шинэ уран бүтээлийнхээ ажилд ор­чих­сон уу?
-Шинэ дуунууд хийж байна. Бэлэн болчихсон ч дуунууд бий. Гол нь тоглолт, киноны ажил гээд клип хийж амжихгүй байна. Уг нь энэ намар тоглол­тоо хийе гэж төлөвлөсөн бо­ловч киноны ажилтай болоод тог­лол­тоо хойшлууллаа. Киноны зураг авалт есдүгээр сард эхэлнэ.
-Ямар кинонд тоглох гэж байна. Өмнө нь "Анчид”, "Ми­ний хайр” зэрэг кинонд тог­лож байсан?
-Энэ удаагийн шинэ киноны зураг авалт ч эхлээгүй байгаа учраас мэдээлэл өгөх цаг нь болоогүй байх.
-"Яг түүн шиг” шоу Мон­голын үзэгчдийг байлдан дагуулсан шүү дээ. Шоуны ялагч болсны дараа өөрт тань ямар өөрчлөлт мэдрэгдэв. Жи­­шээлбэл, үзэгчдийн ханд­лага өөрчдлөгдөж үү?
-Уран бүтээлч хүний өөрий­гөө хэмжих хэмжүүр бол алга ташилт. Шоунд оролцохоос өмнө уралдаан тэмцээнд оролц­сон, уран бүтээлээ хүргэж байснаар минь хүмүүс сайхан хүлээж авдаг байсан. Гэвч би сүүлийн үед уран бүтээлээ шахуу хийж чадаагүй, түр зав­сарласан байсан. Харин шоун­даа орсны дараа үзэгчдийн алга ташилт маш их нэмэгдсэн. Үүнээс үндэслээд шоу маань монголчууд үзэх юмтай болсон тө­дийгүй, оролцогчдодоо үр өгөөжтэй сайхан болжээ гэж дүгнэсэн.
-Анх "Universe best songs”-д орж олонд танигдаж байсан. "Яг түүн шиг”-т орсноор илүүтэй танигдсан ч гэж хэлж болохоор. Та теле­визийг шоуг юу гэж боддог вэ?
-Телевизийн шоуг би хөг­жих боломж гэж хардаг. Янз янзын шоунд орж, өөрийгөө сорьс­ноор аль аль талаараа хөгжих боломжтой.
-Шоуны үеэр ямар дүр бүтээх нь хамгийн хэцүү байсан бэ?
-Дуулахад хамгийн хэцүү нь Витас байсан.
-Витас тун өвөрмөц авиаг гаргаж чаддаг авьяастай дуучин. Таны хувьд тэр авиаг гаргахад хэцүү байв уу?
-Хамгийн хэцүү нь содон авиа гаргах. Эхлээд дуулах гэхэд их хэцүү санагдсан. Витасыг сугалсандаа ч их харамссан. Дуулж чадахгүй хүн байна гээд. Гэхдээ хүний хоолой яс биш, булчин учраас хөгждөг юм байна лээ. Эхний өдрийнхөөс дараагийн өдөр арай дээрдсээр долоо хоногийн төгсгөлд гайгүй болсон.
-Хамгийн дөхүү нь Бруно Марс байсан байх. Өөрөө сонгосон шүү дээ?
-Бруно Марсын дууг дуулах бас хэцүү байсан. Энгийн үед сонсч байхдаа анзаардаггүй бай­сан ч яг дуулах гэхэд эвгүй бай­лаа. Дуу нь өөрөө гоё. Дуу­лалт жүжиглэлт гээд хийх зүйл ихтэй байсан учраас сонгосон. Бруно Марс бол ми­ний сүүлийн хөзөр байсан. Азаар тамга байж таарсан (инээв).
-Сүүлд таны фэйсбүүкээр дуучин Улаанцэцэгтэй хайр сэт­гэлийн холбоотой гэсэн статус гарч ирсэн. Энэ талаар тайл­барлахгүй юү. Зарим хүн хамтарч хийж байгаа шинэ дуу­гаа сурталчилж байна ч гэх таамгийг дэвшүүлсэн байна лээ?
