Баян-Уул сумын Эрээн багийн \6 дугаар баг\ Партизан Д.Содномдаржаагийн нэрэмжит, социалист хөдөлмөрийн эрээний тэрэгний үйлдвэр үүсгэн байгуулагдсаны 70 жилийн ой энэ сарын 19,20 –ны өдрүүдэд тохиолоо. Энэхүү баярын хүрээнд тэрэгний үйлдвэрийг санаачлан байгуулсан Д.Содномдаржаа агсаны мэндэлсэний 120 жилийн ой, Лам малгай уулын их тахилгын 100 жилийг тэмдэглэн өнгөрүүлэв.

Эрээн багийн засаг дарга Л. Отгон –Иш ойн баяраа угтаж 35 сая төгрөгөөр бүтээн байгуулалтын ажил, 65 сая төгрөгөөр наадмын үйл ажиллагааг зохион байгуулж байгаа талаар дурдсан юм.

6 дугаар багийн дунд сургуулийн 16 дугаар төгсөлтийн хамт олон "Эмчийн байр”, Л.Сүрэнжав, Б.Нямаагийн  үр хүүхдүүд хамтран 14х18м бүжгийн талбай, Одончимэд болон Гарьдын үр хүүхдүүд усан оргилуур, нийт төгсөлтүүдийн хөрөнгө оруулалтаар спорт тоглоомын талбай, Үйлдвэрийн дарга асан Г.Гончиглодонгийн шүлэг бүхий тэргэн хөшөө, "Эрээн” угтан авах багана зэргийг бүтээжээ.

Хөтөлбөрийн дагуу баярын концерт, хүндэт зочидоо хүлээн авах үйл ажиллагаа, Шинэ эмнэлэг, спорт талбайн нээлт, ахмадын бүжиг, галын наадам зохиогдож, соёолон, шүдлэн, хязаалан, даага дөрвөн насны морь уралдаан, Буриал сурын харваа, хүчит бөхийн барилдаанаар наадам үргэлжиллээ.

Тэрэгний үйлдвэр нь 24 цагийн хоёр ээлжээр сард 500 ширхэг үхэр, тэмээн, хар тэрэг үйлдвэрлэж зүүн гурван аймаг болон улсын хэмжээнд нийлүүлдэг байжээ. Өдгөө Эрээний тэрэгний үйлдвэрийн залгамж халааг "Нарс мод”, "Бавж барс”, "Өвөр эрээн” ХХКомпаниуд үргэлжлүүлэн явуулж, мод, модон бүтээгдэхүүн үйлдвэрлэж байгаа юм.

Ц.Анужин

URL: http://www.choibalsan.mn/index.php?newsid=10170