Буурал тивийн будант Альбионы нэгэн гайхамшигт улирал хөшгөө татлаа. "Үнсгэлжингийн үлгэр" биеллээ олж "Лэстэр сити" клуб лигийн аваргаар анх удаагаа тодорч гайхамшиг бүтээв. Олон жил цөөхөн хэдэн багийн ноёрхол доор байсан Премьер лиг ийнхүү шинэ аваргатай боллоо. Улирлын эхнээс гайхуулж эхэлсэн тэднийг "түр зуур"-ын амжилт хэмээж байсан ч Раньеригийн шавь нар бүх хүч чадлаа шавхан зүтгэсээр энэхүү амжилтад хүрсэн юм. Сүүлийн тоглолтоо өмнөх жилийн аварга Челситэй хийн 1-1 харьцаагаар тэнцсэн.

Энэ улиралд Топ хэмээн өргөмжилдөг багууд дэндүү муу байсан нь тэдний амжилтад нөлөөлсөн. Өмнөх жилийн аварга "Челси"-д юу тохиолдсоныг зөвхөн өөрсдөө мэдэх биз ээ. Ж.Моуриньо П.Чех, Ф.Лампард зэрэг олон лидерүүдээ багаасаа явуулж, Латин Испани тоглогчид олноор ирсэн нь энэ багийн уналтын эхлэл болсон бололтой. Тэдний хувьд Европын тавцанд тоглох боломжгүй болсон бөгөөд 10 байрт шалгарав. Мөн "Манчестер Юнайтед" клубт эргэн сэргэхэд олон жил шаардлагатай байгаа бололтой. Энэ жил Луй ван Гааль юу хийж чадсангүй, баг нь 5-р байраар шалгарч, Европа лигт хүч үзэхээр болжээ. Тоттенхэм клубт түрүүлэх боломж байсан ч сүүлийн хэдэн тойрогт орон гаран тоглосоор боломжоо үгүй хийлээ.

Английн "Их буучид буюу Арсенал" клубт энэ жил түрүүлэх сайхан боломж гарсан ч улирлын дундаас тэргүүллээ алдаж, оноогоо нөхөж чадалгүй байсаар эцсийн мөчид 2-р байрыг өөрийн болгов. "Манчестер Сити", "Ливерпуль" клубууд ч бас сайн байсангүй. Мэргэн буучийн өрсөлдөөнд Тоттенхэмийн Харри Кэйн тэргүүлж 25 гоол хийсэн бол Ж.Варди, С.Агуеро нар 24 гоолоор удаалав.

"Астон Вилла", Ньюкасл", "Норвич" клубууд доод лиг руу унахаар болжээ.

zaluu.com