Энэ сарын хоёрлнд Дорнод аймгийн төв Чойбалсан хотноо "Бид оршихын тулд бус хөгжихийн төлөө амьдармаар байна” чуулган болж өнгөрлөө. Хөгжлийн бэрхшээлтэй иргэдийн эрх, нийгмийн хамгааллыг сайжруулах, тэдний нийгэмд эзлэх байр суурийг дээшлүүлэх, ажил эрхлэлтийг нэмэгдүүлэх зорилгоор зохион байгуулагдсан уг чуулганыг УИХ-ын гишүүн Х.Болорчулуун, Аймгийн засаг дарга С.Ганбат нарын ивээл дор зохион байгуулсан. Чуулганд Дорнод аймгийн 13 сум болон аймгийн төвийн 10 багийн 250 гаруй хөгжлийн бэрхшээлтэй иргэд, тэдний төлөө үйл ажиллагаа явуулдаг төрийн болон төрийн бус байгууллагууд оролцож байгаа юм. Мөн ХАХНХЯ, ЭМЯ, Хөдөлмөрийн яамны албаны хүмүүс оролцсон. Дорнод аймагт 4325 хөгжлийн бэрхшээлтэй иргэн амьдардаг, тэдний 2897 нь хөдөлмөрийн насных гэсэн судалгаа бий. Эдгээр иргэдийн 30 хүрэхгүй хувь нь л ямар нэгэн байдлаар ажил эрхэлж буй юм. 25 ба түүнээс дээш ажилтантай байгууллага, аж ахуйн нэгжүүдийн нийт ажиллагсадын 4 хүртэлх хувь нь хөгжлийн бэрхшээлтэй иргэн байх тухай Хөдөлмөрийн хуулинд заасан байдаг. Энэ хууль бодит амьдрал дээр хэрэгжихгүй байгаа. Хөгжлийн бэрхшээлтэй иргэдийн ажил эрхлэлтийг нэмэгдүүлэхийн тулд төрийн болон хувийн хэвшлийнхэн идэвхи санаачилгатай ажиллахыг чуулганд оролцогсод онцолж байлаа.
Чуулганы үеэр "Дорнод гурил” ХХК, "Билэг” ХХК зэрэг компаниуд ажиллуулж буй хөгжлийн бэрхшээлтэй иргэдийнхээ тоог нэмэгдүүлэхээ илэрхийлж, бусад компаниудад уриалсан юм. Тухайлбал "Дорнод гурил” ХХК-ийн нийт ажиллагсадын зургаа орчим хувийг хөгжлийн бэрхшээлтэй иргэд эзэлдэг байна. Энэ тоог цаашид нэмэгдүүлэхийн зэргэцээ Дорнод аймгийн хөгжлийн бэрхшээлтэй иргэдийн эрх ашгийг хамгаалах холбоонд энэ жилээс эхлэн 5 жилийн хугацаанд жил бүр 10 сая төгрөгийн санхүүгийн тусламж үзүүлэхээр болсон юм.
Энэ үеэр хөгжлийн бэрхшээлтэй иргэдийн төлөө үйл ажиллагаа явуулдаг зарим байгууллага, хувь хүмүүсийг шагнаж урамшууллаа. Хүүхдэд ээлтэй иргэн өргөмжлөлөөр Хэрлэн сумын 1-р сургуулийн багш Д.Оюундулам тодорсон. Тус сургуульд 1990 оноос хөгжлийн бэрхшээлтэй хүүхдэд суурь боловсрол олгох тусгай анги хичээллэж эхэлсэн бөгөөд одоо 3, 5-р ангийн 17 хүүхэд суралцаж байна. Д.Оюундулам багш өнгөрсөн хугацаанд 50 гаруй хүүхдэд суурь боловсрол эзэмшүүлжээ.
Мөн 7-р багийн иргэн Д.Оюумаа, Г.Оюунсувд, 6-р багийн иргэн Л.Ганчимэг, 3-р багийн иргэн Х.Баярсүрэн нарт оёдлын машин бэлэглэж, өрхийн амьжиргаа дээшлүүлэх боломж ийг олголоо. ХАХНЯ-ны жуух бичгээр Д.Мөнхсүрэн, Э.Мөнхтунгалаг, ХАХНХЯ-ны тэргүүний ажилтан цолоор н.Энх-Амгалан, ССАЖЯ-ны жуух бичгээр Л.Энэбиш, ССАЖЯ-ны СТА цолоор Д.Хатанбаатар, Д.Моонон нар шагнагдлаа. ЭМЯ-наас Дорнод аймгийн хөгжлийн бэрхшээлтэй иргэдийн холбоонд барель үсгийн номууд болон хоёр тэргэцэнр гардуулж, нэн шаардлагатай хүмүүст нь бэлэглэхийг хүслээ.
Чуулганы салбар хуралдаанууд Нийгмийн халамж, хөдөлмөр эрхлэлт, эрүүл мэнд, боловсрол, хүүхэд гэр бүл гэсэн таван чиглэлээр явагдсан.

Dnews.mn

URL: http://www.choibalsan.mn/index.php?newsid=6580