Дорнод аймгийнхан хоёр хоногийн өмнө ИТХ-аа хуралдуулж аймгийн Засаг дарга С.Ганбатыг огцруулсан. Тэгвэл өчигдрөөс аймгийн шинэ засаг даргын яриа хүчтэй яригдах боллоо. Эх сурвалжийн хэлж буйгаар С.Отгонбаатарыг Дорнодын засаг даргаар томилохоор яригдаж буй аж. С.Отгонбаатар нь 2012 оны УИХ-ын сонгуульд ИЗНН-аас нэр дэвшиж байсан юм.

С.Ганбатыг огцруулах болсон шалтгаан нь хууль зөрчсөн үйлдлүүдтэй нь холбоотой гэнэ. Тодруулбал аймгийн боловсролын газрын дарга, Байгаль орчны газрын дарга нарын томилгоог хууль зөрчиж хийсэн, төрийн болон орон нутгийн өмчит газрыг ИТХ-аар хэлэлцүүлэлгүй олгосон, аймгийн төвд байрлах Тусгаар тогтнолын талбайн хажуугийн газрыг ИТХ-тай зөвшилцөлгүй дур мэдэн эзэмшүүлсэн. Мөн аймгийн байгаль хамгаалах сангийн мөнгийг дур мэдэн зарцуулсан зэрэг зөрчлүүд нь тогтоогдсон учраас үүрэгт ажлаас чөлөөлсөн.

Г.Бат

uls.mn

URL: http://www.choibalsan.mn/index.php?newsid=8561