Дорнод аймаг ашигт малтмалын багагүй нөөцтэй бөгөөд 85 орд, ирээдүй бүхий 149 илрэлийг тогтоосон байдаг. Тамсагийн сав газарт газрын тос, Адуунчулуун, Үхэрт, Хөөвөр нуур, Хөөт, Баянбулаг зэрэгт хүрэн нүүрсний Цав, Улаан, Мухарт холимог металлын, Цагаанчулуут, Үрлийн овоо, Тогоотын хөндий, Дөч голын алтны, Мардай, Дорнод, Гурванбулагт ураны зэрэг ашигт малтмалын томоохон ордуудтай.

Одоогийн байдлаар тус аймагт 216 аж ахуйн нэгж, иргэн 2629.5 мянган га талбайд хайгуулын, 44 аж ахуйн нэгж 10952.2 га талбайд ашигт малтмал олборлох тусгай зөвшөөрөл эзэмшиж байна.

Ашигт малтмалын хайгуул, олборлолтын чиглэлээр Адуунчулуун, Петро Чайна Датчин Тамсаг, Улз гол, Жамп, Төв Азийн уран, Эмээлт майнз, Дамбат, Тунамал шижир, Дун эрдэнэ, Шанлун, Шинь Шинь зэрэг томоохон компани аж ахуйн нэгжүүд үйл ажиллагаа явуулж байна.

Уул уурхайн үйлдвэрлэлийн явцад хөндөгдсөн 400 гаруй га газраас 2004-2008 онуудад нийт 198 га талбайд нөхөн сэргээлт хийгдээд байна. Чойбалсан хотын орчимд байрлаж байсан хуучнаар ЗХУ-ын цэргийн ангиуд, Мардайн уурхайчдын тосгоны газрын доорхи цахилгаан, холбооны кабелийн зэс, хаягдал төмөр, халаалт, бохир, цэвэр усны хоолойг авах зорилгоор газрын хэвлийг их хэмжээгээр сэндийлж, нөхөн сэргээлт хийлгүй орхисон байна. Эдгээр эвдэрсэн газрын хэмжээ нарийвчлан тогтоогдоогүй, нөхөн сэргээх эзэн холбогдогч нь тодорхойгүй байна.

URL: http://www.choibalsan.mn/index.php?newsid=2197