Норвегийн шатрын их мастер Магнус Карлсен ОХУ-ын Сочи хотноо 11 дэх өрөгт Энэтхэгийн Вишванатан Анандыг хожсоноор 6.5:4.5 харьцаагаар илүүрхэн дэлхийн аваргын цолоо хамгаалжээ. Нэг сая еврогийн шагналын сантай энэ халз тулаанд ялагдсан В.Ананд, "Өргийн дундуур би эрсдэл хийхээр шийдсэн ч М.Карлсен алдаа гаргалгүй маш жигд тоглосоор ялалт байгууллаа. Тоглолтын эхнээс л тэр надаас илүү тоглосон” гэжээ.

М.Карлсен өнгөрсөн жилийн арваннэгдүгээр сард В.Анандыг 6.5:3.5 харьцаатай хожиж дэлхийн аваргын титмийг нь булаан авсан билээ. Харин энэ оны гурвадугаар сард В.Ананд дэлхийн аваргатай халз тоглох эрх олгох тэмцээнд түрүүлснээр даагаа нэхэх боломжтой болсон ч Норвегийн залуу их мастерт ийнхүү дахин хожигдлоо. 

Б.САНСАР /ЗУУНЫ МЭДЭЭ/

---