ОХУ Украинд халдан довтлосноос хойш 15 сар гаруйн хугацаа өнгөрч байна. Путин Украинд эхлүүлсэн дайнаа цэргийн тусгай ажиллагаа хэмээн нэрлэж байсан бол сүүлийн үед  "дайн" гэдэг үгийг илүү олон удаа хэрэглэх болжээ. Путин өнгөрсөн оны хоёрдугаар сарын 24-нд Украин руу цэргээ оруулахдаа үүнийг "цэргийн тусгай ажиллагаа" гэж нэрлэсэн бөгөөд Кремль, Оросын сайд нар болон төрийн хэвлэл мэдээллийнхэн дагаж мөрдөж байсан, тэр ч бүү хэл "SVO" хэмээх Оросын шинэ товчлол бий болгосон. Гэвч Оросын тал Украины нисгэгчгүй онгоц Москвад томоохон халдлага үйлдсэн гэж мэдэгдсэний хариуд Путин өнгөрсөн долоо хоногт Украинтай холбогдуулан мэдэгдэл хийхдээ дөрвөн удаа "дайн" гэсэн үгийг ашигласан байна.

Тавдугаар сарын 9-ний Ялалтын өдөр Дэлхийн хоёрдугаар дайнд Зөвлөлт Холбоот Улс нацист Германыг ялсныг дурсах үеэр Путин Улаан талбайд ахмад дайчдад хандан "Манай эх орны эсрэг жинхэнэ дайн дахин эхэллээ” гэж хэлжээ. Тус улсын Батлан ​​хамгаалахын сайд Сергей Шойгу, Кремлийн хэвлэлийн төлөөлөгч Дмитрий Песков, Гадаад хэргийн сайд Сергей Лавров, Вагнерын хөлсний цэрэг Евгений Пригожин нар бүгд олон нийтийн өмнө дайн буюу оросоор "воина" гэдэг үгийг ашиглах болсон. Сүүлийн хэдэн долоо хоногт халдлагад өртсөн ОХУ-ын Белгород мужийн захирагч Вячеслав Гладков "Бид үндсэндээ дайны нөхцөлд амьдарч байна” хэмээсэн. Олон нийтийн дунд ч гэсэн дайныг хүлээн зөвшөөрч байгаа нь олон зүйлээс харагдаж байна. Дайны тухай эвфемизм нь шинэ зүйл биш юм. АНУ-ын Ерөнхийлөгч Линдон Б.Жонсон Вьетнамын дайнд оролцохдоо "хязгаарлагдмал цэргийн ажиллагаа" гэж дүгнэсэн бол 2001 онд АНУ Афганистан руу довтолсон үйлдлийг АНУ-ын Ерөнхийлөгч Жорж В.Буш "Тогтвортой эрх чөлөөний ажиллагаа" гэж нэрлэсэн.

https://news.yahoo.com/finance/news/russia-talk-war-ven-putin-060003752.html

---