Монголын төрөөс хүний байгуулсан гавьяаг үнэлж олгодог одон медалиуд үнэгүйдэж буйгийн жишээ сүүлийн үед олон давтагдах болжээ. Оны өмнө салбарын дээд шагнал болох тэргүүний ажилтны тэмдэг урд хөршид тэр тусмаа бидэнтэй хамгийн ойр Эрээн хотын зах дээр хэдхэн зуун юанийн үнэтэй зардаг талаар мэдээлж байсан. Арай ч дээ, 10 гаруй жил хөдөлмөрлөж байж авдаг шагнал шүү дээ гэж бодохоор гол харламаар. Гэтэл удалгүй ' Хархорин зах дээр Хөдөлмөрийн хүндэт медалийг 100 мянган төгрөгөөр зарж байхыг хүртэл нүдээрээ харлаа. Ичих шиг болов.

Харин одоо бол бүр цайрчээ. Тэнгэрийн Алтан гадасыг энгэртээ зүүлээ гэж бид онгирдог. Тэр ч утгаараа "Алтан гадас" одонгоор шагнуулсан хүн хамгийн өндөр сэтгэгдэлтэй байдаг билээ. Тэгвэл тэр шагналыг АНУ-д 150 доллараар худалдаж байна гэнэ, цаана чинь. Бүр дуудлагаар худалдаж байгаа нэгэн америк эр үнэ хаялцаж байгаад 150 ам.долларт хүргэж авчээ. Монголын шагналыг яагаад АНУ-д зардаг билээ гэж гайхтал төрийн дээд медалиудыг бусдад худалддаг сүлжээ байдаг болсон юм уу даа. Ингэж төрийн одон медалийг үнэгүйдүүлж буй нөхдийг эрж, хайж олоод арга хэмжээ аваасай. Уг нь аав минь "Алтан гадас" аваад мөн ч их баярласансан. "Алтан гадас" аваад сэтгэл хөөрдөг монголчуудыг тэмдэгний бизнес эрхлэгчид шууд доромжлов. Америк эр "Яасан аятайхан хэлбэртэй тэмдэг вэ. Цуглуулгадаа оруулна" гэж хэлээд бусдад алдахгүйн тулд овоо үнэ хүргэсэн тухай АНУ-д амьдардаг эгч хэлэхэд нь цочирдлоо.

Арай ч дээ. Аягүй бол дараа жил гавьяатын тэмдгийг зах дээр зарж мэдэх нь байна шүү. Үүнд хяналт тавьдаг газар эрхбиш байгаа байлгүй. Тэд ажлаа хийгээсэй билээ.

Б.ЗУЛ /ҮНДЭСНИЙ ШУУДАН/

URL: http://www.choibalsan.mn/index.php?newsid=8269