Манай аймгийн нийт худалдан авалтын дийлэнх нь аймгийн төвдөө хийгддэг. Энэ хэрээр аймгийн төвд хийгдсэн чанаргүй тендерүүд их байгааг саяхны явуулсан судалгааны дүнгээс харж болохоор байна. 2013 онд Хэрлэн сумын хэмжээнд 60 гаруй тендерийн гүйцэтгэлийг харах юм бол маш сайн ажил хараахан байхгүй, сайн гэж үнэлэгдсэн нь 30-аад хувьтай, дийлэнх нь улс орон нутгийн төсвийн мөнгөөр тоглоод хаячихсан гэж хэлж болохоор. Энэ бол хяналт үнэлгээний олон нийтийн зөвлөлд ажилладаг 30-аад хүний үнэлгээ бус мянга гаруй иргэний санал хүсэлт дээр тулгуурласан судалгаа учир бодит байдалтай хол зөрөхөөргүй тоо юм.

 

Уг нь шаардлагатай ажил үйлчилгээ нүдээ олж тендер нь зарлагддаг ч гүйцэтгэл, чанар нь туйлын хангалтгүй гэдгийг судалгаанд хамрагдсан иргэд дуу нэгтэй зөвшөөрчээ. Чанаргүй ажил хийж гүйцэтгэсэн компанид хүлээлгэх хариуцлагын тухайд өнөөдрийн байдлаар албан шаардлага хүргүүлж, зөвлөмж өгөхөөс хэтрэхгүй байна. Хатуухан хэлэх юм бол улс орон нутгийн өч төчнөөн хөрөнгөөр тоглож, завшчихаад ямар ч хариуцлага хүлээдэггүй, чанар муутай хангалтгүй хийгдсэн ажлыг  холбогдох хүмүүс нь нүдээ аниад, чихээ бөглөөд хүлээгээд авчихдаг нь дээрх байдлыг өөгшүүлэх шалтгаан болж байна. Тухайлбал чанар муутай хийгдсэн гүйцэтгэлүүдээс гадна 50 саяын ажил авчихаад 15 саяар гүйцэтгэсэн байх жишээтэй үнэлгээ нь хүрэхгүй асуудал ч хэд хэд гарчээ.

 

"Людмила” компани 8-р багийн ажлын албаны байрыг 100 сая төгрөгөөр барьж гүйцэтгэсэн боловч гадна талын будаг нь халцарч, шохой нь хөндийрсөн, үүдний хэсэг нь цантдаг, мөн тус багт баригдсан "Дорнын хийц” компанийн Халуун усны барилгын хувьд өрөө нь нарийн, агааржуулалтгүй, цахилгааныг нь шийдээгүй учир өнөөдрийг хүртэл ажиллаагүй гэхчлэн багуудад хийгдсэн тендерийн чанаргүй гүйцэтгэлийг дурдвал урт цуваа хөврөх нь ээ. Чанаргүй "тендерчдэд” хэрхэн хариуцлаг тооцдог болох вэ.  Уг нь барилга байгууламжийн ажил нь дутуу, гэрээгээр хүлээсэн үүргээ биелүүлээгүй аж ахуйн нэгж, байгууллагыг хар жагсаалтад оруулж, олон нийтэд зарлах, дахин тендерт оруулахгүй байж хариуцлага тооцож болох гарц харагдаж байгаа юм.