XIX зууны эцэс, ХХ зууны эхнээс Азид хүч түрэмгийлэх санаархлаа төрийн бодлогын хэмжээнд тунхаглах болсон Японы эрх баригчид стратегийн түшиц газраа болгохоор 1934 оноос удаа дараа Монголыг халдан довтолж байв. Энэ байдал 1939 он гарсаар ч тасрахгүй үргэлжлэв.1939 оны 1-3 –р сард цөөн тооны цэргийн хүчээр тагнах турших маягийн хилийн зөрчил 40 шахам удаа гарчээ.
Цэрэг дайны үйл ажиллагаа улам идэвхжих нь тодорхой болж МАХЦ-ийн 6 дугаар морьт дивизийг Халхын голруу хөдөлгөн байрлуулсан юм. Түүнчлэн улаан армийн хуягтын рот, их бууны батарей, саперын рот бүхий 1200 хүнтэй отрядыг мөн Халхын голруу 5 дугаар сарын 25 –нд шилжүүлэн байршуулжээ.
Улмаар 1939 оны 5 дугаар сарын 11 –ны өдөр их буу, нисэх онгоцоор дэмжүүлсэн бүлэг хүчээр японы квантуны арми Халголын байлдааныг эхлүүлсэн юм.
      Халхын голын байлдаан 4 сарын турш, 3 үе шаттай явагдсан.

      Нэгдүгээр шат: 1939 оны 5 дугаар сарын байлдааны ажиллагаа.
Хоёрдугаар шат: Баянцагааны районд 7 дугаар сарын 2 – 6 –нд болсон тулалдаан.
Гуравдугаар шат: 8 дугаар сарын 20 –ноос 31 –ний өдрүүдэд болсон Зөвлөлт Монголын 8 дугаар сарын давших операци.
Энэ операци нь цэргийн сүүлийн үеийн түргэн хөдөлгөөнтэй олон төрлийн зэвсэг, техниктэй, харилцан ажиллагааг зохион байгуулж дайсныг бүр мөсөн бүслэн устгаснаараа дайны түүхэнд шинэ туршлага болон оржээ.

---