Гэр бүл судлаачид гэрлэсэн хосуудыг нэг нэгнийхээ твиттер, фэйсбүүк зэрэг цахим хуудсанд хааяа "шалгалт оруулж" байхыг зөвлөсөн гэж World wide weird news мэдээллээ.

Учир нь цахим ертөнц хөгжсөн энэ цаг үед эхнэр, нөхрүүд цахим шуудангаараа ямар нэг байдлаар нууц амрагтайгаа холбоо тогтоодог, тэндтэй харилцдаг аж. Мөн гэр бүлийн харьцаанаасаа уйдсан эхнэр болон нөхөр өөр хэн нэгэнтэй танилцахдаа фэйсбүүкээ ашигладаг болохыг тэд сануулжээ.

Хэдэн сарын өмнө Энэтхэгийн орон нутгийн цагдаагийн байгууллагад ресторанд хүмүүс зодолдоод байна гэх дуудлага иржээ. Дуудлагын дагуу очиж зодоон хийсэн эрэгтэй, эмэгтэй хоёр хүнийг саатуулан шалгасан байна.

Тэднээс мэдүүлэг авахад тэд гэрлээд удаагүй байгаа шинэхэн гэр бүл болох нь батлагджээ.

Нөхөр нь гэр бүлийн харьцаанаас уйдаж нууц амраг хайхаар болжээ. Өөртөө фэйсбүүкийн шинэ аккаунт нээгээд, өөр хэн нэгний зургийг профайл дээрээ тавиад хэдэн долоо хоногийн турш шинэ амрагаа хайх эрэлд гарсан байна. Ингэсний эцэст эхнэрээсээ нь илүү үзэсгэлэнтэй бүсгүйг олжээ. Тэд фэйсбүүкээр гурван сарын турш харилцсны эцэст уулзахаар болзжээ.

Эхнэр нь энэ хугацаанд нөхрөө хэн нэгэнтэй фэйсбүүкээр харилцаад байгааг таамаглаж байсан ч, түүний аккаунт руу нэвтэрч чадахгүй байж.

Нөхөр нь мөрөөдлийн бүсгүйтэйгээ гурван сар чатласны эцэст дүүргийнхээ хамгийн үнэтэй ресторанд уулзахаар цаг товолжээ. Фэйсбүүк хосууд анхны болзоондоо бие биенээ хараад их цочирдсон байна.

Учир нь нөгөө үзэсгэлэнт бүсгүйн оронд эхнэр нь, мөрөөдлийн ханхүүгийн оронд нөхөр нь зогсож байжээ. Үүнээс болж тэдний маргаан, зодоон эхэлсэн байна.

Тиймээс орон нутгийн цагдаа нар дээрх шиг үйл явдал гаргуулахгүйн тулд гэр бүл судлаачдад хандаж, дээрх зөвлөгөөг олон нийтэд хүргэхийг хүсчээ.

Б.Дэжид