Хулсны баавгай бамбаруушаа тэврээд яг л хүн шиг явж байна. Сайн ажвал биш юм. Том баавгай нь хувцас өмссөн амьтан хамгаалах хүрээлэнгийн ажилтан ажээ. Тэд бамбаруушийг байгальд буцаан тавьж байгаа нь энэ юм. Бамбарууш зэрлэг байгальд амьдрахын тулд хүнтэй "ойртож” болохгүй, тэдний талаар "мэдэж” болдоггүй юм байна. Хэрвээ хүнийг хараад өөрт нь эелдэг хандаж байгааг мэдэрчихвэл бамбаруушанд муу аж. Яагаад гэвэл, үүнээс болж хүнээс зугтах зөн мэдрэмжээ алдаж улмаар хулгайн анчдад хөнгөн олз болдог юм байна. Тиймээс бамбаруушнуудыг зөөхдөө ажилчид заавал хулсны баавгайн дүрстэй хувцас өмсдөг. Эдүгээ Хятадын Сычуань дахь судалгаа, шинжилгээний төвд хулсны баавгайг хамгаалах ажил амжилттай өрнөж байгаа билээ.

 

Хулсны баавгай бол нэн ховордсон амьтан. Дэлхийд нийтдээ 1600 гаруй баавгай байдгийн олонхи нь Хятадын төв хэсэгт амьдардаг. 120 нь амьтны хүрээлэн болон судалгааны төвд байдаг. Энэ амьтан хулс, өвс, ургамал, зарим тохиолдолд махаар хооллодог. Харин амьтны хүрээлэнгийн тэжээмэл баавгай жимс, зөгийн бал, загасаар хооллодог байна. Уг нь луу Хятадын бэлэг тэмдэг байдаг бол сүүлийн үед панда албан бусаар бэлэг тэмдэг нь болоод байна.

Н.ЭНХ 

---