-(Инээв) хүмүүс яаж тийм содон таамаг гаргасан юм бол. Тийм зүйл байхгүй. Би чинь гэр бүлтэй хүн. Сурталчлах бай­сан ч тийм маягаар лав биш. Үнэндээ, би фэйсбүүкийнхээ нууц үгийг алдчихсан. Хэн тийм зүйл хийснийг олоогүй л байна. Энэ цагаас хойш фэйсбүүкийг ашиглахаа больсон. Ахиж хэзээ ч фэйсбүүк ашиглахгүй.
-Яагаад. Дуучин, жүжиг­чин гэх мэт олны танил хү­мүүс олон нийтийн сүлжээг үзэгч, сонсогчидтой ойр байх, үйл ажиллагаа, уран бүтээлээ сурталчлах хэрэгсэл болгодог шүү дээ. Энэ нь ч үр дүнгээ өгөөд байх шиг санагддаг?
-Би угаасаа фэйсбүүкт идэвх­­тэй байгаагүй. Тий­мээс больсон. Үүнийг би найзууд­тай­гаа харилцах хэлбэрээр ашиг­ладаг байсан. Ер нь фэйсбүүк бол маш их цаг авдаг. Хүн чөлөө зав гараад суухаараа л фэйсбүүк ухдаг зуршилтай болчихдог юм шиг санагддаг. Уран бүтээл, ажлаа хийгээд хөгжөөд явахын оронд фэйсбүүк ухаад суух нь утгагүй санагдаад ашиглахгүй гэж шийдсэн. Тэрний оронд ном уншиж байвал надад илүү.
-Чөлөөт цагаа хэрхэн өн­гө­рүүлдэг вэ?
-Гэр бүлийнхэнтэйгээ л хамт байх тустай. Уг нь энэ зун гэр бүлийнхэнтэйгээ сайхан амаръя гэж бодсон боловч чадсангүй.
-Хүнд үе тохиолдоход хэр­хэн давж гардаг вэ?
-Миний гэр бүлийнхэн байна. Би бол баян хүн. Юу­гаараа баян гэхээр миний хань, миний ээж, аав, хадам аав, ээж, ах эгч, найзууд гээд бүхэн бий. Эд бүгдийнхээ хүчээр би бүхнийг даван туулдаг.
-Амьдралдаа баримталдаг зарчим?
-Зөв санаа, зөөлөн сэтгэлтэй байхыг хүсдэг.
-Арван жилийн өмнөх Баярцэнгэл, одоогийн Баяр­цэнгэлийн хооронд зан аран­шин, үзэл бодлын хувьд ямар ялгаа гарсан бол?
-Зан аашийн хувьд өөрч­лөг­дөөгүй. Би өмнө нь ямар байсан, яг тэр хэвээрээ л байгаа. Цаашид ч ийм байх болно.
-Олны танил болоод хү­мүүсийн хараанд өртөөд ирэхээр ямар байдаг вэ?
-Хүн ганц л амьдарна ш дээ. Бусдыг эргэж хартал амь­дар гэдэг. Түүнд л зорьж яваа. Тэр минь ч хэрэгжиж бай­гаа гэж боддог. Хийж бү­тээ­гээд, тэр минь олонд хүрч бай­­гаа учраас хүмүүсээс янз бү­рийн л хандлага гарна. Олонд танигд­сан байх сайхан. Муу­гаа­саа сайн нь илүү. Муу коммент ирж л байдаг. Түүнийг даваад га­рахыг л боддог. Хүмүүс олны танил болоод ирэхээр хү­ний зан ааш өөрчлөгддөг гэдэг. Тэр бол хажуу дахь хү­нээс нь л шалтгаалдаг гэж бод­дог. Хүн л хүнийг эвддэг шүү дээ. Тиймээс найз нөхдөө зөв сон­гох хэрэгтэй. Ялангуяа эр хүнд найз нөхөд гэдэг маш чухал.

Б.Бадамгарав Ардын эрх сонин