Засгийн газраас улс оронд өрнөж буй
бүтээн байгуулалтын ажлыг онцлон ярилцдаг "Бүтээн байгуулалтын цаг”
уламлалт уулзалтад өнөөдөр Мэдээллийн технологи, шуудан, харилцаа
холбооны газрын /МТШХХГ/ дарга Ц.Жадамбаа оролцож, 2012
оноос хойш хийж хэрэгжүүлсэн төсөл хөтөлбөрүүд болон цаашид хийхээр
төлөвлөж байгаа зорилтуудаа танилцууллаа.
Тус газраас 2012-2016 онд үндсэн долоон зорилт дэвшүүлэн ажиллаж байгаа юм. "Үндэсний хиймэл дагуул” хөтөлбөрийн хүрээнд Монгол Улс 2016 онд тандан судалгааны болон харилцаа холбооны хоёр төрлийн хиймэл дагуултай болно. Олон улсын цахилгаан холбооны байгууллагаас хуваарилсан сансрын орон зайг эзэмших хүсэлтээ манай улс анх удаа тус байгууллагад илгээсэн гэдгийг МТШХХГ-ын дарга хэллээ.
"Төрийн түгжрэлгүй үйлчилгээ” зорилтын хүрээнд төрийн үйлчилгээний 21 аймаг, Улаанбаатар хотод нийтдээ 47 Төрийн үйлчилгээний цахим /ТҮЦ/ машиныг суурилуулсан бөгөөд энэ онд багтаан 59 ТҮЦ машин нэмж байршуулах юм. Харилцаа холбооны зохицуулах хороо, Мэдээлэл холбооны сүлжээ ТӨК-тай хамтран орон нутагт интернэтийн үнийг гурав дахин хямдруулж, хурдыг нь хоёр дахин нэмэгдүүлсэн гэдгийг онцоллоо.
Мөн 2014 оны 7 дугаар сарын 31-нд орон даяар тоон технологид шилжүүлэх ажлыг зохион байгуулахаар ажиллаж байна. Энэ оны хоёрдугаар улиралд багтаан нутаг дэвсгэрийг бүрэн хамарсан тоон телевизийн сүлжээг байгуулж дуусна гэлээ.
МТШХХГ-аас шуудангийн үйлчилгээг хэрэглэгчдэд улам ойртуулсан ухаалаг үйлчилгээ бий болгох зорилгоор "Ухаалаг шуудангийн хайрцаг”-ийг Улаанбаатар хотын 18 цэг, Дархан, Эрдэнэт хотуудад байршуулан ажиллуулж байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
Танд манай сайт таалагдаж байвал Like дарна уу. Танд баярлалаа
Танд мэдээ таалагдаж байвал Like дарна уу.
Сэтгэгдэл бичих