Үндэсний их баяр наадмын сорилго барилдаан өнгөрөгч бямба гарагт Монгол бөхийн өргөөнд болж өндөрлөлөө. "Ард даатгал” ХХК-ний 20 жилийн ойд зориулсан Ардын хувьсгалын 93 жил, Үндэсний их баяр наадмын сорилго барилдаанд Улсын арслан Д.Ганхуяг, Улсын гарьд Ж.Бат-Эрдэнэ, Улсын заан Б.Сайнбаяр, Т.Санчир, Б.Батмөнх, Улсын харцага Ө.Бат-Орших, А.Цацабшир, Ц.Содномдорж, Ж.Амартүвшин, Н.Батсуурь, Улсын өсөх идэр начин Ц.Лхагвасүрэн, Ж.Отгонбаяр, Ж.Оргил нараар магнайлуулсан улс аймгийн алдар цолтой 224 бөх зодоглов.
2014 оны сорилго барилдаанд Хөвсгөл аймгийн Тосонцэнгэл сумын харьяат Хилчин спорт хороо, Хөвсгөлийн хүчтэн дэвжээ, Монос группийн бөх улсын харцага Ц.Содномдорж түрүүлж, Төв аймгийн Баянхангай сумын харьяат Хилчин спорт хороо, Дүнжингарав дэвжээний бөх Улсын заан Б.Батмөнх үзүүрлэлээ.

Их шөвгийн дөрөвт Өвөрхангай аймгийн Баруунбаян-Улаан сумын харьяат Их Монголын хүчтэн дэвжээ, АПУ компаний бөх Улсын арслан Д.Ганхуяг, Увс аймгийн Улаангом сумын харьяат Увснуур дэвжээний бөх Улсын харцага Ө.Бат-Орших нар шалгаран үлдэв. Дунд шөвөгт Улсын гарьд Ж.Бат-Эрдэнэ, Улсын харцага А.Цацабшир, аймгийн арслан Б.Бат-Эрдэнэ нар үлдэж, тус шөвөгт шалгарсан Булган аймгийн Гурванбулаг сумын харьяат Булганхангайн хүчтэн дэвжээний бөх аймгийн арслан Б.Бат-Эрдэнэ"Уран барилдаан"-ы шагнал хүртлээ.

---