"WikiLeaks” сайтыг үүсгэн байгуулагч Жулиан Ассанж болон түүний хамтрагчид ирэх арваннэгдүгээр сарын 8-ны өдөр буюу АНУ-ын ерөнхийлөгчийн сонгууль болохоос урьтаж нэр дэвшигч Хиллари Клинтонтой холбоотой нууц мэдээллүүдийг олонд дэлгэнэ гэв.

Ингэхдээ Хилларигийн аль болох ач холбогдолтой "томоохон” мэдээллийг гаргахаар төлөвлөж байгаагаа лхагва гарагт мэдэгджээ. 

Энэ тухай Жулиан Ассанж Австралийн "Fox News” агентлагт өгсөн ярилцлагадаа "Та бүхэн энэ мэдээллийг хараад саналаа хэнд өгөх тал дээр эргэлзэхэд хүрнэ. Яагаад гэвэл энэ мэдээлэл АНУ-ын төрийн далд, аймшигт үзэгдлүүдтэй холбоотой” гэжээ. Сонирхолтой нь Жулиан Ассанж одоо хүртэл Их Британи дахь Эквадор улсын ЭСЯ-нд орогнож буй бөгөөд интернэт видео ашиглан ярилцлага өгсөн байна.

"Fox News”-ийн сэтгүүлч "Таны дэлгэх материалууд "тоглоомын хувь заяа”-г өөр тийш нь эргүүлэх болов уу?” гэж асуухад, Ассанж "Би улстөр, сонгуулийн аль нэг талд ажиллаж ийм үйлдэл хийгээгүй. Гэхдээ надад байгаа материалууд сонгуулийн кампанит ажлын хүрээнд хийгдсэн бохир зүйлстэй холбоотой. Баримтууд дотор янз бүрийн материалууд бий. Зарим нь маш энгийн, зарим нь сонирхолтой, зарим нь бүр ч сонирхолтой” гэж хариулжээ.

Т.Бат