УИХ-ын гишүүн, Зам Тээврийн Сайд асан, "Голомт" банкны томоохон хувь эзэмшигч Мөнхчулууны Зоригт хэмээх өөрийнхөө амьдарч яваа эрийг Монголчууд андахгүй. Хэнийг ч ялгалгүй  нэг л янзаар харьцдаг, санаж бодож буйгаа ямар ч хаалтгүй шуудхан илэрхийлчихдэг, хээгүй гүдэсхэн түүнд сошиал ертөнцийнхөн ч ам сайтай байдаг. М.Зоригт ч өөрөө идэвхтэй сошиал  медиа хэрэглэгч төдийгүй түүний нийгмийн амьдрал хэн бүхний нүдэн дээр л ил байдаг.

УИХ-ын 2016 оны сонгуулиас хойш тэрээр "Шүүдэр дундуур" хэмээх бүрэн хэмжээний уран сайхны киног бүтээж, продюсерээр нь  ажиллахын сацуу "Хадлан" нэртэй өөрийн брэндийн дээл хүртэл гаргаад буй. Харин  УИХ-ын 2016 оны сонгуулийн үр дүнгээр байгуулагдсан,  Ерөнхий сайд  Ж.Эрдэнэбатын удирдсан Засгийн газарт тэрээр тун шүүмжлэлтэй хандаж буй юм. Гэсэн ч аливаа зүйл сайнтай, муутай байдгийн адилаар М.Зоригт  энэ Засгийн газрыг анх удаа үнэлсэн байна.

Тодруулбал : Зам Тээврийн Хөгжлийн дэд сайд Б.Цогтгэрэл Оросын талтай ойлголцолд хүрч,  Монгол улсын 35.6 сая ам доллараар худалдан авч, 5 жил гаруй "тоосонд дарагдан хэвтсэн" төмөр замын таван зүтгүүрийг ашиглахаар болсон шийдвэрийн тухай тэрээр : "Энэ засгаас анх удаа сайхан мэдээ сонсож байна. Баярлалаа" хэмээн өөрийн twitter хуудсандаа бичжээ.

                                                                                                                                         П.Энхмандах

                                                                                                                                             sonin.mn

 

---

URL: https://www.choibalsan.mn/index.php?newsid=21261